অসম গ্ৰামীণ বিকাশ বেংকৰ অৱসৰপ্ৰাপ্ত বেংক বিষয়া, নিবন্ধকাৰ, গীতিকাৰ, অনাতাৰ শিল্পী বিপিন শইকীয়াৰ দেহাৱসান

লখিমপুৰ, ৭ ফেব্ৰুৱাৰী ঃ লখিমপুৰ নগৰৰ চিডি ৰোড নিবাসী অৱসৰপ্ৰাপ্ত বেংক বিষয়া সাংবাদিক নিবন্ধকাৰ গীতিকাৰ, জিকিৰ গায়ক স্তমভ লেখক, সু-বক্তা বিপিন শইকীয়াৰ আজি ১১.১৫ বজাত দেহাৱসান ঘটে৷ শইকীয়া বিগত কিছুদিন ধৰি দুৰাৰোগ্য ৰোগত আক্ৰান্ত হৈ চিকিৎসাধীন হৈ আছিল৷ শেহতীয়াকৈ তেওঁক উন্নত চিকিৎসাৰ বাবে চেন্নাইলৈ নিয়া হৈছিল যদিও কোনো সুফল নাপালে৷

তেখেতৰ মৃত্যুত লখিমপুৰবাসীয়ে এগৰাকী ভাল সমাজসেৱক, নিবন্ধকাৰ, গীতিকাৰ, জিকিৰ গায়ক আৰু সু-বক্তাক হেৰুৱালে৷ সৰুৰে পৰা লিখা মেলাত ৰাপ থকা বিপিন শইকীয়াই ১৯৭৪ চনত লখিমপুৰৰ পৰা প্ৰকাশিত প্ৰথমখন সাপ্তাহিক বাতৰি কাকত ন-লখিমিত সহকাৰী সম্পাদক হিচাপে যোগদান কৰি সাংবাদিকতাৰ জীৱন আৰম্ভ কৰে৷ ১৯৭৬ চনত ন-লখিমীৰ পৰা পদত্যাগ কৰি নামৰূপত শিক্ষকতা কৰি অৱশেষত বেংকৰ চাকৰিত যোগদান কৰে৷

এটা সময়ত মনোৰম গগৈ সম্পাদিত অসমীয়া প্ৰতিদিনৰ দেওবৰীয়া আলোচনী সম্ভাৰত তেওঁৰ লিখা অৰ্থনৈতিক বিষয়ৰ প্ৰবন্ধৰাজিয়ে ৰাইজৰ ভূয়সী প্ৰশংসা লাভ কৰিছিল৷ সমসাময়িক ভাৱে আজিৰ অসমত সৰু সৰু মানবহৰ অসাধাৰণ কথা অগ্ৰদূতত বু-বু-বা-বা আৰু দৈনিক বাতৰিত সাধাৰণ মানুহৰ অসাধাৰণ কথা শীৰ্ষক লিখনি সমূহে ৰাইজক বৰকৈ আকৰ্ষিত কৰে৷ ডিব্ৰুগড় অনাতাৰ কেন্দ্ৰৰ তেওঁ এগৰাকী স্বীকৃতিপ্ৰাপ্ত গীতিকাৰ হোৱাৰ উপৰিও তেওঁ সুন্দৰভাৱে জিকিৰো গাইছিল৷

১৯৮১ চনত তেওঁ গোৱা জিকিৰ আৰু বিহুগীত আকাশবাণী জম্মু আৰু কাশ্মীৰে ৰেকৰ্ড কৰি দুবাৰকৈ সম্প্ৰচাৰ কৰিছিল৷ লখিমপুৰ নাগৰিক মঞ্চৰ সম্পাদক হিচাপে থাকি ৰাইজৰ সেৱা কৰি যোৱাৰ উপৰি বয়োজ্যেষ্ঠসকলৰ কল্যাণৰ হকে গঠিত ‘বিয়লি’ অনুষ্ঠানটোৰ হৈয়ো কাম কৰি যায়৷ ৬৭ বছৰ বয়সত মৃত্যুবৰণ কৰা বিপিন শইকীয়াই পত্নী, এটি পুত্ৰ আৰু এগৰাকী কন্যা সহ বোৱাৰী আৰু নাতিনীক এৰি থৈ যায়৷ আনহাতে তেওঁ ৮খন প্ৰকাশিত গ্ৰন্থ আৰু ৪খন অপ্ৰকাশিত গ্ৰন্থও ৰচনা কৰি গৈছে৷

তেখেতৰ মৃত্যুত অসম গ্ৰামীণ বিকাশ বেংকৰ সমূহ কৰ্মচাৰীবৃন্দ, নৰ্থ লখিমপুৰ প্ৰেছ ক্লাব, লখিমপুৰ নাগৰিক মঞ্চ, বিয়লি, মানৱ অধিকাৰ সংগ্ৰাম সমিতিৰ কেন্দ্ৰীয় সচিব ৰাজু সিংহ আদিৰ লগতে প্ৰবীণ সাংবাদিক চন্দেশ্বৰ দুৱৰা, আবু ছৈয়দ খান, হাৰনুল ৰচিদ, তন্ময় শইকীয়া, কৃষ্ণপ্ৰসাদ বৰা, নুৰুল হক আদিৰ লগতে বিশিষ্ট নাগৰিক বিৰিঞ্চি কুমাৰ হাজৰিকা, ডাঃ দয়া দত্ত, সুৰেশ গগৈ, লক্ষ্মী নেওঁগে গভীৰ শোক প্ৰকাশ কৰে আৰু শোক সন্তপ্ত পৰিয়াললৈ গভীৰ সমবেদনা জ্ঞাপন কৰে৷