ধেমাজি জিলাৰ ১৪৩১ বিদ্যালয়ৰ গুণোৎসৱত ৫৬৮ বৰ্হি মূল্যায়কঃ ছাত্ৰ-ছাত্ৰীৰ সৈতে মধ্যাহ্ন আহাৰ গ্ৰহণ মন্ত্ৰী সঞ্জয় কিষাণৰ

ধেমাজি,  ৩ জানুৱাৰীঃ ৰাজ্যৰ দ্বিতীয় পৰ্যায়ত চলি থকা গুণোৎসৱ কাৰ্যসূচীত ধেমাজি জিলাৰ অভিভাৱক মন্ত্ৰী তথা অসম চৰকাৰৰ শ্ৰম মন্ত্ৰী সঞ্জয় কিষাণে আজি ধেমাজি জিলাখনৰ তিনিখন বিদ্যালয়ত পৰ্যবেক্ষক হিচাপে উপস্থিত থাকে ৷ পুৱা ১০ বজাত চিলাপথাৰৰ ছচাইটী প্ৰাথমিক বিদ্যালয়ত উপস্থিত হৈ বিদ্যালয়খনৰ ছাত্ৰ-ছাত্ৰী সকলৰ সৈতে মত বিনিময় কৰে। তাৰ পিছতে চিলাপথাৰৰে দেৱেশ্বৰ পাইট প্ৰাথমিক বিদ্যালয়লৈ যায়।

ইয়াৰ পিছত বাটঘৰীয়া উচ্চতৰ মাধ্যমিক বিদ্যালয়তো মন্ত্ৰী গৰাকী উপস্থিত হৈ বিদ্যালয়খনৰ আন্ত:গাঠনিৰ লগতে বিদ্যায়তনিক দিশৰ বুজ লয়। ৰাজ্যৰ শ্ৰমিক আৰু চাহ জনগোষ্ঠী কল্যাণ বিভাগৰ মন্ত্ৰী গৰাকীয়ে বিদ্যালয়খনৰ ছাত্ৰ-ছাত্ৰীৰ সৈতে একেলগে বহি মধ্যাহ্ন আহাৰ গ্ৰহণ কৰে।

মন্ত্ৰী গৰাকীয়ে বিদ্যালয় কেইখনত বৰ্হি মূল্যায়ক হিচাপে উপস্থিত থাকি অত্যন্ত সুখ আৰু আনন্দ উপভোগ কৰা বুলি জানিবলৈ দি চৰকাৰী বিদ্যালয় কেইখনৰ শৈক্ষিক মানত সন্তুষ্টি প্ৰকাশ কৰে। কাইলৈ তৃতীয় তথা অন্তিম দিনৰ গুণোৎসৱতো ধেমাজি জিলাৰ কেইবাখনো বিদ্যালয় পৰিদৰ্শন কৰাৰ কথা৷ জিলাখনৰ মুঠ ১৪৩১ খন বিদ্যালয়ত যোৱা ১ ফ্ৰেব্ৰুৱাৰীৰ পৰা গুণোৎসৱ চলি আছে।

প্ৰথম দিনা স্ব-মূল্যায়ন অনুষ্ঠিত হোৱাৰ পিছত কালিৰে পৰা সুকীয়া সুকীয়াকৈ বৰ্হি মূল্যায়কৰ দ্বাৰা মূল্যায়ন কৰা হৈছে। এই গুণোৎসৱত জিলাখনৰ উপায়ুক্ত, আৰক্ষী অধীক্ষক, অতিৰিক্ত উপায়ুক্ত, বিভিন্ন বিভাগৰ মুৰব্বী বিষয়া আদিৰ উপৰিও দিছপুৰৰ পৰাও  ৰাজ্য প্ৰশাসনৰ কেইবাগৰাকী জেষ্ঠ বিষয়াই আহি অংশ গ্ৰহণ কৰে ।

এইবাৰ গুণোসৱত মুঠ ৫৬৮ গৰাকী বৰ্হি মূল্যায়ক নিয়োজিত কৰা হৈছে। তদুপৰি ১৫৮ জন মণ্ডল সমন্বয়কেও সম্পূৰ্ণ ৰূপে সক্ৰিয় ভূমিকা গ্ৰহণ কৰাৰ লগতে এইবাৰৰ মূল্যায়নে প্ৰথম শ্ৰেণীৰ পৰা নৱম শ্ৰেণীৰ মুঠ ৯৯,১৫১ জন ছাত্ৰ-ছাত্ৰীক সামৰি লৈছে।