সহস্ৰাধিক দলীয় নেতা-কৰ্মীক লগত লৈ দলৰ পৰা আঁতৰি যোৱাৰ হুংকাৰ অংকিতা দত্তৰ

গুৱাহাটী,১৬ ডিচেম্বৰ:অসম প্ৰদেশ যুৱ কংগ্ৰেছৰ সভানেত্ৰী পদৰ পৰা অংকিতা দত্তক অপসাৰণ কৰা বিষয়টো এতিয়াও অস্পষ্ট হৈ আছে । অসমত কংগ্ৰেছৰ ভাৰত জোড়ো যাত্ৰাৰ বৃহস্পতিবাৰে সামৰণিৰ দিনা অংকিতা দত্তক প্ৰদেশ যুৱ কংগ্ৰেছৰ সভানেত্ৰী পদৰ পৰা অপসাৰণ কৰাৰ খবৰ ওলাইছিল । আনকি এই সন্দৰ্ভত অংকিতা দত্তই প্ৰতিক্ৰিয়াও ব্যক্ত কৰিছিল ।

দলৰ বাবে ভাল কাম কৰাৰ বাবেই তেওঁক এনেদৰে অপসাৰণ কৰা বুলি সংবাদ মাধ্যমৰ আগত প্ৰতিক্ৰিয়া ব্যক্ত কৰিছিল অংকিতা দত্তই । প্ৰদেশ যুৱ কংগ্ৰেছৰ সাংগঠনিক নিৰ্বাচনৰ বাবে সদস্য পদ ঘোষণাৰ বাবে ৰাজীৱ ভৱনত সংবাদমেল আয়োজন কৰা বুলি তেওঁ মেইল লাভ কৰাৰ কথা ব্যক্ত কৰে অংকিতা দত্তই । অৱশ্যে কোনে ইয়াৰ আয়োজন কৰিছে সেই বিষয়ে তেওঁ অজ্ঞতা প্ৰকাশ কৰে ।

অংকিতা দত্তই এই কাৰ্যক অপমানজনক আখ্যা দি সহস্ৰাধিক দলীয় নেতা-কৰ্মীক লগত লৈ দলৰ পৰা আঁতৰি যোৱাৰো হুংকাৰ দিছিল । এই সমগ্ৰ বিষয় সংবাদ মাধ্যমযোগে ৰাজহুৱা হোৱাৰ পাছত প্ৰদেশ কংগ্ৰেছৰ তৰফৰ পৰা প্ৰতিক্ৰিয়া প্ৰকাশ কৰা হয় । এক বিবৃতিযোগে প্ৰদেশ কংগ্ৰেছৰ মিডিয়া বিভাগৰ অধ্যক্ষ মনজিৎ মহন্তই কয় যে অসম যুৱ কংগ্ৰেছৰ সভানেত্ৰীৰ সম্পৰ্কত একাংশ সংবাদ মাধ্যমে এক অপপ্ৰচাৰ চলাই আছে বুলি প্ৰদেশ কংগ্ৰেছৰ সভাপতি ভূপেন কুমাৰ বৰাই জানিবলৈ দিছে ।

প্ৰদেশ কংগ্ৰেছৰ এনে বিবৃতিৰ বিপৰীতে শুকুৰবাৰে অংকিতা দত্তই নিজৰ প্ৰতিক্ৰিয়া ব্যক্ত কৰে । অংকিতাই কয় যে,"আমাক অন্ধকাৰত ৰাখি এই কাম কিয় কৰা হৈছে ? আমাৰ মান-সন্মান নাই নেকি বুলিও তেওঁ প্ৰশ্ন কৰে । কংগ্ৰেছৰ ভিতৰত বহুত মানুহ কিনি থোৱা আছে বুলিও তেওঁ অভিযোগ কৰে । আগলৈয়ো কংগ্ৰেছৰ হৈ কাম কৰি যোৱাৰ কথা ব্যক্ত কৰি তেওঁ কয় যে প্ৰদেশ যুৱ কংগ্ৰেছৰ তত্বাবধায়ক হিচাবে বৰ্ধন যাদৱক দায়িত্ব দিয়া হৈছে । যিজন বৰ্ধন যাদৱৰ বিৰুদ্ধে আছে কেলেংকাৰীৰ অভিযোগ ।"