গান্ধী মণ্ডপত অনুষ্ঠিত হ’ব মুখ্যমন্ত্ৰী ড৹ হিমন্ত বিশ্ব শৰ্মা চৰকাৰৰ কেবিনেট বৈঠক

গুৱাহাটী,৬ ডিচেম্বৰ:এইবাৰ পোন প্ৰথমবাৰৰ বাবে গুৱাহাটীৰ গান্ধী মণ্ডপত অনুষ্ঠিত হ’ব মুখ্যমন্ত্ৰী ড৹ হিমন্ত বিশ্ব শৰ্মা চৰকাৰৰ কেবিনেট বৈঠক ৷ ব্যতিক্ৰমী পদক্ষেপেৰে সংবাদ মাধ্যমৰ লগতে সৰ্বসাধাৰণৰ দৃষ্টি কাঢ়িবলৈ সক্ষম হোৱা ৰাজ্য চৰকাৰখনে বিগত সময়চোৱাত গুৱাহাটীৰ বাহিৰে ৰাজ্যখনৰ বিভিন্ন জিলাত কেবিনেট বৈঠকবোৰ আয়েজিত কৰি অহা পৰিলক্ষিত হৈছে ৷ ৰাজধানী দিছপুৰস্থিত জনতা ভৱনৰ পৰিৱৰ্তে ৰাজ্যখনৰ বিভিন্ন স্থানৰ লগতে ৰাজ্যৰ বাহিৰতো অনুষ্ঠিত কৰা পৰিলক্ষিত হৈছে কেবিনেট বৈঠক ৷গুৱাহাটীৰ ঐতিহ্যমণ্ডিত গান্ধী মণ্ডপত বুধবাৰে অনুষ্ঠিত হ’ব পৰৱৰ্তী কেবিনেট বৈঠকখন ৷ ইয়াকে লৈ ব্যস্ততা বৃদ্ধি পোৱা পৰিলক্ষিত হৈছে ৰাজ্য চৰকাৰখনৰ ৷

সমাগত কেবিনেট বৈঠকখনৰ বাবেই যুদ্ধকালিন প্ৰস্তুতি তুংগত উঠিছে ৰাজ্য চৰকাৰ তথা বিভাগীয় বিভাগ সমূহৰ ৷ মুখ্যমন্ত্ৰী, কেবিনেট মন্ত্ৰী সকল, মুখ্য সচিব সমন্বিতে ৰাজ্য প্ৰশাসনৰ শীৰ্ষ আমোলাসকলক কেবিনেটৰ বাবে আদৰিবলৈ মহানগৰীখনক সুন্দৰকৈ সজাই পৰাই তোলাৰ বাবে তৎপৰ হৈছে ৰাজ্যৰ প্ৰশাসন ৷ ৰাস্তা-ঘাটকে ধৰি চৌদিশে আটকধুনীয়াকৈ সজাই পৰাই তুলিবলৈ যত্নপৰ হোৱা পৰিলক্ষিত হৈছে গুৱাহাটী মহানগৰখনক ৷