কংগ্ৰেছে গঠন কৰিলে বৰপেটা জিলা পৰিষদ, সভানেত্ৰী হিচাপে নিৰ্বাচিত হ’ল বিধায়ক শুকুৰ আলী আহমেদৰ পত্নী নাজিমা আহমেদ

বহু প্ৰতীক্ষাৰ অন্তত আজি আনুষ্ঠানিকভাৱে গঠন কৰা হ’ল বৰপেটা জিলা পৰিষদ ৷ ২৯খন জিলা পৰিষদৰ ভিতৰত ২২খন আসনতে কংগ্ৰেছ দলৰ সদস্য জয়ী হৈ নিজৰ দখললৈ আনিবলৈ সক্ষম হয় বৰপেটা জিলা পৰিষদ৷ মহিলাৰ বাবে সংৰক্ষিত জিলা পৰিষদখনৰ সভানেত্ৰী হিচাপে নিৰ্বাচিত হয় কংগ্ৰেছ দলৰ প্ৰাৰ্থী নাজমা আহমেদ৷

চেঙা সমষ্টিৰ কংগ্ৰেছ বিধায়ক শুকুৰ আলী আহমেদৰ পত্নী নাজিমা আহমেদ সমষ্টিটোৰ খোলাবান্ধা জিলা পৰিষদৰ পৰা নিৰ্বাচিত হৈ আহিছিল ৷ আনহাতে, নৱগঠিত বৰপেটা জিলা পৰিষদৰ উপ-সভাপতি হিচাপে নিৰ্বাচিত হয় ছামচুল হক ৷

এই উপলক্ষ্যে আজি বৰপেটা জিলা উপায়ুক্ত কাৰ্যালয়ৰ সভাকক্ষত শপত গ্ৰহণ অনুষ্ঠানৰ আয়োজন কৰা হয়৷ বৰপেটা জিলাৰ উপায়ুক্ত মুনীন্দ্ৰ শৰ্মাৰ উপস্থিতিত অনুষ্ঠিত এই অনুষ্ঠানত জিলা পৰিষদৰ সভানেত্ৰী হিচাপে কংগ্ৰেছৰ জিলা পৰিষদৰ সদস্যা নাজিমা আহমেদৰ লগতে ২৫গৰাকী জিলা পৰিষদৰ বিজয়ী সদস্যই শপত গ্ৰহণ কৰে৷ লক্ষণীয়ভাৱে আজিৰ এই শপত গ্ৰহণ অনুষ্ঠানত উপস্থিত নাথাকিলে বজালী মহকুমাৰ বিজেপিৰ তিনি গৰাকী বিজয়ী সদস্য ৷

আনহাতে, শপত গ্ৰহণ অনুষ্ঠানত সৰভোগ সমষ্টিৰ বিধায়ক তথা ৰাজ্যিক বিজেপিৰ সভাপতি ৰঞ্জ‌িত দাস আৰু বৰপেটা সদৰ সমষ্টিৰ বিধায়ক গুণীন্দ্ৰ নাথ দাসৰ বাদে চেঙা সমষ্টিৰ বিধায়ক শুকুৰ আলী আহমেদ, বাঘবৰ সমষ্টিৰ বিধায়ক শ্বেৰমান আলী, জনিয়া সমষ্টিৰ বিধায়ক আব্দুল খালেক, সৰুক্ষেত্ৰী সমষ্টিৰ বিধায়ক জাকিৰ হুছেইন শিকদাৰ আৰু আঞ্চলিক পঞ্চায়তৰ সভাপতিসকল উপস্থিত থাকে ৷

বৰপেটা জিলা পৰিষদৰ সভানেত্ৰী হিচাপে শপত গ্ৰহণ কৰি নাজমা আহমেদে সংবাদ মাধ্যমেৰে হোৱা সাক্ষাত্কাৰত তেওঁ জিলাখনৰ বান আৰু গৰাখহনীয়া সমস্যাকে বিশেষ গুৰুত্ব প্ৰদান কৰাৰ লগতে মহিলা সবলীকৰণৰ ক্ষেত্ৰতো ব্যৱস্থা গ্ৰহণ কৰিব বুলি উল্লেখ কৰে৷ উল্লেখ্য যে, বৰপেটা জিলা পৰিষদৰ ২৯টা সমষ্টিৰ ভিতৰত কংগ্ৰেছে লাভ কৰিছিল ২২টা সমষ্টি ৷ আনহাতে বিজেপিয়ে ৬ টা, আৰু নিৰ্দলীয়ই ১টা সমষ্টি লাভ কৰিছিল ৷ যোৱাবাৰ এ আই ইউ ডি এফে গঠন কৰিছিল বৰপেটা জিলা পৰিষদ ৷

লক্ষ্যনীয়ভাৱে এইবাৰৰ পঞ্চায়ত নিৰ্বাচনত জিলাখনৰ কোনো এটা জিলা পৰিষদ সমষ্টিতেই এ আই ইউ ডি এফৰ প্ৰাৰ্থী জয়ী হ’ব নোৱাৰিলে৷ আনহাতে এইবাৰ অসম গণ পৰিষদৰো এগৰাকীও নিৰ্বাচিত সদস্য নাই বৰপেটা জিলা পৰিষদত ৷