খোলা হ’ল কুৰিটা বছৰে বন্ধ হৈ থকা ‘অন্য এক কলংকিত অধ্যায়’ শীৰ্ষক বহু প্ৰতীক্ষিত সেই বিশেষ চিঠিখন

গুৱাহাটী, ৩ ফেব্ৰুৱাৰীঃ সদ্য প্ৰয়াত ঋষিকবি নীলমনি ফুকনে ২০০৪ চনতে নিত্য বৰাদেৱৰ হাতত দিয়া যোৱা  ‘অন্য এক কলংকিত অধ্যায়’ শীৰ্ষক বহু প্ৰতীক্ষিত সেই বিশেষ চিঠিখন আজি গুৱাহাটী প্ৰেছ ক্লাৱত মুকলি কৈ পাঠ কৰা হয়। কবি গৰাকীৰ প্ৰতি সন্মান জনাই নিত্য বৰা দেৱে চিঠিখন ৰাজহুৱা ভাৱে পাঠ কৰে। খামটোত কবি গৰাকীয়ে লিখিছিল ‘মোৰ মৃত্যুৰ পিচত খুলিবা।’
কবি গৰাকীৰ সাহিত্যকৃতিৰ বিৰুদ্ধে ১৯৭৩-৭৪ চনত কুম্ভীলক বৃত্তি গ্ৰহণ কৰাৰ এটা অভিযোগ উত্থাপিত হৈছিল সেই সময়ত ড. ভূপেন হাজৰিকাই সম্পাদনা কৰা ‘আমাৰ প্ৰতিনিধি’ আলোচনীত। নিত্য বৰা উক্ত সময়ত সেই আলোচনীৰ এটা শিতানৰ সম্পাদনাৰ দ্বায়িত্বত আছিল। 
কবি নীলমনি ফুকনে বিদেশী কবি এজনৰ কবিতা হুবহু অনুবাদ কৰি নিজৰ সৃষ্টি বুলি প্ৰকাশ কৰাৰ অপবাদৰ পৰা তেওঁক ৰক্ষা কৰিবলৈ সেই সময়ৰ বহু কেইজন অসমীয়া সাহিত্যৰ কাণ্ডাৰি আগবাঢ়ি নহা হ’লে তেওঁৰ সাহিত্যিক জীৱনৰ প্ৰায় ইতি পৰিলেহেঁতেন। 
সেই সময়ৰ কামৰূপৰ এছ.পি আছিল কে পি এছ গিল। তেওঁৰ সহায়ত ফুকনে তেওঁৰ বিৰুদ্ধে উত্থাপিত অভিযোগৰ ষড়যন্ত্ৰৰ কথাৰ উমান পায়। অৱশেষত ভাগৱতী প্ৰসাদ বৰুৱা ভৱনত অনুষ্ঠিত এক নাগৰিক সভাত তেওঁক উক্ত অপবাদৰ পৰা নিষ্কৃতি দিয়া হয়। 
উক্ত ঘটনাৰ প্ৰায় কেইবা দশকো পিচত পুনৰ ‘এবিলাক’ৰ পৰা প্ৰকাশিত অসমীয়া সাহিত্য বিষয়ক গ্ৰন্থ এখনৰ এক প্ৰৱন্ধত ফুকন দেৱৰ  ‘টোপনিতো তেওঁ মোক খেদি ফুৰিছিল’ কবিতাটো বিদেশী লেখকৰ পৰা অনুপ্ৰাণিত বুলি প্ৰকাশ হয়। তেওঁ তাৰ বিষয়ে কৰা প্ৰতিবাদৰ সদুত্তৰ সেই সময়ত নেপালে।অৱশেষত নিত্য বৰা দেৱে ২০০৪ চনত প্ৰতিদিন কাকতত কবি গৰাকীৰ প্ৰতি উত্থাপিত মিথ্যা অভিযোগটোৰ বিষয়ে লিখি প্ৰকাশ কৰে।
তাৰ পিচতে কবি গৰাকীয়ে ‘অন্য এক কলংকিত অধ্যায়’ শীৰ্ষক চিঠিখন লিখি নিত্য বৰাৰ হাতত অৰ্পন কৰি তেওঁৰ মৃত্যুৰ পিচত ৰাজহুৱা কৰিবলৈ অনুৰোধ কৰে।   
৯০ দশকত ‘সাদিন’ত ফুকনে উক্ত মিথ্যাচাৰৰ সবিশেষ এজন বুদ্ধিজীৱিৰ হাতত দি যোৱা বুলি এক বাতৰি প্ৰকাশ হৈছিল। তেতিয়াৰে পৰা চিঠিখন চৰ্চাত আছিল। 
মন কৰিব লগীয়া এই যে কবি গৰাকীয়ে চিঠিখনত লিখিছিল, "আজি ত্ৰিশ বছৰৰ পিছত, তেওঁলোক কোন আছিল, জানি বা কি লাভ। তেওঁলোকে নিজেই সোধক, কি তাড়নাত, উন্মাদনাত মতলীয়া হৈ এনে দুস্কাৰ্য কৰিছিল। কি লাভ হ'ল তাৰ পৰা অসমীয়া সমাজৰ, সাহিত্যৰ, কবিৰ কবিতাৰ আৰু সেই কুচক্ৰী দুৰ্জনসকলৰ।"
কবিজনাৰ এই দেৱদুৰ্লভ অনুভৱে সকলো শ্ৰোতাৰ অন্তৰাত্মাক আলোকিত কৰি তেওঁৰ প্ৰতি অধিক শ্ৰদ্ধাশীল কৰি তোলে।