অসম সাহিত্য সভাৰ ষষ্ঠ সপ্ততিতম দ্বিবাৰ্ষিক নাৰায়ণপুৰ অধিবেশনৰ আজি দ্বিতীয় দিন

গুৱাহাটী,১ ফেব্ৰুৱাৰী:অসম সাহিত্য সভাৰ ষষ্ঠ সপ্ততিতম দ্বিবাৰ্ষিক নাৰায়ণপুৰ অধিবেশনৰ আজি দ্বিতীয় দিন । মণিকাঞ্চন ক্ষেত্ৰত অনুষ্ঠিত অসম সাহিত্য সভাৰ এই পূৰ্ণাংগ অধিবেশনৰ দ্বিতীয়দিনাও পুৱাৰে পৰা উদুলি-মুদুলি পৰিৱেশে বিৰাজ কৰিছে । বুধবাৰে পুৱাৰে পৰা হাজাৰ হাজাৰ সাহিত্যানুৰাগীৰে ভৰি পৰিছে নাৰায়ণপুৰৰ বৰখামটি পথাৰৰ মণিকাঞ্চন ক্ষেত্ৰ ।

আজিৰ কাৰ্যসূচী অনুসৰি পুৱা ৮.৪৫ বজাত অসম সাহিত্য সভাৰ বিদায়ী সভাপতি কুলধৰ শইকীয়াই অসম সাহিত্য সভাৰ মূল পতাকা উত্তোলন কৰে । আনহাতে, ইয়াৰ সমান্তৰালকৈ আন ৭৫ খন পতাকাও উত্তোলন কৰে বিভিন্ন বিশিষ্ট ব্যক্তিয়ে । অসম সাহিত্য সভাৰ পতাকা উত্তোলন কৰি অসমৰ জাতীয় সংগীতটি অসমীয়া, দেউৰী আৰু খামটি ভাষাত পৰিবেশন কৰা হয় । তাৰ উপৰি গায়ন-বায়ন, ঢোলবাদন আৰু চালি নৃত্যও পৰিবেশন কৰা হয় । ইয়াৰ পিছতে সদৌ অসম ছাত্ৰ সন্থাৰ সহকাৰী সম্পাদক প্ৰশান্ত দত্তই শ্বহীদ তৰ্পণ কৰে । ইয়াৰ পিছৰ স্মৃতি তৰ্পণ অনুষ্ঠানত মুখ্য তৰ্পক হিচাপে স্মৃতি সূৰ্য গোলোক হাজৰিকা আৰু তৰ্পক হিচাপে বিশিষ্ট নাট্যকাৰ চৈয়দ নাজিম আহমেদ উপস্থিত থাকে ।

উল্লেখ্য যে ৩১ জানুৱাৰী, মঙলবাৰৰ পৰা লখিমপুৰ জিলাৰ নাৰায়ণপুৰৰ মণিকাঞ্চন ক্ষেত্ৰত পাঁচপাঁদিনীয়া কাৰ্যসূচীৰে আৰম্ভ হৈছে অসম সাহিত্য সভাৰ ষষ্ঠ সপ্ততিতম পূৰ্ণাংগ অধিবেশন । ইতিমধ্যে প্ৰথম দিনটোতো মণিকাঞ্চন ক্ষেত্ৰত এক উখল-মাখল পৰিৱেশে বিৰাজ কৰে । ইফালে হাজাৰ হাজাৰ সাহিত্যানুৰাগীক আদৰিবলৈ আগবাঢ়ি আহিছে নাৰায়ণপুৰ তথা বিহপুৰীয়া সমষ্টিবাসী । আনহাতে, অধিবেশন উপলক্ষে নকৈ সজাই-পৰাই তোলা হৈছে সমগ্ৰ নাৰায়ণপুৰক ৷ ৰাজ্যৰ ভিন্ন প্ৰান্তৰ পৰা আগমন ঘটিছে সাহিত্য সভাৰ প্ৰতিনিধি তথা অতিথি । তেওঁলোকক আদৰিবলৈ সৰ্বতোপ্ৰকাৰে চেষ্টা চলাইছে আদৰণী সমিতিয়ে ৷ অতিথিসকলৰ যাতে কোনো ক্ষেত্ৰতে অসুবিধা নহয়, তাৰ প্ৰতিও বিশেষ দৃষ্টি ৰাখিছে প্ৰতিখন উপ-সমিতিয়ে ৷