গুৱাহাটী, ২০ মে': মধ্য প্ৰদেশৰ মহাৰাজা যশৱান্তৰাজ নামৰ এখন চৰকাৰী চিকিৎসালয়ৰ কেঁচুৱা ৰখা নাৰ্চাৰী ৱাৰ্ডত এহাল পিতৃ-মাতৃৱে নিজ সদ্যোজাত সন্তানটিৰ ভৰিৰে তেজ ওলাই থকা পৰিলক্ষিত কৰিছিল। কেঁচুৱাটিৰ মাতৃ প্ৰিয়ংকাই নিজ সন্তানটিক দুগ্ধপান কৰিবলৈ যোৱা সময়তে নিগনিয়ে ভৰি কুটি থকা দেখি আচৰিত হৈ ভয়তে চিঞৰি উঠে। 

উক্ত ঘটনা সন্দৰ্ভত কেঁচুৱাটোৰ পিতৃয়ে বিতংকৈ কয় যে, "সন্তানটিৰ মাতৃয়ে পুৱা ৩ বজাত নিজ সন্তানক দুগ্ধপান কৰোৱাবলৈ যায়, তেনেতে মাতৃগৰাকীয়ে নিজ সন্তানটিৰ ভৰিৰ আঙুলি আৰু গোৰাহা নিগনিয়ে কুটি কুটি খাই থকা পৰিলক্ষিত কৰে। পৰৱৰ্তী সময়ত মাতৃগৰাকীয়ে চিকিৎসালয় কৰ্তৃপক্ষক অৱগত কৰোৱাত চিকিৎসকে আহি শিশুটিৰ ড্ৰেছিঙৰ ব্যৱস্থা কৰে।" 

আনহাতে ঘটনা সন্দৰ্ভত চিকিৎসালয়খনৰ অধীক্ষক ড° পি এছ ঠাকুৰে কয় যে, "উক্ত বিষয়টোৰ তদন্তৰ বাবে এখন ৩ জনীয়া সমিতি গঠন কৰা হৈছে। তদন্ত সমিতিয়ে ৩ দিনৰ ভিতৰত ঘটনাটোৰ সম্পূর্ণ প্ৰতিবেদন দাখিল কৰিব।"

সম্প্রতি প্ৰাথমিক চিকিৎসা প্ৰদান কৰাৰ পিছত, কেঁচুৱাটোক বিশেষজ্ঞ চিকিৎসকে চিকিৎসা কৰি আছে আৰু কেঁচুৱাটোৰ অৱস্থা বৰ্তমান সুস্থিৰ হৈ উঠিছে বুলি চিকিৎসালয় কৰ্তৃপক্ষই জানিবলৈ দিয়ে।