সন্দীপ মেহতাক গুৱাহাটী উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি দিয়াৰ পৰামৰ্শ

গুৱাহাটী,৯ ফেব্ৰুৱাৰী: দেশৰ সৰ্বোচ্চ উচ্চতম ন্যায়ালয়ৰ কলেজিয়ামে ৰাজস্থান উচ্চ ন্যায়ালয়ৰ জ্যেষ্ঠ ন্যায়াধীশ সন্দীপ মেহতাক গুৱাহাটী উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি দিয়াৰ পৰামৰ্শ দিছে । উচ্চতম ন্যায়ালয়ৰ মুখ্য ন্যায়াধীশ ধনঞ্জয়া ৱাই চন্দ্ৰচূড়কে ধৰি তিনিজন ন্যায়াধীশৰ কলেজিয়ামে বুধবাৰে এক নিৰ্দেশনা জাৰি কৰি এই পৰামৰ্শ আগবঢ়ায় ৷ উচ্চতম ন্যায়ালয়ৰ কলেজিয়ামে জাৰি কৰা এই নিৰ্দেশনাটোত গুৱাহাটী উচ্চ ন্যায়ালয়ৰ মুখ্য ন্যায়াধীশ আৰ এম ছায়াই অৱসৰ গ্ৰহণ কৰাৰ কথা উল্লেখ কৰি তাত এজন মুখ্য ন্যায়াধীশ নিযুক্তি দিয়াৰ কথা উল্লেখ কৰা হয় ৷

উচ্চতম ন্যায়ালয়ৰ কলেজিয়ামে নিৰ্দেশনাটোত গুৱাহাটী উচ্চ ন্যায়ালয়ৰ নতুন ন্যায়াধীশ হিচাপে ৰাজস্থান উচ্চ ন্যায়ালয়ৰ জ্যেষ্ঠ ন্যায়াধীশ সন্দীপ মেহতাক নিযুক্তি দিয়াৰ পৰামৰ্শ আগবঢ়ায় ৷ ন্যায়াধীশ সন্দীপ মেহতাক ২০১১ চনৰ ৩০ মে’ত ৰাজস্থান উচ্চ ন্যায়ালয়ত নিযুক্তি দিয়া হৈছিল আৰু ২০২৫ চনৰ ১০ জানুৱাৰীত তেওঁ অৱসৰ লোৱাৰ কথা আছে । দেশৰ উচ্চ ন্যায়ালয়ত মুখ্য ন্যায়াধীশৰ পদত ৰাজস্থান উচ্চ ন্যায়ালয়ৰ পৰা কোনো প্ৰতিনিধি নাই । এনে পৰিস্থিতিত, জ্যেষ্ঠতাৰ ওপৰত ভিত্তি কৰি ন্যায়াধীশ মেহতাক গুৱাহাটী উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি দিয়াৰ প্ৰস্তাৱ লোৱা হয় ।