গুৱাহাটী ঃ ষ্টাফ ৰিপ’র্টাৰ, ১৪ মে’ ঃ কৰ’নাত আক্রান্ত হৈ কোনো লোকৰ মৃত্যু হ’লে এতিয়াৰে পৰা হ’ব তদন্ত৷ কৰ’নাত আক্রান্ত হৈ ৰাজ্যত মৃত্যু হোৱা লোকৰ সংখ্যা দ্রুত গতিত বৃদ্ধি পোৱাৰ পাছতেই আজি এই কথা প্রকাশ কৰিছে ৰাজ্যৰ স্বাস্থ্য মন্ত্রী কেশৱ মহন্তই৷ সাংবাদিকৰ আগত মন্ত্রীজনে প্রকাশ কৰা মতে, কৰ’নাত আক্রান্ত আৰু মৃত্যু হোৱা লোকৰ সংখ্যা হ্রাস কৰাৰ বাবে ৰাজ্যৰ স্বাস্থ্য বিভাগে সকলো ধৰণৰ চেষ্টা অব্যাহত ৰাখিছে৷

কিন্তু ইয়াৰ পাছতো প্রতিদিনেই  ৰাজ্যত যথেষ্টসংখ্যক লোকৰ মৃত্যু ঘটিছে৷ সেয়েহে উক্ত লোকসকলৰ মৃত্যুৰ কাৰণ উদঘাটন কৰাটো জৰুৰী হৈ পৰিছে৷ চিকিৎসালয় নে পৰিয়ালৰ গাফিলতিত মৃত্যু হৈছে, সেই সন্দর্ভত তদন্ত কৰা হ’ব বুলি উল্লেখ কৰি তেওঁ লগতে কয় যে ৰাজ্যখনত এতিয়ালৈকে কৰ’নাত আক্রান্ত হোৱা লোকৰ বাবে বিছনাৰ অভাৱ ঘটা নাই৷ আনহাতে ৰাজ্যত কৰ’নাই সৃষ্টি কৰা পৰিস্থিতি আৰু অধিক অৱনতি ঘটিলেহে সম্পূর্ণ লকডাউনৰ কথা চিন্তা কৰা হ’ব বুলি জনাই তেওঁ স্পষ্টভাৱে কয় যে সমগ্র ৰাজ্যখনতে নহয়, যিবোৰ অঞ্চলৰ পৰিস্থিতি অত্যন্ত শোচনীয় হ’ব, উক্ত অঞ্চলসমূহতহে লকডাউন ঘোষণা কৰা হ’ব পাৰে৷

মন কৰিবলগীয়া কথা যে মন্ত্রিত্ব লাভ কৰাৰ পাছত কৰ’নাই সৃষ্টি কৰা পৰিস্থিতি ৰোধ কৰাৰ বাবে দিনে-নিশাই কামত ব্রতী হোৱা মন্ত্রীজনে আজি জনতা ভৱনত থকা নিজা কার্যালয়ত বহাৰ লগতে স্বাস্থ্য সেৱা সঞ্চালক ডাঃ ৰথীন্দ্র ভূঞাক লগত লৈ বিয়লি সোণাপুৰস্থিত কামৰূপ মহানগৰ জিলা চিকিৎসালয় পৰিদর্শন কৰে৷ এই পৰিদর্শন কালত মন্ত্রীজনে চিকিৎসাধীন লোকসকলৰ খবৰ লোৱাৰ লগতে চিকিৎসালয়খনত প্রয়োজনীয় জৰুৰী চিকিৎসা সেৱা আগবঢ়াব পৰাকৈ উপলব্ধ  ব্যৱস্থাৱলীৰো বুজ লয়৷ মন্ত্রীজনে চিকিৎসালয়খনত অক্সিজেনৰ উপলব্ধতা অধিক বৃদ্ধি কৰিবলৈ ইতিমধ্যে জৰুৰীভাৱে কার্যব্যৱস্থা আৰম্ভ কৰা বুলিও সাংবাদিকক জানিবলৈ দিয়ে৷