ভাঙোনমূখী সমাজ ব্যৱস্থাক ভাওনা সংস্কৃতিৰ জৰিয়তে ঐক্যবদ্ধ কৰাৰ প্ৰয়াস মৰিগাঁও শিক্ষা বিভাগৰ

মৰিগাঁও,২৭ জানুৱাৰী ঃ মহাপুৰুষ শ্ৰীমন্ত শংকৰদেৱৰ অপূৰ্ব সৃষ্টি ভাওনা সংস্কৃতিৰ জৰিয়তে অসমীয়া সমাজ ব্যৱস্থাক ঐক্যবদ্ধ কৰা প্ৰয়াসেৰে মৰিগাঁও জিলা শিক্ষা বিভাগৰ বিষয়া কৰ্মচাৰী আৰু শিক্ষক সমাজে বিগত বৰ্ষসমূহত শ্ৰী শ্ৰী সৰস্বতী পূজাৰ লগতে অসমীয়া ভাওনা অনুষ্ঠিত কৰি আহিছে।

পূৰ্বৰ পৰম্পৰা ৰক্ষা কৰি এইবাৰো শ্ৰী শ্ৰী সৰস্বতী পূজা আৰু গণৰাজ্য দিৱসটি উদযাপন কৰাৰ লগতে জিলা শিক্ষা বিভাগৰ বিষয়া কৰ্মচাৰী আৰু শিক্ষক সমাজৰ সমন্বিতে নিশা অনুষ্ঠিত কৰে অসমীয়া ভাওনা। ভাওনা সংস্কৃতিৰ জৰিয়তে অসমীয়া সমাজ জীৱনৰ ঐতিহ্য উদ্ধাৰ কৰা,সদভাৱ-সম্প্ৰীতি,সহিষ্ণুতা গুণ বৃদ্ধি কৰিবলৈ প্ৰয়াস কৰা মৰিগাঁও জিলা শিক্ষা বিভাগৰ বিষয়া বুলি গগৈ ভূঞাৰ নেতৃত্বত নিশা জিলা শিক্ষা বিষয়া কাৰ্যালয়ত শিক্ষা বিভাগৰ বিষয়া কৰ্মচাৰী আৰু শিক্ষক সমাজৰ সমন্বিতে অনুষ্ঠিত কৰে সীতা হৰণ বালী বধ ভাওনা। শিক্ষক ৰাজীৱ বৰাৰ পৰিচালনাত মাজুলীৰ কলা কৌশলীৰ আৰ্হিত জিলা শিক্ষা বিভাগৰ বিষয়া কৰ্মচাৰী আৰু শিক্ষক শিক্ষয়িত্ৰী সকলৰ দক্ষতা সম্পন্ন অভিনয়ে মন্ত্ৰমুগ্ধ কৰি তোলে মৰিগাঁওবাসীক ।

দিনটোৰ কৰ্ম ব্যস্ততাৰ মাজতেই ছাত্ৰ ছাত্ৰীক জ্ঞানৰ পোহৰ সন্ধান দিয়া,কাৰ্যালয়ৰ ব্যস্ততাক নেওচি নিজৰ মাজত লুকাই থকা প্ৰতিভাক ৰাইজৰ আগত প্ৰদৰ্শন কৰি প্ৰতিজন অভিনয় কৰা শিল্পীয়ে দৰ্শকৰ সমাদৰ লাভ কৰিবলৈ সক্ষম হয়। ভাওনা উপভোগ কৰিবলৈ অহা প্ৰতিজন লোকেই প্ৰশংসাৰে উপচাই পেলায় শিল্পী কলা কৌশলী সকলক।শিক্ষক আৰু কৰ্মচাৰীৰ মাজত থকা ব্যৱধান হ্ৰাস কৰি গুণগত শিক্ষাই মৰিগাঁৱত যেন এক নতুন ধাৰা সৃষ্টি কৰিবলৈ সক্ষম হয়,সেই উদ্দেশ্য আগত ৰাখি জিলা শিক্ষা বিভাগে এই ব্যৱস্থা গ্ৰহণ কৰা বুলি মন্তব্য কৰিছে জিলা শিক্ষা বিষয়া বুলি গগৈ ভূঞাই।

