মহ৻ থাকোঁতে যদি অসমখনৰ ক্ষতি হয়, তেন্তে মই মুখ্যমন্ত্রী হৈ থকাৰ লাভ কি? এয়া আছিল সর্বানন্দ সোণোৱালৰ কথা৷ তিনি-চাৰি মাহ আগতে সোণোৱালে বাতৰিকাকতৰ সম্পাদকসকলক নিজৰ বাসভৱনলৈ মাতি নি এনেদৰে কৈছিল৷ মুখ্যমন্ত্রীৰ উক্ত মন্তব্যত অসমৰ ৰাইজ বহু পৰিমাণে আশ্বস্ত হৈছিল৷ সকলোৱে ভাবিছিল– নাগৰিকত্ব সংশোধনী বিধেয়কখনক লৈ মুখ্যমন্ত্রীয়ে মূৰকত কিবা এটা কৰিব৷ কিন্তু এতিয়া পৰিস্থিতি জোঁৰ পুৰি হাত পোৱা নহয়, জোঁৰ পুৰি কিলাকুটি পালেহি৷ লোক সভাত নাগৰিকত্ব সংশোধনী বিধেয়ক গৃহীত হ’ল৷ উক্ত বিধেয়কখন আইনত পৰিণত হ’বলৈ এতিয়া মাত্র ৰাজ্য সভাৰ অনুমোদনহে বাকী৷ অসম এতিয়া উত্তপ্ত৷ ৰাজ্যৰ চৌদিশে প্রতিবাদৰ জুই৷ এনে সময়তো মুখ্যমন্ত্রী সোণোৱাল নির্লিপ্ত৷ মুখ্যমন্ত্রীৰ এতিয়া দায়িত্ব আছিল অসমৰ ৰাইজৰ মনৰ কথাখিনি প্রধানমন্ত্রী নৰেন্দ্র মোদী আৰু অমিত শ্বাহক অৱগত কৰোৱা৷ ৰাজ্য এখনৰ মুৰববী হিচাপে মুখ্যমন্ত্রীয়ে ৰাজ্যৰ পৰিস্থিতিৰ কথা দিল্লীত জনোৱাটো জৰুৰী আছিল৷ কিন্তু শেহতীয়াকৈ দেখা গৈছে যে মুখ্যমন্ত্রীয়েও বিধেয়কখনৰ সপক্ষতহে মুকলিভাৱে ওকালতি কৰিছে৷ মুখ্যমন্ত্রীয়ে কৈছে যে তেওঁ অসমৰ কেতিয়াও ক্ষতি নকৰে৷ বৰং অসমৰ ভালৰ বাবেহে বিধেয়কখন অনা হৈছে৷ কথা হ’ল বিধেয়কখনৰ মূল উদ্দেশ্য হৈছে বিদেশীক সংস্থাপিত কৰা৷ এতিয়া প্রশ্ন উঠিছে– বিদেশীক সংস্থাপিত কৰি মুখ্যমন্ত্রীয়ে কেনেকৈ অসমৰ উপকাৰ কৰিব? নাগৰিকত্ব সংশোধনী বিধেয়কখনে অসমৰ ক্ষতি কৰিব বুলি সকলোৱে কৈছে৷ বিশেষকৈ বিধেয়কখনে অসমীয়া ভাষা-সংস্কৃতিৰ প্রতি তীব্র ভাবুকি আনিব বুলি সকলোৱে মুকলিভাৱে কৈছে৷ এয়া কেৱল কোনোবা এটা বিশেষ দল-সংগঠনে কোৱা কথা নহয়৷ অসমৰ সকলো ৰাইজ বিধেয়কখনৰ বিৰুদ্ধে থিয় দিছে৷ ৰাজ্যৰ অগ্রণী ব্যক্তি, বুদ্ধিজীৱী, সাহিত্যিক আৰু সচেতন মহলেও বিধেয়কখনৰ ভয়াৱহতাৰ কথা মুকলিভাৱে উল্লেখ কৰিছে৷ ইয়াৰ পাছতো বিধেয়কখনৰ উপকাৰিতা দেখিছে কেৱল মুখ্যমন্ত্রী, বিত্তমন্ত্রী আৰু বিজেপিৰ নেতা-কর্মীসকলে৷ সর্বানন্দ সোণোৱালক অসমৰ ৰাইজে জাতীয় নায়ক বুলি আখ্যা দিছিল৷ সেইজন জাতীয় নায়কৰ এতিয়া অসমীয়া জাতিৰ প্রতি কোনো ধৰণৰ দায়বদ্ধতা নোহোৱা হ’ল৷ আচলতে সোণোৱালৰ দৰে নেতাসকলে দিল্লীৰ বিৰুদ্ধে মুখ খুলিব নোৱাৰে৷ অথবা দিল্লীৰ বিৰুদ্ধে মুখ খুলিবলৈ তেওঁলোকৰ সাহস নাই৷ অসমৰ জাতীয় জীৱনৰ লগত সুদীর্ঘ দিন জড়িত সর্বানন্দ সোণোৱাল৷ বিদেশীৰ ইছু্যৰে তেওঁ অসমীয়া ৰাইজৰ ওচৰত চিনাকি৷ গতিকে বিধেয়কখনৰ জৰিয়তে অসমৰ কিমান ক্ষতি হ’ব, সেই কথা সোণোৱালে জানে৷ কিন্তু এতিয়া গাদীৰ লোভত সোণোৱালৰ মাত নোহোৱা হ’ল৷ বর্তমানৰ চৰকাৰখনৰ পৰা ৰাইজে আশা কৰাৰ কোনো ধৰণৰ সীমা নাছিল৷ বিশেষকৈ জাতীয় সমস্যাৰ ক্ষেত্রত ৰাইজৰ বহু আশা আছিল৷ বিদেশীৰ সমস্যাৰে অসমৰ ৰাইজ দীর্ঘদিন ধৰি জর্জৰিত৷ সকলোৱে আশা কৰিছিল– সোণোৱালৰ নেতৃত্বত