মালয়েছিয়া অপেনত ভাৰতৰ নিৰাশা প্ৰথম ৰাউণ্ডৰ পৰাই বাহিৰ ছাইনা-শ্রীকান্ত

গুৱাহাটী,১১ জানুৱাৰী:বেডমিণ্টন জগতত হতাশজনক প্রদর্শন অব্যাহত আছে শীৰ্ষ ভাৰতীয় শ্বাটলাৰ ছাইনা নেহৱাল আৰু কিদাম্বী শ্রীকান্তৰ। চলিত বৰ্ষৰ প্ৰথমখন প্রতিযোগিতা মালয়েছিয়া অপেন ছুপাৰ ১০০০ত প্ৰথম ৰাউণ্ডৰ পৰাই বাহিৰ হয় ছাইনা-শ্রীকান্ত। দুবাৰৰ কমনৱেল্‌ল্থ গেমছ চেম্পিয়ন তথা অলিম্পিক মেডেলিষ্ট ছাইনা চীনৰ হান ইউৰ হাতত ধৰাশায়ী হয়। চীনৰ তাৰকাগৰাকীয়ে এসময়ত বেডমিণ্টন জগতত দপদপাই থকা ছাইনাক ১২-২১, ২১-১৭, ১২-২১ ব্যৱধানত পৰাস্ত কৰে। প্ৰথমটো ছেটত পৰাজিত হোৱাৰ পিছত বিশ্বৰ ৩০ সংখ্যক শ্বাটলাৰ ছাইনাই দ্বিতীয় ছেটত উভতি ধৰে যদিও অন্তিম ছেটত প্ৰদৰ্শন কৰাত ব্যৰ্থ হয়। 

ইয়াৰ লগে লগে বিগত বৰ্ষৰ দৰে চলিত বৰ্ষতো হতাশজনক আৰম্ভণি অব্যাহত থাকে ছাইনাৰ। আনহাতে, বিশ্বৰ প্ৰাক্তন শীৰ্ষস্থানৰ তাৰকা কিদান্ধীৰ প্ৰদর্শন ছাইনাতকৈও অত্যন্ত নিৰাশজনক আছিল। বিশ্বৰ ত্ৰয়োদশ স্থানৰ কিদাম্বী জাপানৰ কেণ্টা নিছিমোটোৰ হাতত ২১-১৯, ২১-১৪ ছেটৰ ব্যৱধানত পৰাস্ত হৈ প্রতিযোগিতাৰ প্ৰথম ৰাউণ্ডতে বাহিৰ হ'বলৈ বাধ্য হয়। সমান্তৰালভাৱে মহিলাৰ একক শাখাত আকর্ষী কাশ্যপো চাইনিজ টাইপেইৰ বেন চি ছুৰ হাতত ধৰাশায়ী হয়।