আদানি গ্ৰুপৰ শ্বেয়াৰ কাৰচাজি,বিত্তীয় অনিয়মৰ অভিযোগ তুলি মৰিগাঁও জিলা কংগ্ৰেছৰ প্ৰতিবাদ

মৰিগাঁও,৬ ফেব্ৰুৱাৰীঃ আদানি গ্ৰুপৰ শ্বেয়াৰ কাৰচাজি, বিত্তীয় অনিয়মৰ অভিযোগ তুলি আজি মৰিগাঁও জিলা কংগ্ৰেছ দলৰ নেতৃত্বই ধৰ্ণা আৰু পথ সভা অনুষ্ঠিত কৰি মৰিগাঁও চহৰ উত্তাল কৰি তোলে। মৰিগাঁও জিলা কংগ্ৰেছৰ সভাপতি শ্ৰৱণ কুমাৰ ডেকাৰজাৰ নেতৃত্বত জিলা কংগ্ৰেছ কাৰ্য্যালয়ৰ পৰা শতাধিক প্ৰতিবাদকাৰীয়ে সমদল কৰি আহি মৰিগাঁও শাখা ভাৰতীয় জীৱন বীমা নিগম কাৰ্যালয়ৰ সন্মুখত ধৰ্ণা কাৰ্যসূচী ৰূপায়ণ কৰে।

ইয়াৰ পিছতেই চৰকাৰক বিভিন্ন ধৰণে সমালোচনা কৰি এখন পথ সভাও অনুষ্ঠিত কৰে। মৰিগাঁও জিলা কংগ্ৰেছৰ সাধাৰণ সম্পাদক শশীমোহন বিশ্বাস,সীমান্ত হাজৰিকাকে আদি কৰি কংগ্ৰেছ নেতৃত্বই পথ সভাত আদানি গ্ৰুপে কোটি কোটি জনতাৰ কষ্টোপাৰ্জিত ধন আত্মসাৎ, ভাৰতীয় জীৱন বীমা, ষ্টেট বেংক আদি কৰি বিত্তীয় প্ৰতিষ্ঠান সমূহৰ সাধাৰণ গ্ৰাহকৰ ধন লুট কৰা তথা বিত্তীয় প্ৰৱঞ্চনাৰ  অভিযোগ তুলি প্ৰতিবাদকাৰী সকলে সমগ্ৰ ঘটনাৰ উচ্চ পৰ্যায়ৰ তদন্ত দাবী কৰাৰ লগতে সাধাৰণ জনতাৰ সঞ্চিত ধনৰ নিৰাপত্তা প্ৰদানৰ দাবী জনায়।