ৰাজ্যৰ এই জ্বলন্ত সমস্যাটোৰ সমাধান হ’ব৷ অসমত সোণোৱালৰ নেতৃত্ব আৰু দিল্লীত নৰেন্দ্র মোদী৷ কাৰণ ২০১৪-ৰ লোক সভাৰ নির্বাচনৰ আগে আগে অসমলৈ আহি নৰেন্দ্র মোদীয়েও অসমৰ ৰাইজক বহু প্রতিশ্রুতি দিছিল৷ কিন্তু মোদীৰ পাঁচ বছৰত অসমৰ একো নহ’ল৷ উন্মুক্ত হৈ থাকিল সীমান্ত৷ সোণোৱালৰ প্রায় তিনি বছৰীয়া শাসনকালত ৰাইজ এতিয়া হতাশ৷ কেৱল হতাশেই নহয়, ৰাইজ ৰাজপথত৷ অসমৰ ৰাজনৈতিক ইতিহাসত এইবাৰেই বোধহয় অসমবাসীৰ সন্মুখলৈ ভয়াৱহ প্রত্যাহবান আহিছে৷ একেদৰে এইবাৰেই অসমৰ ৰাইজ চৰম বিশ্বাসঘাতকতাৰ বলি হৈছে৷ সোণোৱালে অসমৰ ৰাইজক যেনেদৰে বিশ্বাসঘাতকতা কৰিলে তাৰ নজিৰ বিচাৰি পাবলৈ নাই৷

সম্প্রতি এই যে নাগৰিকত্ব আইনখন লৈ কেউদিশে এক অৰাজক, আতংকময় পৰিৱেশৰ সূচনা হৈছে এয়া যেন জাতিটো এক অৱধাৰিত ধবংসৰ মুখলৈ আগবাঢ়ি যোৱাৰ ইংগিত৷ জাতিৰ বিপর্যয়ৰ কাৰণ কেৱল বিদেশীক সংস্থাপন দিবলৈ ওলোৱা বাবেই নহয়, এই ইছু্যটোক কেন্দ্র কৰি মানুহৰ মনত মানুহৰ প্রতি যি সাম্প্রদায়িক আৰু ধর্মীয় ঘৃণা-বিদ্বেষৰ মনোভাব জাগি উঠিছে সেয়াহে অন্যতম কাৰণ৷ মানুহৰ মাজত হোৱা কথা-বতৰা, আলোচনাবোৰত ভাষা-ধর্ম-সম্প্রদায়-গোষ্ঠীক লৈ ঘৃণা-বিষোদগাৰবোৰ স্পষ্টভাৱে প্রকাশ পাবলৈ ধৰিছে৷ অসমীয়া মানুহ এতিয়া দেখদেখকৈ দুভাগত বিভক্ত হৈছে৷ এটা ভাগে নাগৰিকত্ব সংশোধনী বিধেয়কখনৰ বিৰোধিতা কৰিছে আনটো ক্ষুদ্র ভাগে সমর্থন কৰিছে৷ ইয়াৰ মাজতো একাংশ ৰাইজ হয়তো আছে, যিয়ে প্রস্তাৱিত আইনখন প্রৱর্তন হ’লে পৰিণাম কি হ’ব একো ধৰিব পৰা নাই৷ বিধেয়কখনৰ বিৰোধিতা কৰাসকলে বুজি উঠিছে যে হিন্দুৰ নামত বাংলাদেশীক অসমত সংস্থাপিত কৰিলে ৰাজনৈতিক, সামাজিক, অর্থনৈতিক, সাংস্কৃতিক সকলো দিশৰ পৰা ক্ষতিগ্রস্ত হ’ব অসমীয়া জাতি৷ জাতি হিচাপে অসমীয়াৰ পৰিচয় বিপন্ন হ’ব৷ বিগত দিনত কংগ্রেছে মুছলমান বাংলাদেশীক ব্যৱহাৰ কৰাৰ দৰে বিজেপি দলেও হিন্দু বাংলাদেশীসকলক ভোটবেংক হিচাপে ব্যৱহাৰ কৰি ক্ষমতা দখলৰ ৰাজনীতি কৰি যাব বুলি সেইসকলৰ আশংকা৷ আনহাতে যিসকলে বিধেয়কখনৰ সমর্থন কৰিছে তেওঁলোকৰ সিংহভাগেই হ’ল হিন্দু বাংলাদেশী মানুহ আৰু তেওঁলোকৰ স্বজাতি বাঙালী, যি ভাৰতবর্ষৰ স্থায়ী নাগৰিক ৰূপে স্বীকৃত৷ হিন্দু বাংলাদেশীৰ সমর্থনত তেওঁলোকৰ সমমর্মিতা জাগিছে স্বাভাৱিক ভাষিক জাতীয়তাবাদ সূত্রে৷ কিন্তু অসমৰ একাংশ খিলঞ্জীয়া লোকেও হিন্দু বাংলাদেশীক নাগৰিকত্ব প্রদানৰ আৱশ্যকতা অনুভৱ কৰিছে৷ এইসকলৰ মাজত কিছুসংখ্যক বিজেপিৰ হয় দলীয় মানুহ, নহয় দলটোৰ অন্ধ সমর্থক৷ বিধেয়কৰ সমর্থনকাৰী মূল অংশটোৱেই হ’ল মুছলিম-বিদ্বেষী ধর্মান্ধ হিন্দু৷ তেওঁলোকে ভাবে যে মুছলমান মানুহ মাত্রেই হিন্দুৰ শত্রু৷ দেশ আৰু জাতিৰো শত্রু৷ এইসকল গোড়া হিন্দুত্ববাদীয়ে দেশৰ মুছলমানক মধ্যযুগীয় মুছলমান আক্রমণকাৰীৰ নাতি-পুতি বুলি ভাবি শত্রুজ্ঞান কৰে আৰু ভাবে যে মুছলমানসকল ভাৰতত থাকে