গুৱাহাটী, ১৫ মে’- মুখ্যমন্ত্রী ড° হিমন্ত বিশ্ব শৰ্মাই ইতিমধ্যে ঘোষণা কৰিছে যে, ৰাজ্যখনত প্ৰতিদিনে ১লাখকৈ কভিড পৰীক্ষা কৰাৰ বাবে পদক্ষেপ লোৱা হৈছে। গুৱাহাটীত কালি এখন পর্যালোচনা সভাত ড০ শর্মাই অহা সোমবাৰৰ পৰা গুৱাহাটীত প্রতিদিনে ২০,০০০ লোককৰ কভিড পৰীক্ষা কৰা হ'ব বুলি প্রকাশ কৰে আৰু লগতে অহা সোমবাৰৰ পৰা নিজ গৃহত সুকীয়া শৌচালয় সংলগ্ন পৃথক কোঠা নথকা ৫০ বছৰৰ উৰ্ধৰ কভিড আক্রান্ত লোকসকলক ৰোগ পৰিচর্যা কেন্দ্র অথবা কভিড হাস্পতাললৈ স্থানান্তৰ কৰাটো বাধ্যতামূলক হ'ব বুলিও উল্লেখ কৰে। 

আনহাতে, ৰাজ্যখনৰ চাহ বাগিচাসমূহত কভিডৰ সংক্রমণ প্রতিৰোধৰ বাবে স্বাস্থ্য বিভাগে আজি নতুন নীতি-নির্দেশনা প্রকাশ কৰিব বুলিও ড° শৰ্মাই জানিবলৈ দিয়ে।তেওঁ কয় যে কন্টেনইমেণ্ট জ'নত থকা দুখীয়া ৰোগীসকলক এককালীন ভাট্টা হিচাপে ২,০০০ টকাৰ খাদ্য সামগ্রী প্রদানৰ ব্যৱস্থা গ্ৰহণ কৰা হৈছে।

কালি অসমত ৪,০৭৮ জন লোক নতুনকৈ কভিড -১৯ ত আক্ৰান্ত হিচাপে চিনাক্ত কালিৰ দিনটোত মুঠ সংক্রমনৰ হাৰ আছিল ৯.২৬ শতাংশ। সংক্রমিতসকলৰ ভিতৰত ১,১০৭ জনেই কামৰূপ মহানগৰ জিলাৰ। ইয়াৰ বিপৰীতে কালি ৪,১৬৮জন ক'ভিড ৰােগীক চিকিৎসালয়ৰ পৰা অব্যাহতি দিয়া হয়। 

সম্প্রতি ৰাজ্যখনত ৪১,৯৭৮ জন সক্রিয় কভিড ৰোগী আছে। ৰাজ্যখনত কালিৰ দিনটোত ৭৬ জন লোকে কভিড-১৯ ৰোগৰ ফলত প্রাণ হেৰুৱায়। ইয়াকে ধৰি ৰাজ্যখনত এতিয়ালৈকে কভিড -১৯ত মৃত্যু হোৱা লোকৰ সংখ্যা ২০৬০জন হৈছেগৈ।