ত্ৰিপুৰা নিৰ্বাচনঃ বিজেপিয়ে ঘোষণা কৰিলে প্ৰথমখন প্ৰাৰ্থীৰ তালিকা, বাদ পৰিল ৬ জন বিধায়ক

গুৱাহাটী, ২৮ জানুৱাৰীঃ ত্ৰিপুৰা ভাৰতীয় জনতা পাৰ্টীয়ে শনিবাৰে ৪৮ জনীয়া প্ৰাৰ্থীৰ প্ৰথমখন তালিকা ঘোষণা কৰে, য'ত ৬ জন বৰ্তমানৰ বিধায়কক বাদ দিয়ে আৰু ১১ গৰাকী মহিলা প্ৰাৰ্থীক প্ৰাৰ্থীত্ব প্ৰদান কৰা হয়। প্ৰথম তালিকা অনুসৰি, যোৱা বছৰ মে'ত প্ৰাক্তন মুখ্যমন্ত্ৰী বিপ্লব কুমাৰ দেৱক শীৰ্ষ পদৰ পৰা অপসাৰণ কৰাৰ পিছত যোৱা বছৰ জুনত ৰাজ্যিক বিধানসভালৈ নিৰ্বাচিত হোৱা মুখ্যমন্ত্ৰী মানিক সাহাই বৰদোৱালী আসনৰ পৰা প্ৰতিদ্বন্দিতা কৰিব।

কেন্দ্ৰীয় মন্ত্ৰী প্ৰতিমা ভৌমিক, যি ২০১৮ চনৰ বিধানসভা নিৰ্বাচনত প্ৰাক্তন মুখ্যমন্ত্ৰী আৰু চিপিআই-এম নেতা মানিক সৰকাৰৰ বিৰুদ্ধে প্ৰতিদ্বন্দিতা কৰিছিল, একেটা ধনপুৰ সমষ্টিৰ পৰা নিৰ্বাচনত নামিব। ত্ৰিপুৰা ৰাজ্যিক বিজেপিৰ সভাপতি ৰাজীৱ ভট্টাচাৰ্যই বানামালিপুৰ আসনৰ পৰা প্ৰথমবাৰৰ বাবে প্ৰতিদ্বন্দিতা কৰিব, য'ৰ পৰা প্ৰাক্তন মুখ্যমন্ত্ৰী আৰু ৰাজ্যসভাৰ বৰ্তমানৰ সদস্য বিপ্লব কুমাৰ দেৱ ২০১৮ চনৰ বিধানসভা নিৰ্বাচনত নিৰ্বাচিত হৈছিল।

শুকুৰবাৰে নতুন দিল্লীত বিজেপিত যোগদান কৰা চিপিআই-এমৰ বৰ্তমানৰ বিধায়ক মোবোছাৰ আলীয়ে উত্তৰ ত্ৰিপুৰাৰ তেওঁৰ পুৰণি সমষ্টি কৈলাচাহাৰৰ পৰা প্ৰতিদ্বন্দিতা কৰিব, য'ৰ পৰা তেওঁ ২০১৮ চনৰ নিৰ্বাচনত বাওঁদলৰ টিকটত প্ৰথমবাৰৰ বাবে ৰাজ্যিক বিধানসভালৈ নিৰ্বাচিত হৈছিল।

ইপিনে, বিজেপিয়ে ছয়জন বৰ্তমানৰ বিধায়ক- অৰুণ চন্দ্ৰ ভৌমিক (বেলোনিয়া), বিপ্লব ঘোষ (মাতাবাৰী), সুভাষ দাস (নলচাৰ), মিমি মজুমদাৰ (বধৰঘাট) বীৰেন্দ্ৰ কিশোৰ দেব্বাৰ্মা (গোলাঘাটি) আৰু পৰিমল দেব্বাৰ্মা (অম্বাচা)ক টিকট দিয়া নাই। মুখ্যমন্ত্ৰী মানিক সাহা আৰু উপ মুখ্যমন্ত্ৰী জিষ্ণু দেৱ বৰ্মাকে ধৰি আটাইকেইজন মন্ত্ৰীয়ে তেওঁলোকৰ নিজ নিজ সমষ্টিৰ পৰা দলৰ টিকট লাভ কৰিছে। অৱশ্যে, সূৰ্যমণি নগৰৰ মন্ত্ৰী ৰাম প্ৰসাদ পলৰ সমষ্টিত প্ৰাৰ্থীৰ নাম প্ৰথম তালিকাত ঘোষণা কৰা হোৱা নাই। বিজেপি প্ৰাৰ্থীৰ প্ৰথমখন তালিকাত প্ৰায় ১৫ জন নতুন প্ৰাৰ্থীয়ে স্থান লাভ কৰিছে।

আনহাতে, ৰাজ্যিক বিজেপিৰ সভাপতি ৰাজীৱ ভট্টাচাৰ্যই কৈছে যে, "১২ জন প্রার্থীৰ নামৰ সৈতে দ্বিতীয়খন তালিকা শীঘ্ৰেই ঘোষণা কৰা হ'ব।"