সদৌ অসম সোনোৱাল কছাৰী ছাত্ৰ সন্থাৰ মানকটা সমিতিৰ পঞ্চম দ্বি-বাৰ্ষিক অধিৱেশনৰ আয়োজন

গুৱাহাটী,২৬ জানুৱাৰী:সদৌ অসম সোনোৱাল কছাৰী ছাত্ৰ সন্থাৰ মানকটা আঞ্চলিক সমিতিৰ পঞ্চম দ্বি-বাৰ্ষিক অধিৱেশনখনি অহা ২৮ জানুৱাৰী শনিবাৰে নিজমানকটা সোনোৱাল সাংস্কৃতিক ভৱনত দিনজোৰা কাৰ্যসূচীৰে অনুষ্ঠিত হ'ব। সেইদিনা দিনৰ ১০ বজাত আঞ্চলিক সমিতিখনৰ সভাপতি জয়দীপ সোনোৱালে পতাকা উত্তোলনেৰে কাৰ্যসূচীৰ শুভাৰম্ভ কৰিব। ১০- ৩০ বজাত স্মৃতি তৰ্পণ, ১১ বজাত প্ৰতিনিধি সভা। আবেলি ৩-৩০ বজাত সোনোৱাল কছাৰী সাংস্কৃতিক নৃত্য প্রদর্শন। ৪ বজাত অনুষ্ঠিত হ'ব মুকলি সভা। 

সদৌ অসম সোনোৱাল কছাৰী ছাত্ৰ সন্থাৰ সাধাৰণ সম্পাদক বুধিন সোনোৱালে নির্দিষ্ট বক্তা হিচাপে অংশগ্ৰহণ কৰিবলগীয়া সভাখনত সংগঠনটোৰ কেন্দ্ৰীয় সভাপতি ৰতন কছাৰী, কেন্দ্ৰীয় মন্ত্ৰী সৰ্বানন্দ সোনোৱাল, লাহোৱালৰ বিধায়ক বিনোদ হাজৰিকা, অসম জাতীয় পৰিষদৰ সভাপতি লুৰীণজ্যোতি গগৈ, প্রাক্তন বিধায়ক ঋতুপৰ্ণ বৰুৱাই সভাত মুখ্য অতিথি হিচাপে অংশগ্রহণ কৰিব। সন্ধিয়ালৈ অনুষ্ঠিত হ'ব সাংস্কৃতিক অনুষ্ঠান। সোনোৱাল কছাৰী স্বায়ত্তশাসিত পৰিষদৰ মুখ্য কাৰ্যবাহী সদস্য টংকেশ্বৰ সোনোৱালে উদ্বোধন কৰিবলগীয়া উক্ত সাংস্কৃতিক অনুষ্ঠাত শিল্পী দিগন্ত গোহাঁয়ে অনুষ্ঠান পৰিৱেশন কৰিব। ইতিমধ্যে উদ্যাপন সমিতিয়ে অধিৱেশনখনি সফল ৰূপায়ণ কৰিবৰ বাবে প্ৰস্তুতি সম্পন্ন কৰিছে।