৬ মাহ শীতকালীন বিৰতিৰ অন্তত দুৱাৰ মুকলি হ'ল কেদাৰনাথ মন্দিৰৰ: তীৰ্থযাত্ৰীৰ ভ্ৰমণত স্থগিতাদেশ

গুৱাহাটী, ১৮ মে': প্ৰায় ৬ মাহ শীতকালীন বিৰতিৰ অন্তত কেদাৰনাথ ধামৰ দুৱাৰ মুকলি হ'ল। মন্দিৰ মুকলি অনুষ্ঠানত কমসংখ্যক পুৰোহিতৰ সৈতে প্ৰধানমন্ত্ৰী নৰেন্দ্ৰ মোদীৰ হৈ পূজা অনুষ্ঠিত কৰে। 

বৰ্তমান কভিড-১৯ মহামাৰীৰ ফলত দ্বিতীয় বৰ্ষৰ বাবে চাৰিধাম যাত্ৰাত তীৰ্থযাত্ৰা তথা পৰ্য্যটন উদ্যোগত ব্যাপক ক্ষতিগ্রস্ত হৈছে বুলি চাৰিধাম দেৱস্থানম ব'ৰ্ডৰ বিষয়া এগৰাকীয়ে জানিবলৈ দিয়ে। 

উক্ত মন্দিৰ মুকলি অনুষ্ঠানত উত্তৰাখণ্ডৰ মুখ্যমন্ত্ৰী তিৰথ সিং ৰাৱাটে পূজাত অংশগ্রহণ কৰি আনন্দ প্ৰকাশ কৰাৰ লগতে জনসাধাৰণৰ কল্যাণ আৰু সুস্বাস্থ্যৰ বাবে প্ৰাৰ্থনা কৰে।

লগতে মুখ্যমন্ত্রী গৰাকীয়ে কভিড-১৯ পৰিপ্ৰেক্ষিতত যাত্ৰা ব্যাহত থকাৰ বাবে লোকসকলক বাবা কেদাৰনাথৰ "ভাৰ্চুৱেল দৰ্শন" কৰি পূজা-পাৰ্বন কৰাৰ আহ্বান জনায়। আনহাতে কভিড-১৯ মহামাৰীৰ অন্তত পৰিস্থিতি সুস্থিৰ হোৱাৰ লগে লগে মন্দিৰৰ দুৱাৰ তীৰ্থযাত্ৰী সকলৰ বাবে মুকলি কৰি দিয়া হ'ব বুলি পৰ্যটন মন্ত্ৰী সৎপাল মহাৰাজে জানিবলৈ দিয়ে।