এইচ আই ভি ভেকচিনৰ মানৱ দেহৰ পৰীক্ষণত ৯৭ শতাংশ গ্ৰহণকাৰীৰ উল্লেখনীয় প্ৰতিৰোধ ক্ষমতা সৃষ্টি কৰিব পাৰিছে

গুৱাহাটী; ১৮ এপ্ৰিল: এইচ আই ভিৰ বিভিন্ন প্ৰতিৰোধ ব্যৱস্থাৰ প্ৰতি লক্ষ্য ৰাখি পৰীক্ষামূলক ভেকচিনৰ প্ৰথম পৰ্য্যায়ৰ ক্লিনিকেল নিৰীক্ষণ সম্পন্ন কৰা হয়।আন্তর্জাতিক এইডচ্ ভেকচিন ইনষ্টিটিউট আৰু স্ক্ৰিপছ ৰিচাৰ্ছে ফেব্ৰুৱাৰী মাহত কৰা প্ৰতিশ্ৰুতি অনুসৰি এইডচৰ ভাইৰাছৰ বিৰুদ্ধে যুঁজ দিব পৰা এন্টিবডি তৈয়াৰ কৰাৰ লগতে বিৰল প্ৰতিৰোধী কোষৰ উৎপাদনত সাফল্যমণ্ডিত হৈছে। উক্ত ভেকচিনটো পৰীক্ষা মূলক ভাৱে কোনো ব্যক্তিক প্ৰদান কৰাৰ পিছত ৯৭ শতাংশ কাম কৰিব বুলি জানিব পৰা গৈছে। 

ভেকচিন প্ৰস্তুত কৰণ সন্দৰ্ভত স্ক্ৰিপছ ৰিচাৰ্ছ চেন্টাৰৰ বিশেষজ্ঞ তথা সঞ্চালক ড° উইলিয়াম চিফে জনায় যে- 'আমি পৰ্যবেক্ষণ কৰা অনুসৰি ভেকচিনটোৱে এইচ আই ভিৰ কোষৰ বৃদ্ধিত প্ৰতিৰোধ কৰিবলৈ সামৰ্থ্য হৈছে। আমি বিশ্বাসী আমাৰ এই পৰীক্ষণৰ চাবিকাঠিয়ে ভৱিষ্যতে এইচ আই ভিৰ ভেকচিন প্ৰস্তুত কৰাৰ ক্ষেত্রত এক উল্লেখনীয় ভূমিকা আগবঢ়াব।"

আই ভি আই আৰু স্ক্ৰিপছে একে পদ্ধতিত প্ৰতিষেধক কোষৰ ক্ষেত্ৰত ক্ষুদ্ৰতম এম আৰ এন এৰ  ভিত্তিত ভেকচিন তৈয়াৰ কৰিব আৰু এই পদক্ষেপত 'মডাৰ্না'ৰ বায়টেকনলজি সংস্থা অন্তর্ভুক্ত হৈছে। লগতে সংস্থাই জনায় যে 'এম আৰ এন এ প্ৰযুক্তি ব্যৱহাৰ কৰি ভেকচিন প্ৰস্তুতকৰণত গতি তৰাম্বিত হ'ব।' সমগ্র বিশ্বত ৩ কোটি ৮ লাখ লোক এইচ আই ভিত আক্রান্ত। উক্ত ভেকচিনে এক উল্লেখনীয় ভূমিকা পালন কৰিব বুলি বিজ্ঞানী সকল আশাবাদী।