যদিও তেওঁলোক আচলতে পাকিস্তানৰহে নাগৰিক৷ অসমত বসবাসকাৰী সকলো মুছলমানৰ প্রতি এইসকল হিন্দুত্ববাদীৰ আছে তীব্র ঘৃণা৷ পিছে সৰহভাগ মানুহৰ মনত এনে ধাৰণা বা এই ঘৃণা বিজেপি-আৰ এছ এছৰ সাম্প্রতিক ৰাজনীতিয়েহে জন্ম দিছে৷ আইৰনি পিছে এয়া যে এওঁলোকে মুছলমান বাংলাদেশীক ঘিণ কৰে, কিন্তু বিদেশীৰ অবৈধ প্রব্রজনৰ ৰোধ কৰাৰ কথা নকয়৷ এওঁলোকে বাংলাদেশী মুছলমানক ঘিণ কৰে অথচ বাংলাদেশী মুছলমান কৃষক-শ্রমিকৰ ওপৰত নির্ভৰ নকৰাকৈ চলিব নোৱাৰে৷ এনে স্ব-বিৰোধমূলক দেশপ্রেমৰ আৱেগেৰে তেওঁলোকৰ জাতীয়তাবাদ– হিন্দুত্ববাদ৷ মুছলমান বিদ্বেষেই তেৰাসৱৰ জাতীয়তাবাদৰ আধাৰ৷ সেয়ে তেওঁলোকে অসম চুক্তিৰ সময়সীমা মনাটো দূৰৰ কথা, দেশ স্বাধীনতাৰ আগতে অসমত বসতি কৰা মুছলমানসকলকো গ্রহণ কৰিবলৈকো ইচছুক নহয়৷ আনকি তেওঁলোক ইমানেই মুছলিম বিদ্বেষী যে বাংলাদেশী মুছলমান আৰু দেশৰ খিলঞ্জীয়া মুছলমানৰ মাজতো কোনো পার্থক্য ৰাখিবলৈ ৰাজী নহয়৷ তেওঁলোকৰ যুক্তি এটাই– অসমত মুছলমানৰ সংখ্যা হিন্দুতকৈ বাঢ়িছে গতিকে মুছলমানক ৰোধ কৰিবলৈ হ’লে ৰাজ্যত হিন্দুৰ জনসংখ্যা বঢ়াব লাগিব৷ কিছু হিন্দুত্ববাদী বিজেপি- আৰ এছ এছ নেতাই ইয়াৰ সমাধানৰ উপায় হিচাপে হিন্দু নাৰীসকলক নিজকে সন্তান উৎপাদন কৰা যন্ত্রলৈ ৰূপান্তৰ কৰি যিমান পাৰে সিমান সন্তান জন্ম দিবলৈকো আহবান জনাইছিল৷ অসমত অৱশ্যে তেওঁলোকৰ হাতত অতিৰিক্ত সূত্র এটাও আছে৷ অসমত পূর্বৰে পৰা জমা হৈ আছে বিদেশীৰ ৰূপত এক বৃহৎসংখ্যক হিন্দু৷ ৰাইজে ভুল নকৰিব যে অসমত বসবাসকাৰী হিন্দুসকলৰ সমস্যাবোৰ বিজেপিয়ে মানৱীয় দৃষ্টিৰে চাইছে বা দেশহীন মানুহৰ দৃষ্টিৰেই বিচাৰ কৰিছে৷ বিজেপি শাসকৰ বাবে এইসকল বিদেশী হিন্দু কোনো ভুক্তভোগী মানৱ জীৱ নহয়, তেওঁলোক এটা ৰাজনৈতিক-সাম্প্রদায়িক শক্তিহে৷ বিজেপিৰ বাবে তেওঁলোক কেৱল এটা ধর্মাৱলম্বী সংখ্যা, ক্ষমতাৰ আহিলা, আৰু ৰাজনৈতিক প্রতিদ্বন্দ্বীৰ বিৰুদ্ধে বিজেপিৰ প্রতিৰোধৰ ঢাল৷ ধর্ম বিজেপিৰ বাবে আৰম্ভণিৰ পৰাই এক গুৰুত্বপূর্ণ হাতিয়াৰ হিচাপে ব্যৱহাৰ হৈ আহিছে৷ মানুহ নহয়, বিজেপিৰ বাবে জৰুৰী ধর্ম৷ আজি যদি কোনোবা হিন্দুই কিবা কথাত ভাল লাগি ইছলাম বা খ্রীষ্টান ধর্ম গ্রহণ কৰে বিজেপি শাসকে তেওঁকো বলিশাললৈ নিব৷ বাংলাদেশী কোনো হিন্দু পৰিয়ালৰ কোনো এজন সদস্যই যদি ইছলামত দীক্ষা লৈছে বিজেপি শাসকে তেওঁকো এৰি থৈ যাব৷ গতিকে বিজেপি শাসকৰ দ্বাৰা ৰাজনৈতিকভাৱে ব্যৱহূত হোৱাত বাদে হিন্দু বাংলাদেশীসকলৰ জীৱনৰ কোনো মূল্য নাই, কোনো ভৱিষ্যতো নাই৷ আমাৰ এক থলুৱা অত্যুৎসাহী ন-হিন্দুত্ববাদী মন্ত্রীয়ে নিসংকোচ- নির্ভয়ে ঘোষণা কৰিছে যে মুছলমানক ভেটিবই লাগিব৷ তেওঁৰ ভেটিব লাগিব বোলা কথাৰ অর্থ তেওঁলোকক হাতে-ভাতে মাৰিব লাগিব৷ তেওঁ দেশৰ সংবিধান পর্যন্ত মানিবলৈ অস্বীকাৰ কৰি কৈছে যে দেশত মানুহে ধর্মৰ ভিত্তিতে নাগৰিকত্বৰ অধিকাৰ লাভ কৰিব৷ তেওঁৰ বক্তব্য অনুসৰি এই অধিকাৰ আছে কেৱল হিন্দু ধর্মাৱলম্বীৰহে৷ বিজেপি শাসকে যে এইবোৰ কথা ক্ষমতাত বর্তি থকাৰ স্বার্থত কৈছে সেয়া সকলোৱে বুজা জৰুৰী৷ নাগৰিকপঞ্জী উন্নীতকৰণৰ সময়ত সকলোৱে গম পাইছে কমেও চল্লিছ লাখ বিদেশী মানুহে অসমত বসবাস কৰি আছে৷ আশংকা কৰা হৈছে যে আৰু এটা বৃহৎসংখ্যকে জালিয়াতিৰে নাম সুমুৱাইছে নাগৰিকপঞ্জীৰ খচৰাত৷ নাগৰিকপঞ্জীৰ কামত জড়িত কিছু চৰকাৰী লোকে কোৱা- কুই কৰা শুনিছোঁ যে ৰাজ্য চৰকাৰে হেনো বহু ঠাইত হিন্দু বাংলাদেশীক খচৰাত নাম সুমুৱাবলৈ সুযোগ উলিয়াই দিছে৷ ইফালে চৰকাৰৰ এক ভিতৰুৱা তথ্য অনুসৰি নাগৰিকপঞ্জীৰ খচৰাৰ পৰা বাদ যোৱাসকলৰ সিংহভাগেই হিন্দু বাংলাদেশী৷ যিহেতু বিজেপি শাসকৰ বাবে অসমৰ পৰা ইমানসংখ্যক বিদেশীক বিতাড়ন কৰাটো সম্ভৱ নহয়, গতিকে তেওঁলোকে হয়তো ভাবিছে যে ইয়াৰ মাজৰ পৰা বাছি বাছি হিন্দুসকলক উলিওৱা হওক আৰু নাগৰিকত্ব প্রদানৰ ছলেৰে ভোট বেংক হিচাপে প্রতিষ্ঠা কৰা যাওক৷ আগন্তুক নির্বাচনত যদি পুনৰ ক্ষমতালৈ আহিব লাগে তেন্তে এইটোৱেই বুধিমানৰ কাম বুলি ভাবি লৈছে বিজেপিয়ে৷ এতিয়া দাক্ষিণাত্য আৰু হিন্দী বলয়ত বিজেপিৰ ভেটিত খহনীয়া হোৱাত উত্তৰ-পূবৰ বিদেশী অধু্যষিত তিনিখন ৰাজ্য ক্রমে অসম, পশ্চিম বংগ, ত্রিপুৰাৰ মুঠ ৫৮খন লোক সভাৰ আসনক লৈ নতুন ৰণকৌশলৰ প্রয়োজন হৈছে বিজেপিৰ৷ কেৱল এইটো কাৰণতে হঠাৎ বিজেপিয়ে ওলোটা খৰ মাৰি বিদেশীক নাগৰিকত্ব দিবলৈ অস্থিৰ হৈ পৰিছে৷ ৰাইজে মনত ৰখা উচিত যে যোৱা বিধানসভা নির্বাচনৰ সময়ত বৰাকলৈ দলৰ প্রচাৰ চলাবলৈ আহি খোদ প্রধানমন্ত্রী নৰেন্দ্রমোদীয়ে কৈছিল ২০১৬ চনৰ ১৬ মে’ৰ পাছত সকলো বাংলাদেশীয়ে টালি- টোপোলা বান্ধিব লাগিব৷ সিদিনা প্রায় তিনি বছৰ পাছত তেওঁ পুনৰ বৰাকলৈ আহি কৈছে তাৰ ওলোটা এটা কথা– বিদেশীসকলৰ মাজৰ হিন্দুসকলক আশ্রয় দিয়াটো ৰাষ্ট্রৰ নৈতিক দায়িত্বহ্ল আৰম্ভণিতে বিজেপিয়ে অসমত হিন্দুত্ববাদী ৰাজনীতি নকৰিলেও চলি যাব বুলি ভাবিছিল৷ সেয়ে তেওঁলোকে যোৱা বিধানসভা নির্বাচনত ধর্মৰ ৰাজনীতিৰ পৰিৱর্তে জাতীয়তাবাদী ৰাজনীতিহে কৰিছিল৷ সর্বানন্দ সোণোৱাল বা অগপৰ মানুহবোৰক বিজেপিৰ সৈতে চামিল কৰাটো আছিল তেওঁলোকৰ এই ষ্ট্রেটেজীৰ অংশ৷ যোৱা বিধানসভা নির্বাচনত বিদেশী বহিষ্কৰণ বিজেপিৰ মূল প্রতিশ্রুতি আছিল৷ এই বিদেশীৰ মাজত হিন্দু বা মুছলমানৰ কথা কিন্তু নাছিল৷ কিন্তু প্রায় তিনি বছৰ পাছত মোদী, মোদী চৰকাৰ আৰু বিজেপি দলৰ দৃষ্টিভংগীৰ আকস্মিক পৰিৱর্তন ঘটিছে৷ এই পৰিৱর্তনৰ আঁৰত যে দলটোৰ নিজস্ব ৰাজনৈতিক লক্ষ্য-উদ্দেশ্য আছে সেই কথা সকলোৱে অনুধাৱন কৰা উচিত৷ ভাৰত এখন ধর্ম নিৰপেক্ষ দেশ৷ দেশ নির্মাতাসকলে এনেদৰে সংবিধানখন প্রণয়ন কৰিছিল যাতে ৰাষ্ট্রই ধর্মক নিৰপেক্ষ দৃষ্টিৰে চাবলৈ পাৰে আৰু ধর্মীয় সদ্ভাৱ-সম্প্রীতিৰে দেশৰ নাগৰিকসকলে বসবাস কৰিব পাৰে৷ দেশৰ ৰাজনীতিত সাম্প্রদায়িকতা বা