গণৰাজ্য দিৱস বৰ্জনৰ আহ্বানেৰে পূৰ্বৰ দৰেই এইবাৰো আহিল আলফাৰ প্ৰেছ বিবৃতি

গুৱাহাটী,২৪ জানুৱাৰী:মাত্ৰ এদিনৰ পিচতে দেশৰ ৭৪ সংখ্যক গণৰাজ্য দিৱস ৷ গণৰাজ্য দিৱস বৰ্জনৰ আহ্বানেৰে পূৰ্বৰ দৰেই এইবাৰো আহিল আলফাৰ প্ৰেছ বিবৃতি । এইবাৰো ২৬ জানুৱাৰী বৰ্জনৰ আহ্বান জনাইছে পৰেশ বৰুৱা নেতৃত্বাধীন সংযুক্ত মুক্তি বাহিনী অসম (স্বাঃ)ৰ লগতে এনএছচিএন/জিপিআৰএনয়ে ৷ কেপ্তেইন ৰুমেল অসম স্বাক্ষৰিত এক যৌথ বিবৃতি যোগে আলফাৰ লগতে আটাইকেইটা সংগঠনে জনাইছে এই আহ্বান ৷

প্ৰায় প্ৰতিবাৰৰ দৰেই এইবাৰো অসম আৰু নগালেণ্ড বন্ধৰ আহ্বান জনাইছে সংগঠন দুটাই ৷ আলফাই ২৬ জানুৱাৰীৰ নিশা ১২ বজাৰ পৰা আবেলি ৬ বজালৈ এই বন্ধৰ আহ্বান জনাইছে ৷ এই বন্ধত আলফাই জৰুৰীকালীন বিভাগবোৰ, সংবাদমাধ্যম আৰু ধৰ্মীয় কাম-কাজ অব্যাহত ৰখাত কোনো বাধা নিষেধ নাথাকিব বুলি বিবৃতিটোত জনাইছে ৷ পূৰ্বৱৰ্তী সময়বোৰৰ দৰেই ৰাজহুৱা স্থান, চৰকাৰী-বেচৰকাৰী কাৰ্যালয়তো গণৰাজ্য দিৱস প্ৰত্যাখান কৰিবৰ বাবে আহ্বান আলফা স্বাধীনৰ ৷

১৯৭৯ চনত স্বাধীন অসম গঢ়ি তোলাৰ বাবে এক সশস্ত্ৰ সংগ্ৰামৰ লক্ষ্যৰে আৰম্ভ কৰা আলফাই স্বাধীনতা দিৱস আৰু গণৰাজ্য দিৱস উদযাপন বৰ্জন কৰি আহিছে আৰু সেই দিনবোৰত হিংসাত্মক কাৰ্যকলাপত লিপ্ত হৈ আহিছে । ইফালে, আলফা স্বাধীন আলোচনাৰ মেজলৈ আহিব লাগে বুলি ৰাজ্যত ৰাজ্য চৰকাৰ আৰু আন একাংশ লোকৰ উদ্যোগত জনমত গঢ়াৰ চেষ্টা অব্যাহত আছে ৷ লগতে আলোচনাৰ মেজলৈ আহিবলৈ ৰাজ্যৰ মুখ্যমন্ত্ৰী ড৹ হিমন্ত বিশ্ব শৰ্মাই আহ্বানো জনাইছে পৰেশ বৰুৱাৰ প্ৰতি ৷