পঞ্জাৱৰ প্ৰাক্তন ভাৰতীয় হকী খেলুৱৈয়ে জীৱিকা নিৰ্বাহৰ বাবে হাতত তুলি ল'লে বস্তা

গুৱাহাটী,৩০ জানুৱাৰী:ক্ৰীড়াই কেতিয়াবা আমাক সুন্দৰ অতীতৰ পৰা এটি অবাস্তৱ বৰ্তমানলৈ ঠেলি দিয়ে । ভাৰতৰ বহু খেলুৱৈয়ে বঁটা, সন্মান আৰু উন্নত জীৱনশৈলীৰে ভৰা এটি ক্ৰীড়া কেৰিয়াৰৰ অন্ত পেলালেও কঠিন জীৱনে এজন প্ৰাক্তন ভাৰতীয় হকী খেলুৱৈৰ জীৱনলৈ নমাই আনিছে অমানিশা । ৩০ বছৰীয়া পৰমজীত কুমাৰ ভাৰতীয় ক্ৰীড়া প্ৰাধিকৰণ, পেপছু আৰু পঞ্জাৱ হকী দলৰ অংশ আছিল আৰু চাৰিখন জুনিয়ৰ হকী ৰাষ্ট্ৰীয় খেলত পদক লাভ কৰাৰ লগতে ২০০৭ চনত ভাৰতীয় জুনিয়ৰ হকী দলতো নাম অন্তৰ্ভুক্ত হৈছিল যদিও এতিয়া তেওঁ জীৱিকা নিৰ্বাহৰ বাবে হাতত তুলি লৈছে বস্তা।

কুমাৰে দিনটোত পায় মাত্ৰ ৫০ টকা। প্ৰতিটো বস্তা লোড আৰু আনলোড কৰাৰ বাবে তেওঁ পায় ১.২৫ টকা । শেহতীয়াকৈ পৰমজীত কুমাৰে এক মত বিনিময় অনুষ্ঠানত কয় যে ঘৰত প্ৰায়ে প্লাষ্টিকৰ হকী ষ্টিক আৰু বল লৈ খেলা পুত্ৰক তেওঁ উন্নত জীৱন দিব বিচাৰে, সেই বাবে তেওঁ এনে কাম কৰি আছে । “হকীৰ সৈতে মোৰ সম্পৰ্কৰ বিষয়ে বহুতে নাজানে, কিন্তু চিনাকি হ’লে মোৰ পিঠিত থপৰিয়াই দিয়ে। হকীৰ পৰা সেইটোৱেই একমাত্ৰ পুৰস্কাৰ৷ ঘৰলৈ উভতি আহোঁতে মোৰ পাঁচ বছৰীয়া ল’ৰা বিক্ৰান্তক দেখোঁ আৰু মই তাক প্লাষ্টিকৰ হকী ষ্টিক আৰু এটা বল লৈ খেলিবলৈ দিওঁ। মোৰ যিয়েই নহওক, মই বিচাৰো যে সি সেইটো সলনি কৰক।’

পঞ্জাৱৰ ফৰিদকোটৰ বাসিন্দা পৰমজীত কুমাৰে চৰকাৰী বিজেন্দ্ৰ মহাবিদ্যালয়ত প্ৰশিক্ষক বাল্টেজ ইন্দেপাল সিং বাবীৰ সৈতে হকী খেলিবলৈ আৰম্ভ কৰে। পিছত তেওঁ বলজিন্দৰ সিঙৰ পৰা প্ৰশিক্ষকতা লয়। ২০০৪ চনত পাটিয়ালাৰ এন আই এছত ভাৰতীয় ক্ৰীড়া প্ৰাধিকৰন প্ৰশিক্ষণ কেন্দ্ৰত প্ৰশিক্ষন গ্ৰহণ কৰাৰ বাবে নিৰ্বাচিত হয় ।

পাটিয়ালাত থকা সময়ছোৱাত কুমাৰে ১৬ আৰু ১৮ বছৰ অনুৰ্ধ হকী নেশ্যনেলত এছ এ আই কম্বাইণ্ড দলৰ অংশ আছিল য’ত দলটোৱে অন্ধ্ৰ প্ৰদেশৰ গুণ্টুৰত অনুষ্ঠিত ১৬ বছৰ অনুৰ্ধ ৰাষ্ট্ৰীয় পৰ্যায়ত ৰূপৰ পদক লাভ কৰিছিল। ইয়াৰ উপৰিও তেওঁ পেপছু দল আৰু পঞ্জাৱ দলৰ হৈ দুখন ৰাষ্ট্ৰীয় মেচত খেলিছিল আৰু ২০০৭ চনত বাংলাদেশত অনুষ্ঠিত হ’বলগীয়া জুনিয়ৰ এছিয়া কাপৰ নামেৰে নামাকৰণ কৰা ভাৰতীয় জুনিয়ৰ দলৰ অংশও আছিল।প্ৰশাসনিক কাৰণত প্ৰতিযোগিতাখন বাতিল কৰা হৈছিল । ২০১২ চনত কুমাৰে বাওঁহাতত আঘাত পাই এবছৰৰো অধিক সময় খেলৰ পৰা জিৰণি লৈছিল। আঘাতৰ পিছত পুনৰ ঘূৰি আহি ৰাজ্যিক পৰ্যায় আৰু স্থানীয় পৰ্যায়ত খেলিছিল। ২০১৫ চনত তেওঁ খেলৰ পৰা ছুটী লৈ শ্ৰমিক হিচাপে কাম কৰিবলৈ আৰম্ভ কৰে।