জাত-পাত, ধর্মৰ ইছু্যবোৰ যে আগতে কেতিয়াও নাছিল এনে নহয়৷ কিন্তু কোনো চৰকাৰে এইবোৰক লৈ মুকলি ৰাজনীতি কৰা নাছিল৷ কোনো চৰকাৰে বিজেপিৰ দৰে এনেদৰে আইন-কানুন তৈয়াৰ কৰি ধর্মৰ ৰাজনীতি কৰা নাছিল, ধর্মৰ নামত মানুহক মুকলিকৈ এনেদৰে উচটনি দিয়া নাছিল আৰু ধর্মৰ নামত সমাজক ভাগ ভাগ কৰিব খোজা নাছিল৷ অসমত হঠাৎ বিজেপি শাসকে মানুহৰ মাজত বিদেশী ইছ৲ু্যটো ধর্মৰ প্রলেপ সানি ইয়াৰ গুৰুত্ব অন্যফালে ঢাল খুৱাবলৈ আপ্রাণ চেষ্টা চলাই গৈছে৷ কেৱল তাতেই ক্ষান্ত থকা নাই, অন্যান্য সকলো ক্ষেত্রতে মানুহৰ মাজত বিয়পাই দিবলৈ চেষ্টা কৰিছে মুছলিমবিদ্বেষ৷ অসমত মুছলিমৰ জীৱন যাত্রা, তেওঁলোকৰ ধর্মীয় ৰীতি-নীতি, সংস্কৃতি-খাদ্যাভ্যাসক লৈ কোনো হিন্দুই কেতিয়াও প্রশ্ন তোলা নাছিল৷ অসমীয়া হিন্দুৱে ঈদত বা ৰমজানৰ ঈফটাৰত মুছলমানৰ আতিথ্য গ্রহণ কৰাটো সহজাত কথা আছিল৷ এতিয়া এই সৌহার্দপূর্ণ সম্পর্কবোৰত গো মাংসৰ প্রসংগবোৰ টানি অনা হৈছে৷ জগাই তুলিব খাজা হৈছে গো মাংস বা মুছলমান খাদ্যাভ্যাসৰ প্রতি ঘৃণা- বিদ্বেষৰ ভাব৷ বিজেপি শাসকে টিভিৰ পর্ত ভুমুকি মাৰি কৈছে মুছলমানে বেয়া মাংস খায়, বেয়া মাংসৰ দোকান দিয়ে৷ শাসকৰ কথাৰ অর্থ বা উদ্দেশ্য স্পষ্ট, তেওঁলোকে বিচাৰিছে গো মাংসক লৈয়ো বিবাদ- বিতর্ক-বিৰোধিতাৰে ৰাজ্যত সাম্প্রদায়িক উত্তেজনাৰ সৃষ্টি হওক৷ বৃদ্ধি পাওক হিন্দু-মুছলমানৰ বিভাজন৷ যিমানে এই বিদ্বেষ-বিভাজন বৃদ্ধি পাব সিমানে নাগৰিকত্ব সংশোধনী বিধেয়কখনৰ প্রাসংগিকতা হিন্দু ৰাইজে অনুভৱ কৰিবলৈ ল’ব৷ তেতিয়া শাসকৰ বাবে সহজ হৈ পৰিব হিন্দুৰ নামত বাংলাদেশীক সংস্থাপন দি ভোটবেংক নির্মাণৰ পথ৷ দুর্ভাগ্যৰ কথা, বিজেপিৰ এনেবোৰ কুটিল সমাজ-বিধবংসী ষড়যন্ত্রবোৰ আংশিকভাৱে হ’লেও সফল হৈছে৷ একাংশ মানুহৰ মাজত সাম্প্রদায়িকতাৰ মনোভাব বাঢ়িছে৷ হিন্দুত্ববাদে প্রসাৰতা লভিছে৷ ব্রাহ্মণ্যবাদৰ পুনৰুত্থান ঘটিব ধৰিছে৷ আনকি উদ্বেগৰ কথা যে শংকৰদেৱে প্রতিষ্ঠা কৰা মূর্তি পূজাবিৰোধী একশৰণ বৈষ্ণৱ ধর্মৰ পীঠস্থানস্বৰূপ সত্র-নামঘৰসমূহতো ব্রাহ্মণ্যবাদী হিন্দু ধর্মৰ ছায়া আহি পৰিছে৷ এইবোৰ ঘটিব ধৰিছে অতি সন্তর্পণে শাসক বিজেপিৰ চক্রান্তৰ জৰিয়তে৷ পৰিণতিত মানুহৰ মাজত বিভাজন উকমুকাই উঠিছে৷ অসম এতিয়া ভয়াৱহ সন্ধিক্ষণৰ মুখত৷ বিজেপি শাসকৰ প্রচাৰ-যুক্তিত ভোল গ’লেই অগ্নিগর্ভা পৰিস্থিতিৰ সূচনা হ’ব৷ ৰাইজে দেশপ্রেম-জাতিপ্রেমৰ নামত বাঙালী হিন্দুয়েই হওক অথবা বাঙালী মুছলমানেই হওক যদি তেওঁলোকৰ ওপৰত খং-ক্ষোভ-ঘৃণা-বিদ্বেষ প্রকাশ কৰিবলৈ লয়, পৰিস্থিতি হৈ পৰিব মাৰাত্মক৷ বিজেপিয়ে জগাই তুলিব খোজা জাতিপ্রেমৰ এই আৱেগ ৰাইজে নিয়ন্ত্রণ কৰিবই লাগিব৷ ধর্মৰ নামত মানুহক মানুহৰ প্রতি ঘৃণা কৰিবলৈ শিকোৱাটো শাসকৰ এয়া ক্ষমতা দখলৰ নতুন কৌশল৷ আমি সদায় মনত ৰখা উচিত যে জীয়াই থকাৰ কোনো উপায় নোহোৱা হ’লেহে মানুহে মাতৃভূমি