অহা ২ আৰু ৩ ফেব্ৰুৱাৰীত জি-টুৱেণ্টিৰ দুখন গুৰুত্বপূৰ্ণ সভা অনুষ্ঠিত হ'ব গুৱাহাটীত

গুৱাহাটী,১ ফেব্ৰুৱাৰী:ৰাজ্য চৰকাৰে গুৱাহাটীত আয়োজিত জি-টুৱেণ্টিৰ প্ৰথম বহনক্ষম বিত্তীয় কৰ্মগোটৰ সভা আৰু ৱাই- টুৱেণ্টিৰ প্ৰাৰম্ভিক সভাত অংশগ্ৰহণ কৰিবলগীয়া প্ৰতিনিধিসকলক আদৰিবলৈ সাজু হৈছে। গুৱাহাটীৰ এখন ব্যক্তিগত হোটেলত অহা ২ আৰু ৩ ফেব্ৰুৱাৰীত জি-টুৱেণ্টিৰ দুখন গুৰুত্বপূৰ্ণ সভা অনুষ্ঠিত হ'ব। দুদিনীয়া কাৰ্যসূচীৰে অনুষ্ঠিত হ'বলগীয়া এই সভা দুখনত জি-টুৱেণ্টিৰ সদস্য ৰাষ্ট্ৰ, অতিথি ৰাষ্ট্ৰ আৰু বিভিন্ন আন্তঃৰাষ্ট্ৰীয় সংস্থাৰ ৯৪ গৰাকী প্ৰতিনিধিয়ে অংশগ্ৰহণ কৰিব। সভা দুখনত ভাৰত চৰকাৰৰ বিষয়াসকলেও অংশগ্ৰহণ কৰিব। জি-টুৱেণ্টি সন্মিলনৰ লগত সংগতি ৰাখি ৭ আৰু ৮ ফেব্ৰুৱাৰীত উত্তৰ গুৱাহাটীৰ ভাৰতীয় প্ৰযুক্তিবিদ্যা প্রতিষ্ঠান চমুকৈ আই আই টিত অনুষ্ঠিত হ'বলগীয়া জি-টুৱেণ্টিৰ যুৱ সন্মিলনত ৰাজ্যৰ বিভিন্ন শিক্ষানুষ্ঠানৰ প্ৰায় ৪০০ ছাত্ৰ-ছাত্ৰীয়ে অংশ ল'ব। ৰাজ্য চৰকাৰে জি-টুৱেণ্টিৰ প্রতিনিধিসকলৰ বাবে কাজিৰঙা ৰাষ্ট্ৰীয় উদ্যান, পবিতৰা অভয়াৰণ্য, গড়ভঙা সংৰক্ষিত বনাঞ্চল, ব্রহ্মপুত্র নদীদ্বীপ আৰু ব্ৰহ্মপুত্ৰ হেৰিটেজ চেণ্টাৰ আদি জৈৱ বৈচিত্ৰ্যৰে পৰিপূৰ্ণ আৰু ঐতিহ্যমণ্ডিত স্থানসমূহ ভ্ৰমণৰ ব্যৱস্থা কৰিছে। 

জি-টুৱেণ্টিৰ বিদেশী প্রতিনিধিসকলৰ এই ভ্ৰমণসূচীয়ে আন্তঃৰাষ্ট্ৰীয় পৰ্যায়ত অসমৰ প্ৰাকৃতিক সম্পদৰাজি আৰু চহকী ঐতিহ্য বিশ্ববাসীৰ সন্মুখত দাঙি ধৰাত সহায়ক হ'ব। জি-টুৱেণ্টিৰ লগত সংগতি ৰাখি ৰাজ্যৰ উচ্চ শিক্ষা সঞ্চালকালয়ৰ উদ্যোগত কেইবালানি কাৰ্যসূচী আয়োজন কৰা হৈছে। অসম চৰকাৰৰ উচ্চ শিক্ষা সঞ্চালকালয়ৰ সৌজন্যত গুৱাহাটী বিশ্ববিদ্যালয়ত জি- টুৱেণ্টিৰ লগত সংগতি ৰাখি এখন আলোচনা চক্ৰ অনুষ্ঠিত হ'ব। গোলাঘাট জিলাৰ ফৰকাটিং মহাবিদ্যালয়ৰ উদ্যোগত আৰু জিলা প্ৰশাসনৰ সহযোগত G-20 সন্মিলনৰ অন্তৰ্গত Y-20 সন্মিলনৰ কাৰ্যসূচী আৰম্ভ হৈছে। সন্মিলনৰ অংশ স্বৰূপে মহাবিদ্যালয়খনৰ প্ৰেক্ষাগৃহত কৰ্মৰ ভৱিষ্যৎ, উদ্যোগ, উদ্ভাৱন আৰু একৈশ শতিকা শীৰ্ষক এখন আলোচনা চক্র অনুষ্ঠিত হয়। অতিৰিক্ত উপায়ুক্ত ড০ সংগীতা বৰঠাকুৰে আলোচনা চক্ৰখন উদ্বোধন কৰে।