গুৱাহাটী, ২১ মে': ক'ভিড-১৯ মহামাৰীৰ সময়ত প্ৰাণ হেৰুওৱা লোকসকলক স্মৰণ কৰি প্ৰধানমন্ত্ৰী নৰেন্দ্ৰ মোডীয়ে আৱেগিক হৈ গভীৰ শোক প্ৰকাশ কৰে আৰু শোকসন্তপ্ত পৰিয়ালসমূহলৈ সমবেদনা জ্ঞাপন কৰে। প্ৰধানমন্ত্ৰী মোডীয়ে নিজ সংসদীয় সমষ্টি বাৰাণসীৰ চিকিৎসক, পেৰামেডিকেল কৰ্মচাৰী আৰু অন্যান্য আগশাৰীৰ স্বাস্থ্য কৰ্মী সকলৰ সৈতে বাৰ্তালাপ কৰি কয় যে, "ক'ভিড-১৯ মহামাৰীয়ে দেশখনত বহুতো লোকক নিজৰ প্ৰিয়জনৰ পৰা আঁতৰাই লৈ গৈছে। দেশবাসীৰ হৈ ক'ভিড-১৯ ত মৃত্যু হোৱা লোকসকলৰ প্ৰতি গভীৰ শোক প্ৰকাশ কৰিছো লগতে মৃত লোকসকলৰ পৰিয়াল বৰ্গলৈ সমবেদনা জ্ঞাপন কৰিছো।"

প্ৰধানমন্ত্ৰী মোডীয়ে আগশাৰীৰ স্বাস্থ্য কৰ্মীসকলৰ সৈতে বাৰ্তালাপ কৰি অৱস্থাত কেইবাবাৰো বিৰতি লোৱা পৰিলক্ষিত হৈছিল। কিয়নো প্ৰধানমন্ত্ৰী গৰাকীয়ে মৃতলোকসকলক স্মৰণ কৰি আৱেগিক হৈ পৰিছিল আৰু চকুপানী নিগৰি অহা দেখা গৈছিল। আনহাতে ভেকছিন সন্দৰ্ভত প্ৰধানমন্ত্ৰী গৰাকীয়ে কয় যে, "ক'ভিড-১৯ৰ বিৰুদ্ধে যুঁজ দিয়াৰ মূল 'সুৰক্ষা কৱচ' হৈছে ভেকছিন। সকলোৱে টীকাকৰণ কৰিবলৈ আগবাঢ়ি অহাতো অতিকৈ প্ৰয়োজনীয়। ক'ভিড-১৯ৰ টীকাকৰণে দেশৰ আগশাৰীৰ স্বাস্থ্য কৰ্মীসকলক সুৰক্ষা প্ৰদান কৰি আহিছে। আগন্তুক দিনত দেশৰ সকলো লোকে ভেকছিন পাবলৈ সক্ষম হ'ব।" লগতে ক'ভিড-১৯ মহামাৰী চলি থকা সময়তে ক'লা ভেঁকুৰৰ সংক্ৰমণে আন এক নতুন প্ৰত্যাহ্বান কঢ়িয়াই আনিছে।

ইয়াৰ সংক্ৰমণৰ সৈতে মোকাবিলা কৰিবলৈ সাৱধানতা অৱলম্বন আৰু প্ৰস্তুতিৰ ওপৰত গুৰুত্ব দিব লাগিব বুলি প্ৰধানমন্ত্ৰী মোডীয়ে ভিডিঅ' কনফাৰেন্সযোগে জানিবলৈ দিয়ে। উক্ত ভিডিঅ' কনফাৰেন্সৰ সময়ত প্ৰধানমন্ত্ৰী মোডীয়ে ক'ভিড-১৯ সংকটৰ দ্বিতীয় ঢৌৰ বিৰুদ্ধে দক্ষতাৰে যুঁজ দিয়াৰ বাবে বাৰাণসীক ভূয়সী প্ৰশংসা কৰে। শেষত প্ৰধানমন্ত্ৰী মোডীয়ে পণ্ডিত ৰাজন মিশ্ৰ ক'ভিড চিকিৎসালয়কে ধৰি বাৰাণসীত শেহতীয়াকৈ ডিআৰডিঅ' আৰু ভাৰতীয় সেনাৰ যুটীয়া প্ৰচেষ্টাৰে আৰম্ভ কৰা বিভিন্ন ক'ভিড চিকিৎসালয়ৰ কাম-কাজৰ পৰ্যালোচনা কৰে