এৰি আন দেশত থিতাপি ল’বলৈ বাধ্য হয়৷ গতিকে প্রব্রজনৰ বিষয়সমূহ মানৱীয় সমস্যাৰূপে গণ্য কৰা উচিত৷ ৰাইজে ৰাজ্যৰ পৰিস্থিতিৰ বাবে সদায় শাসকক জবাবদিহি কৰা উচিত৷ অসমৰ প্রব্রজনজনিত সমস্যাসমূহৰ বাবে শাসকহে দায়ী, প্রব্রজনকাৰীসকল নহয়৷ প্রব্রজন ৰোধৰ বাবে বা বিদেশী বিতাড়নৰ বাবে শাসকে কেতিয়াও নিজৰ দায়িত্ব পালন নকৰিলে৷ যোৱা চল্লিছ বছৰে বিদেশী ইছু্যটোক ৰাজনৈতিক দলসমূহে ক্ষমতা প্রাপ্তিৰ জখলা হিচাপে ব্যৱহাৰ কৰি আহিল৷ ৰাইজে চকু মুদি বিজেপিক ব্যতিক্রম বুলি গণ্য কৰাৰো কোনো আৱশ্যক নাই৷ কেৱল এওঁলোকৰ কৌশলটো নতুন আৰু ওলোটা৷ বিজেপি শাসকে বিদেশী মুছলমানৰ সংখ্যাৰ সমতা আনিবলৈ হিন্দু বাংলাদেশীক অসমত সংস্থাপিত কৰিব খুজিছে৷ পিছে এইটো শিশুক আভুৱা-ভাঁৰা এটা যুক্তি৷ চৰকাৰে মুছলমান বাংলাদেশীক বিতাড়ন কৰক, তেতিয়া আমাক হিন্দু বাংলাদেশীৰো প্রয়োজন নোহোৱা হ’ব৷ চৰকাৰে আন্তর্তিক মহলৰ সহায় লৈ বাংলাদেশক বাধ্য কৰক তেওঁলোকৰ নাগৰিকসকলক ওভোতাই ল’বলৈ৷ যদি ভাৰত চৰকাৰৰ সেইখিনি কৰাৰ ক্ষমতা নাই, তেন্তে ধর্মৰ নামত ৰাজনীতি নকৰিব৷ বাংলাদেশীসকলৰ মাজৰ পৰা হিন্দুসকলক আপোন কৰি মুছলমানসকলক হিন্দুৰ শত্রুৰূপে জীয়াই ৰখাৰ পৰিণতিত এদিন অসমীয়া জাতি সাম্প্রদায়িক যুদ্ধৰ জুইত জাহ যাব৷ ৰাইজে আৱেগ সম্বৰণ কৰিব লাগিব৷ বিজেপিৰ প্রচাৰ-যুক্তিবোৰ আগপিছ নুগুণি তৎক্ষণাতে মানি ল’লে, পাছত ভুলৰ শুধৰণিৰ পথ বিচাৰি নাপাব৷ বিদেশী সমস্যাটোৰ সমাধানৰ ক্ষেত্রত মানৱতাবাদক উপেক্ষা কৰি যদি কিবা সিদ্ধান্ত লয়, তেন্তে তাৰ ভয়াৱহ প্রভাৱ চিৰকাল অসমীয়া সমাজত স্থায়ী হৈ ৰৈ যাব৷ হিন্দু-মুছলমান আৰু বাঙালী-অসমীয়াই অসমত চিৰকাল কাজিয়া-পেচাল কৰি কটাব লাগিব৷ এই সংঘাতৰ ফলত অৱধাৰিতভাৱে জনগোষ্ঠীসমূহেও একত্রে একাষৰীয়া হৈ সংঘাতৰ অংশীদাৰ হ’বলৈ বাধ্য হ’ব৷ মুঠৰ ওপৰত অসম হৈ পৰিব এনে এক সংঘর্ষজর্জৰ অশান্ত ভূমি, যাৰ কথা কল্পনা কৰিবলৈকো আমাৰ ভয় হৈছে৷ ফ’ন: ৯১০১৩-২২৫৭৭

দল-সংগঠনৰ দাবীক নস্যাৎ কৰি প্রধানমন্ত্রী নৰেন্দ্র মোদীয়ে শিলচৰত দৃঢ় প্রত্যয়ৰে ঘোষণা কৰিলে নাগৰিকত্ব সংশোধনী বিল ২০১৬ কার্যকৰী হ’বই৷ কথামতে কাম৷ জে পি চিয়ে নাগৰিকত্ব সংশোধনী আইনৰ সপক্ষত প্রতিবেদন দিলে আৰু কেন্দ্রীয় কেবিনেটত সেয়া আশানুৰূপভাৱে অনুমোদিত হ’ল৷ লোক সভাত গৃহীত হ’লেও ৰাজ্য সভাত কংগ্রেছে এই বিধেয়ক গৃহীত হোৱাত বাধা দিলে৷ বিজেপিৰ দৃষ্টিত দেশ ভাগ হোৱাৰ সময়ত পাকিস্তান, বাংলাদেশত যিসকল হিন্দু মানুহ দুর্ভাগ্যক্রমে ৰৈ গ’ল, তথা প্রতাৰিত হ’ল, সেইসকলৰ বাবে ভাৰতৰ দুৱাৰ খোলা৷ বহু আগতে এই আইন প্রযোজ্য হ’ব লাগিছিল৷ বিজেপিয়ে এই কাম যে সুচাৰুৰূপে কৰিব তাত কোনো দ্বিধা নাই৷ অৱশ্যে প্রধানমন্ত্রীৰ এই কথাত কোনো নতুনত্ব নাই৷ কাৰণ বিজেপি নেতৃত্বই হিন্দু-জৈন-বৌদ্ধসকলৰ বাবে ভাৰত ভূমিত নাগৰিকত্ব দিব বুলি নির্বাচনী