জিলা কম্পিউটাৰ কেন্দ্ৰ, তিনিচুকীয়াত এমট্ৰনৰ অধ্যক্ষ ৰমেন্দ্ৰ নাৰায়ন কলিতাৰ পৰিদৰ্শন

তিনিচুকীয়া,১ ডিচেম্বৰ: জিলা কম্পিউটাৰ কেন্দ্ৰ, তিনিচুকীয়াত এমট্ৰন [অসম ইলেকট্ৰনিক্স উন্নয়ন নিগম পৰিসীমিত]ৰ অধ্যক্ষ ৰমেন্দ্ৰ নাৰায়ন কলিতাই পৰিদৰ্শন কৰাৰ লগতে কেন্দ্ৰই আয়োজন কৰা আদৰণি অনুষ্ঠান অংশগ্ৰহণ কৰি বক্তব্য ৰাখে৷ তথ্য-প্ৰযুক্তি শিক্ষাৰ ক্ষেত্ৰত এমট্ৰনলোৱা পদক্ষেপৰ জৰিয়তে ছাত্ৰ-ছাত্ৰীসকলে যাতে সকলো ধৰণৰ সময়সাপেক্ষ কম্পিউটাৰ শিক্ষা গ্ৰহণ কৰিব পাৰে, তাৰ লক্ষ্য ৰাখি পাঠ্যক্ৰম প্ৰস্তুত কৰি আগবঢ়োৱাৰ কথা জানিবলৈ দিয়াৰ লগতে এমট্ৰনে তথা-প্ৰযুক্তিক্ষেত্ৰলৈ আগবঢ়োৱাৰ আঁচনি, প্ৰশিক্ষণ, তথ্যকেন্দ্ৰ আদিৰে কথাও ছাত্ৰ ছাত্ৰীৰ আগত সদৰী কৰে৷

এমট্ৰনে দূৰসঞ্চাৰ আৰু তথ্য-প্ৰযুক্তি সম্বন্ধীয় সেৱা প্ৰদানৰ ক্ষেত্ৰত ১৯৮৪ চনৰ পৰাই উত্তৰ-পূৱ ভাৰতৰ সেৱা আগবঢ়াই আহিছে বুলি উল্লেখ কৰি তিনিচুকীয়া তথা ডিব্ৰুগড়ৰ জিলা কম্পিউটাৰ কেন্দ্ৰই আগবঢ়োৱা সেৱাই যে দুয়োখন জিলাৰ শিক্ষাৰ্থীসকলে চৰকাৰী তথা বে-চৰকাৰী খণ্ডত কৰ্মসংস্থাপন পাবলৈ সক্ষম হোৱা বিষয়টোও উল্লেখ কৰে৷ এমট্ৰনৰ পৰিকল্পনা তথা কৰ্মসূচীয়ে ভৱিষ্যততে অধিক স্ব-নিয়োজন আৰু সংস্থাপনৰ দিশত বাট মুকলি কৰিব সেই কথাও তেখেতে বক্তব্য ৰাখে৷

অনুষ্ঠানত জিলা কম্পিউটাৰ কেন্দ্ৰ, অসমৰ পৰামৰ্শদাতা বসন্ত কুমাৰ বৰঠাকুৰে কেন্দ্ৰ সমূহৰ পৰিচালনাৰ বাবে গুৰুত্বপূৰ্ণ পৰামৰ্শ আগবঢ়োৱাৰ লগতে শিক্ষাৰ্থী তথা শিক্ষকক সকলৰ সৈতে মত বিনিময় কৰে৷ জিলা কম্পিউটাৰ কেন্দ্ৰৰ পৰামৰ্শদাতা বসন্ত কুমাৰ বৰঠাকুৰে কেন্দ্ৰটি পৰিচালনাৰ ক্ষেত্ৰত কোনো ধৰণৰ ক্ৰটি যাতে আহি নপৰে, সেই সন্দৰ্ভত কেন্দ্ৰৰ কৰ্মকৰ্তাৰ সৈতে আলোচনাৰ লগতে পৰামৰ্শ আগবঢ়ায়৷ অনুষ্ঠানৰ আদৰণি ভাষণ পুষ্প গগৈয়ে আগবঢ়াই আৰু কাৰ্যসূচী পৰিচালনা কৰে৷ অনুষ্ঠানত মেঘালী দাসৰ বৰগীত, দেৱৰ্ষী দিহিঙীয়াই আধুনিক গীত পৰিৱেশন কৰে৷ শেষত পুষ্প গগৈয়ে শলাগ জ্ঞাপন কৰে।