৮২৮ গৰাকী প্ৰাৰ্থীক ৰাজ্য চৰকাৰৰ বিভিন্ন বিভাগত নিযুক্তি পত্ৰ প্ৰদান

গুৱাহাটী,১৯ জানুৱাৰী :এক লাখ নিযুক্তি দিয়াৰ প্ৰতিশ্ৰুতি পূৰণৰ দিশত আৰু এখোজ আগবাঢ়িল অসম চৰকাৰ । শেহতীয়াকৈ ৩৯,৬৭৪ গৰাকী প্ৰাৰ্থীৰ বিভিন্ন বিভাগত নিযুক্তি দিয়াৰ পাছত বৃহস্পতিবাৰে অসম চৰকাৰে নতুনকৈ ৮২৮ গৰাকী প্ৰাৰ্থীক ৰাজ্য চৰকাৰৰ বিভিন্ন বিভাগত নিযুক্তি পত্ৰ প্ৰদান কৰে । এই উপলক্ষে শ্ৰীমন্ত শংকৰদেৱ কলাক্ষেত্রৰ প্ৰেক্ষাগৃহত আয়োজন কৰা অনষ্ঠানত স্বাস্থ্য মন্ত্রী কেশৱ মহন্তই অংশ গ্ৰহণ কৰি নিযুক্তি পত্র প্ৰদান কৰে ।

অসম চৰকাৰৰ চাৰিটা বিভাগত ৮২৮ গৰাকী প্ৰাৰ্থীক নিযুক্তি পত্র প্ৰদানঅসম চৰকাৰৰ চাৰিটা বিভাগত ৮২৮ গৰাকী প্ৰাৰ্থীক নিযুক্তি দিয়া হয় । ইয়াৰ ভিতৰত স্বাস্থ্য আৰু পৰিয়াল কল্যাণ বিভাগত মুঠ ৫৭৫ গৰাকী প্ৰাৰ্থীক নিযুক্তি পত্ৰ প্ৰদান কৰা হয়। ইয়াৰে চিকিৎসা আৰু স্বাস্থ্য বিষয়া-১ত ৫৪১ গৰাকীক আৰু খাদ্য সুৰক্ষা বিষয়া পদত ৩৪ গৰাকীক নিযুক্তি দিয়া হয় । আনহাতে চিকিৎসা শিক্ষা আৰু গৱেষণা বিভাগত চিকিৎসক (পঞ্জীয়ক/ডেমনষ্ট্ৰেটৰ) পদত মুঠ ২৩৬ গৰাকীক নিযুক্তি দিয়াৰ লগতে ভূমি সংৰক্ষণ বিভাগত সহকাৰী ভূমি সংৰক্ষণ বিষয়া পদত মুঠ ১৩ গৰাকীক নিযুক্তি পত্ৰ দিয়া হয় ।

সেইদৰে জলসম্পদ বিভাগত তৃতীয় বৰ্গৰ শাখা সহায়ক পদত ৪ গৰাকীক নিযুক্তি পত্ৰ দিয়া হয় । নিযুক্তি পত্র প্ৰদান কৰি দিয়া ভাষণত স্বাস্থ্যমন্ত্রী কেশৱ মহন্তই কয় যে এক লাখ নিযুক্তি প্ৰদান প্ৰক্ৰিয়াৰ অংশ হিচাপে বৃহস্পতিবাৰে অসম চৰকাৰৰ চাৰিটা বিভাগৰ অধীনত ৮২৮ গৰাকী যুৱক-যুৱতীৰ মাজত নিযুক্তি পত্ৰ বিতৰণ কৰা হয় ।নিযুক্তিপ্ৰাপ্ত সকলৰ ভিতৰত স্বাস্থ্য বিভাগৰ ৫৪১ গৰাকী চিকিৎসক আৰু ৩৪ গৰাকী খাদ্য সুৰক্ষা বিষয়া, চিকিৎসা শিক্ষা আৰু গৱেষণা বিভাগত ২৩৬ গৰাকী চিকিৎসকৰ লগতে ভূমি সংৰক্ষণ বিভাগত ১৩ গৰাকী সহকাৰী ভূমি সংৰক্ষণ বিষয়া আৰু জল সম্পদ বিভাগত ৪ গৰাকী শাখা সহায়ক (তৃতীয় বৰ্গ) নিযুক্তি দিয়া হয় ।মুখ্যমন্ত্ৰী ড৹ হিমন্ত বিশ্ব শৰ্মাৰ সৱল নেতৃত্বত নিযুক্তিপ্ৰাপ্তসকলকে ধৰি এতিয়ালৈকে মুঠ ৪০,৫০২ গৰাকীক নিযুক্তি প্ৰদান কৰা হৈছে । প্ৰথম বাৰৰ বাবে একেলগে ৭৭৭ গৰাকী চিকিৎসকক নিযুক্তি দিয়া হৈছে বুলিও উল্লেখ কৰি মন্ত্রীগৰাকীয়ে ।

নিযুক্তি পোৱা চিকিৎসকলক নিষ্ঠাৰে নিজৰ দায়িত্ব পালন কৰাৰ বাবে আহ্বান জনায় মন্ত্ৰীগৰাকীয়ে । নিযুক্তিৰ যোগেদি চিকিৎসালয়সমূহত থকা চিকিৎসকৰ অভাৱ বহু পৰিমাণে দূৰ হ'ল বুলি উল্লেখ কৰি মন্ত্রীগৰাকীয়ে কয় যে পূৰ্বে ১০১ খন চিকিৎসালয়ত এজনো চিকিৎসক নাছিল ।