ইস্তাহাৰত উল্লেখ কৰিছে৷ ভাৰতৰ ৰাজস্থান, পঞ্জাব, জম্মু কাশ্মীৰ, পশ্চিম বংগত কোনো প্রতিক্রিয়া সৃষ্টি নহ’ল়, কিন্তু অসম তথা উত্তৰ- পূর্বাঞ্চলত ইয়াৰ তীব্র প্রতিবাদ আৰম্ভ হৈছে৷ হোৱাটোও স্বাভাৱিক, কাৰণ বহু পূর্বৰ পৰাই এই অঞ্চলত বাংলাদেশৰ পৰা প্রব্রজন হোৱা বুলি জনমানসত নেতিবাচক প্রভাৱ বিদ্যমান৷ অসমত পূর্ববংগীয় মুছলিম তথা হিন্দুসকলৰ আগমনৰ ফলতে জনগাঁথনিৰো ব্যাপক পৰিৱর্তন হোৱা বুলি জাতীয়তাবাদী শিবিৰে মত প্রকাশ কৰিছে৷ অসম চুক্তি মতে ১৯৭১ চনৰ ২৫ মার্চৰ পিছত অহাসকল বিদেশী৷ এয়া সর্বদলীয়ৰ ঐক্যমত়, কিন্তু বিজেপিৰ মতে অসম চুক্তিৰ প্রাসংগিকতা নাই৷ অকল পূর্ববংগীয় মূলৰ মুছলিমসকলহে বিদেশী, হিন্দুসকল শৰণার্থী৷ সেয়ে বাংলাদেশৰ পৰা প্রতাৰিত বাঙালী হিন্দু আনি হিন্দুৰ হিত সাধন কৰিব৷ এওঁলোকৰ স্পষ্ট বক্তব্য– ভাৰত হিন্দুৰ বাসভূমি৷ পৃথিৱীৰ যি ঠাইতে হিন্দুসকল প্রতাৰিত হ’ব, ভাৰতে তেওঁলোকক আশ্রয় দিব৷ বিজেপিৰ নেতৃত্বই ভাৰত-পাকিস্তান ধর্মৰ ভিত্তিত বিভাজন হৈছে বুলি উল্লেখ কৰিছে৷ তদানীন্তন নেতৃত্বই ভাৰতক হিন্দু ৰাষ্ট্র নকৰাৰ ক্ষোভ আজিও তীব্রতৰ কৰি তুলিছে৷ সেয়ে তেওঁলোকে বর্তমান ক্ষমতা লাভ কৰাৰ পিছৰে পৰা হিন্দুত্ববাদী চিন্তা চেতনাৰ উন্মেষ নতুন ৰূপত শক্তিশালীভাৱে উপস্থাপন কৰিছে৷ এনে ধর্মীয় সংকীর্ণতাই ভাৰতৰ ধর্মনিৰপেক্ষ সত্তাটোক বাৰুকৈ আঘাত সানিছে৷ শেহতীয়াকৈ কেন্দ্র চৰকাৰৰ শেষ এশটা দিনত অধ্যাদেশ জাৰি কৰি হ’লেও বহিৰাগত হিন্দুক নাগৰিকত্ব দিয়াৰ পৃষ্ঠপোষকতা কৰিছে৷ অসমত বিজেপি চৰকাৰ আহিছিল জাতি-মাটি-ভেটিৰ শ্লে’গান আওৰাই৷ অসম আন্দোলনৰ একুৰিতকৈ বেছি নেতা এতিয়া বিজেপি চৰকাৰৰ মন্ত্রী, বিধায়ক৷ আছুৰ দ্বাৰা আখ্যায়িত জাতীয় নায়ক সর্বানন্দ সোণোৱাল স্বয়ং মুখ্যমন্ত্রীৰ আসনত৷ কিন্তু গেৰুৱা বসনধাৰী হোৱাৰ ফলত সকলো পৰিৱর্তন হ’ল৷ জাতীয়তাবাদীৰ সলনি এতিয়া ৰাষ্ট্রবাদী৷ ভবাধৰণে বিদেশীৰ সংজ্ঞাও সলনি হ’ল৷ পূর্ববংগীয় মূলৰ মুছলিমসকলক জোৰপূর্বক বাংলাদেশীৰ লেবেল লগোৱাৰ অহৰহ প্রচেষ্টাত ব্রতী গেৰুৱা শিবিৰে হিন্দু বাংলাদেশীক নাগৰিকত্ব দি হিন্দুক সুৰক্ষিত কৰিব খুজিছে বুলি প্রচাৰ চলাইছে৷ মুছলমিসকলৰ সংখ্যা বঢ়াৰ প্রতি লক্ষ্য কৰি অসম দ্বিতীয় কাশ্মীৰ হ’ব বুলি অপপ্রচাৰ চলাইছে৷ কিন্তু হিন্দু বাংলাদেশীৰ নাগৰিকত্ব প্রদানে যে অসমক দ্বিতীয় ত্রিপুৰাত পৰিণত কৰিব সেই সম্পর্কত শাসক বাহিনী মৌন৷ অসমৰ ভাষা-সংস্কৃতি, পৰম্পৰা, কৃষ্টি সকলো সংকটত পৰিব, সেই বিষয়ত নিমাতসকলে ভোট বেংকৰ স্বার্থত কেন্দ্রই জাপি দিয়া প্রস্তাৱক চকু মুদি মানি লৈছে৷ আৰম্ভণিৰে পৰা চৰকাৰৰ বিৰুদ্ধে মাত মতা জাতীয় সংগঠন, নাগৰিক সমাজ, শিল্পী-বুদ্ধিজীৱী তথা আন জনতাই ব্যাপক প্রতিবাদী কার্যসূচী পালন কৰি আহিছ়ে, কিন্তু একো এটাই কাম দিয়া নাই৷ ৰোম জ্বলিছে আৰু সম্রাট নিৰোই নিৰলে বাঁহী