ৰৱাব টেঙাৰ বাকলিৰ পৰা অসমীয়া কেন্দী প্ৰস্তুত কৰা প্ৰকল্পৰে যোৰহাটৰ নীহাৰ ৰাষ্ট্ৰীয় পৰ্য্যায়লৈ নিৰ্বাচিত 

যোৰহাট,১৯ ডিচেম্বৰ: ৩০ সংখ্যক ৰাষ্ট্ৰীয় শিশু বিজ্ঞান সমাৰোহৰ তেজপুৰত অনুষ্ঠিত ৰাজ্যিক সমাৰোহত যোৰহাট জিলাৰ পৰা বনাই উচ্চ মাধ্যমিক বিদ্যালয়ৰ নৱম শ্ৰেণীৰ নীহাৰ দত্তই ৰাষ্ট্ৰীয় পৰ্য্যায়ত অংশ গ্ৰহণৰ কাৰণে নিৰ্বাচিত হৈছে।

ৰৱাব টেঙাৰ বাকলিৰ পৰা অসমীয়া কেন্দী প্ৰস্তুত কৰা প্ৰকল্পৰে তেওঁ ৰাষ্ট্ৰীয় পৰ্য্যায়লৈ নিৰ্বাচিত হয়। তেওঁৰ প্ৰকল্পৰ তত্বৱধায়ক বিদ্যালয়খনৰ শিক্ষক প্ৰাঞ্জল বৰা আৰু সহযোগী আছিল অবিনাশ তামুলী।উল্লেখ্য,যোৰহাটৰ পৰা এঘাৰ জন শিশু বিজ্ঞানীয়ে এঘাৰতা প্ৰকল্প  ৰাজ্যিক সমাৰোহত উপস্থাপন কৰিছিল।সমাৰোহত ৩১খন জিলাৰ ২৭১টা প্ৰকল্প  উপস্থাপন হৈছিল আৰু ২৬ টা প্ৰকল্প ৰাষ্ট্ৰীয়  পৰ্য্যায়লৈ নিৰ্বাচিত হয়।

যোৰহাট জিলাৰ সমন্বয়ক ধীৰেন্দ্ৰ কুমাৰ গগৈ আৰু শৈক্ষিক সমন্বয়ক হেমেন কুমাৰ শইকীয়াৰ তত্বাৱধানত যোৱা শিশু বিজ্ঞানীসকল হ'ল বনাই হাইস্কুলৰ   নীহাৰ দত্ত,শ্ৰৱন্তীৰাণী  শৰ্মা, টিয়ক জ্যোতি বিদ্যাপীঠৰ অৰিন্দমপ্ৰান শইকীয়া,মহেশ্বৰ বৰকটকী উচ্চতৰ মাধ্যমিক বিদ্যালয়ৰ অনন্যা গগৈ,নকছাৰী উচ্চতৰ মাধ্যমিক বিদ্যালয়ৰ ফাৰনাজ বেগম,বামুনপুখুৰী  হাইস্কুলৰ ঈশানজ্যোতি হাজৰিকা,কেন্দুগুৰি জাতীয় বিদ্যালয়ৰ অলিম্পিয়া বৰা, অনুসূচীত  জাতি নেপালী জনজাতি হাইস্কুলৰ ৰাহুল ছেত্ৰী, পি এম ঢলাজান উচ্চ মাধ্যমিকৰ দীপ্তি ৰজক,সীমান্তৱৰ্তী জনজাতীয় হাইস্কুলৰ বিজয়ন্তি ওৰাং আৰু ফুলবাৰী হাইস্কুলৰ বিকাশ শইকীয়া। যোৰহাট জিলা দলটোৰ তত্ববধায়ক শিক্ষক ৰূপে বনাই আৰু মহেশ্বৰ বৰকটকী বিদ্যালয়ৰ শিক্ষক প্ৰাঞ্জল বৰা,ৰশ্মিৰেখা ভৰালীয়ে দায়িত্ব বহন কৰিছিল।উল্লেখ্য,ৰাষ্ট্ৰীয় পৰ্য্যায়ৰ শিশু বিজ্ঞান সমাৰোহ ২৭-৩১ জানুৱাৰীলৈ আহমেদাবাদত অনুষ্ঠিত হ'ব।