দিনৰ ভাগত পুৱা গণৰাজ্য দিৱসৰ পতাকা উত্তোলন কাৰ্যসূচী শুভৰাম্ভ কৰাৰ পিছতেই শ্ৰী শ্ৰী সৰস্বতী পূজাৰ পূজা অৰ্চনা কাৰ্যসূচী অনুষ্ঠিত কৰে। নিশা শিক্ষক কৰ্মচাৰী সমন্বয়ে অনুষ্ঠিত হোৱা "সীতা হৰণ বালী বধ" ভাওনা উদ্বোধন কৰে মৰিগাঁও জিলা উপায়ুক্ত দেৱাশীষ শৰ্মাই। সৰ্বশিক্ষা অভিযানৰ জিলা আঁচনি বিষয়া লক্ষীনন্দন শইকীয়াই আঁত ধৰা অনুষ্ঠানটোত আৰক্ষী অধীক্ষক হেমন্ত কুমাৰ দাস,জিলা শিক্ষা বিষয়া বুলি গগৈ ভূঞা,মৰিগাঁও জিলা সাংবাদিক সংস্থাৰ সভাপতি বিৰিঞ্চি কুমাৰ শৰ্মা,সম্পাদক জিতুমনি নাথ,জ্যেষ্ঠ সাংবাদিক অজিত শৰ্মা,ৰাতুল ডেকা,অসম উন্নতি সভাৰ সম্পাদক অতনু শৰ্মা,সদৌ অসম হাইস্কুল শিক্ষক সন্থাৰ যুটীয়া সম্পাদক অনিল নাথ,চৰাইবাহী উচ্চতৰ মাধ্যমিক বিদ্যালয়ৰ অধ্যক্ষা ৰেখা গোহাঁই,জিলা প্ৰাথমিক শিক্ষা বিভাগৰ জ্যেষ্ঠ পৰিসংখ্যা বিষয়া আবুল কালাম আজাদকে আদি কৰি শিক্ষা বিভাগৰ বিষয়া সকলে অংশ গ্ৰহণ কৰে।

লক্ষীনন্দন শইকীয়া,অঞ্জন কুমাৰ শইকীয়া,নৰোত্তম নাথ কাকতি,সুনীল ভৰালী,বিৰাজ কুমাৰ ডেকা,ৰাজদ্বীপ নাথৰ ব্যৱস্থাপনাত অনুষ্ঠিত ভাওনাত শিক্ষা বিভাগৰ বিষয়া কৰ্মচাৰী আৰু শিক্ষক -শিক্ষয়িত্ৰী সকলৰ সুন্দৰ অভিনয়ে প্ৰতিজন দৰ্শকৰ প্ৰশংসা বুটলিবলৈ সক্ষম হয়। শিল্পী সুলভ অভিনয়ে দৰ্শকৰ মন জয় কৰিবলৈ সক্ষম হোৱা শিক্ষক শিল্পী সকলৰ ভিতৰত আছে ৰাম ৰাজু মেধী,লক্ষ্মণ বিষ্ণু বৰা,বালী অপূৰ্ব বৰদলৈ,সুগ্ৰীৱ প্ৰমোদ মেধী,হনুমান সিদ্ধাৰ্থ শংকৰ ডেকা,অংগদ হিমাংশু মেধী,ৰাৱণ প্ৰশান্ত নাথ,মাৰিছ ৰাজেন গোস্বামী,মায়াৱন্ত পুলক বৰদলৈ, দুন্দুভি প্ৰবীণ গগৈ। স্ত্ৰী চৰিত্ৰত অভিনয় কৰা শিল্পী সকল হৈছে সীতা ছানী বৰুৱা,মন্দোদৰী সংগীতা বৰদলৈ,শূপৰ্নখা কুইন দেৱী আৰু তাৰা হীৰামনি বৰা।###