প্রধানমন্ত্ৰী নৰেন্দ্ৰ মোদীয়ে আজি বিশ্বৰ দীৰ্ঘতম নৌকা বিহাৰৰ শুভাৰম্ভ কৰিব

গুৱাহাটী,১৩ জানুৱাৰী:প্রধানমন্ত্ৰী নৰেন্দ্ৰ মোদীয়ে আজি বিশ্বৰ দীৰ্ঘতম ৰিভাৰ ক্রুজ অর্থাৎ নৌকা বিহাৰৰ শুভাৰম্ভ কৰিব। শুভাৰম্ভণি অনুষ্ঠানত উত্তৰ প্ৰদেশৰ মুখ্যমন্ত্রী যোগী আদিত্য নাথ আৰু কেন্দ্ৰীয় বন্দৰ জাহাজ পৰিবহন আৰু জলপথ মন্ত্ৰী সৰ্বানন্দ সোণোৱাল উপস্থিত থাকিব। বাৰাণসীৰ পৰা ডিব্ৰুগড়লৈ আহিবলগীয়া এম ভি গংগা বিলাস নামৰ অত্যাধুনিক জাহাজখনৰ ৫১ দিনীয়া এই নৌকা যাত্ৰাত অংশগ্ৰহণৰ বাবে ছুইজাৰলেণ্ডৰ ৩৬ গৰাকী পৰ্যটক ইতিমধ্যে বাৰাণসীত উপস্থিত হৈছে। এই জাহাজখনে বাৰাণসীৰ পৰা ডিব্ৰুগড়লৈ ২৮টা নদী প্ৰণালীৰ মাজেৰে সুদীৰ্ঘ ৩ হাজাৰ ২০০ কিলোমিটাৰতকৈ অধিক দূৰত্ব অতিক্ৰম কৰিব। জাহাজখন যাত্ৰাকালত ৫০টাৰো অধিক পর্যটনস্থলীত ৰ'ব। 

এই পর্যটনস্থলীসমূহত বিভিন্ন সাংস্কৃতিক অনুষ্ঠানৰ আয়োজন কৰা হৈছে। স্থানীয় প্রশাসনে এই অনুষ্ঠানৰ প্ৰস্তুতি প্রায় সম্পূৰ্ণ কৰি তুলিছে। এই যাত্ৰাই ভাৰত-বাংলাদেশ উভয়কে বিশ্বৰ ৰিভাৰ ক্রুজ মানচিত্ৰত অন্তৰ্ভুক্ত কৰিব। কেন্দ্ৰীয় বন্দৰ জাহাজ পৰিবহন আৰু জলপথ মন্ত্ৰী সৰ্বানন্দ সোণোৱালে এই নৌকা যাত্ৰাৰ সন্দৰ্ভত কৈছে যে ইয়াৰ জৰিয়তে কর্মসংস্থান সৃষ্টিতো বিশেষ সহায় লাভ কৰা হ'ব। তদুপৰি দেশৰ পৰ্যটন খণ্ডৰ বিকাশ আৰু উন্নয়নৰ দিশটো ই অৰিহণা যোগাব বুলি তেওঁ আশা প্ৰকাশ কৰে। উল্লেখযোগ্য যে প্রধানমন্ত্ৰী নৰেন্দ্ৰ মোদীয়ে আজি ভার্চুৱেল ব্যৱস্থাৰে সাগৰীয় দক্ষতা বিকাশ কেন্দ্ৰ গুৱাহাটীৰ উদ্বোধন কৰিব।