বজোৱাৰ দৰে অন্য মনস্কতা প্রদর্শন কৰা সর্বানন্দ সোণোৱালো অসম জ্বলিছে, কিন্তু তেওঁ নির্বাক হৈ আছে৷ কৃষক মুক্তি সংগ্রাম সমিতি, আছু, অসম জাতীয়তাবাদী যুৱ-ছাত্র পৰিষদ, জনগোষ্ঠীয় ছাত্র সংগঠন, আমছু আদিৰ তীব্র প্রতিবাদত একপ্রকাৰ মুখথেকেচা খাইছে বিজেপি নেতৃত্ব৷ যুৱ ছাত্র পৰিষদ, কৃষক মুক্তিৰ আমৰণ অনশন, নগ্ন প্রতিবাদে সচেতন মহলক বৰকৈ জোকাৰি গৈছে৷ অসম গণ পৰিষদে অসমৰ বৃহৎ জনগণৰ আস্থা ঘূৰাই অনাৰ স্বার্থতে জাতিধবংসী বিধেয়কখনৰ বিৰোধিতা কৰি আহিছিল, সেয়াও চৰকাৰৰ অংশীদাৰ হৈ৷ সময় কিন্তু ৰৈ নাথাকিল়, কাৰণ প্রধানমন্ত্রীৰ ৰাজহুৱা ঘোষণাৰ পিছতে অসমত হুৱাদুৱা লাগিল৷ সর্বত্র প্রতিবাদৰ লেলিহান জুয়ে চৌদিশ কঁপাই তোলাৰ সময়তে অগপত ভয়াৱহ পৰিস্থিতিৰ সৃষ্টি হ’ল৷ জে পি চিয়ে একপক্ষীয়ভাৱে প্রতিবেদন দিয়াৰ পিছতে সংসদত নাগৰিকত্ব বিল গৃহীত হোৱাৰ প্রাক মুহূর্তত অগপই বিজেপিৰ লগত মিত্রতা ভংগ কৰিলে৷ মেঘালয়ৰ মুখ্যমন্ত্রী কনৰাড চাংমাই এন ডি এৰ পৰা সমর্থন প্রত্যাহাৰ কৰিলে৷ আজিৰ সময়ত উত্তৰ-পূর্বাঞ্চলৰ ৰাজনীতিত দুয়োটা ঘটনাই নিশ্চিতভাৱে ৰাজনৈতিক ভূমিকম্পৰ সৃষ্টি কৰিছে৷ অস্তিত্বৰ সংকটত ভোগা জাতিক উদ্ধাৰৰ স্বার্থত ঐক্যবদ্ধভাৱে ওলাই অহা দল-সংগঠনসমূহে বিজেপিৰ প্রতাৰণাৰ কিদৰে প্রত্তুতৰ দিয়ে সেয়া সময়ে ক’ব৷ সৰল অর্থত অসমত অসমীয়াৰ প্রভুত্ব থকাটো প্রতিজন অসমীয়াই বিচাৰে৷ এই আৱেগ- অনুভূতিৰ বিপৰীত দিশত কাম কৰা দল-সংগঠনসমূহে পদে পদে বিপদাপন্ন কৰি তুলিছে অসমীয়াৰ অস্তিত্ব৷ ভাষা-সংস্কৃতিৰ প্রতি নমাই আনিছে সংকট৷ সেয়া লাগিলে গ্রুপিঙৰ সময় হওক, ভাষা আন্দোলনৰ সময় বা মাধ্যমৰ আন্দোলনৰ সময়ছোৱাই হওক, কেন্দ্রই বৈষম্যৰ সৃষ্টিহে কৰিছে৷ প্রতিক্রিয়াশীল চক্রই প্রতিনিয়ত অসমৰ প্রতি কৰি আহিছে ৰাজনৈতিক ষড়যন্ত্র৷ কেন্দ্র চৰকাৰৰ মাহী আইৰ দৃষ্টি আৰু ৰাজ্য চৰকাৰৰ নেতৃত্বৰ দুর্বলতাই অসমক বাৰে বাৰে প্রতাৰণাৰ বলি কৰি আহিছে৷ এনে ষড়যন্ত্র প্রবল ৰূপত দেখা পোৱা যায় সাধাৰণ নির্বাচনৰ সময়ত৷ কাৰণ প্রতিটো দলৰে আছে ভোট লাভালাভৰ অংশ৷ এইবেলিও ইয়াৰ ব্যতিক্রম নহয়৷ তৎসত্ত্বেও আমি উপলব্ধি কৰিছোঁ কেন্দ্রৰ মোদী চৰকাৰ আৰু ৰাজ্যখনৰ সোণোৱাল চৰকাৰে সকলো সীমা চেৰাই থলুৱাৰ আৱেগ-অনুভূতিক অৱজ্ঞা কৰি অসমীয়া জাতিক নিঃশেষ কৰাৰ সুপৰিকল্পিত ষড়যন্ত্রত লিপ্ত হৈছে৷ অসমত অদূৰ ভৱিষ্যতে অসমীয়াসকল দ্বিতীয় শ্রেণীৰ নাগৰিকত পৰিণত হ’ব, তাৰ ভেটি নির্মাণ প্রক্রিয়া আৰম্ভ কৰাত যে আজিৰ চৰকাৰ দায়ী সেয়া জলজল পট পট৷ সংখ্যাগুৰু জনগণৰ আস্থাক নস্যাৎ কৰাটোৱে অগণতান্ত্রিকতাৰ পৰিচায়ক৷ এই বিশ্বাসঘাতকতাৰ যোগ্য প্রত্তু্যত্তৰ অসমীয়াই আগন্তুক লোক সভাৰ নির্বাচনতে যে দিব সেয়া অতি স্পষ্ট৷ বিজেপিয়ে জাপি দিয়া সর্বকালৰ জাতিধবংসী বিধেয়ক বিজেপিৰ বাবে যে কাল হ’ব সেয়া নিশ্চিত৷ ফ’ন : ৮৪৮৬৫-৯৯৮১৯