গুৱাহাটী,১০ জুন:উত্তৰ প্ৰদেশ আৰু বিহাৰৰ যুৱসকলৰ মাজত ইউ পি এছ চি পৰীক্ষাক লৈ পৃথক উন্মাদনা দেখা পোৱা যায়। দিল্লীৰ ইউ পি এছ চি প্ৰশিক্ষণৰ মুখ্য কেন্দ্ৰ মুখাৰ্জী নগৰ আৰু ৰাজেন্দ্ৰ নগৰত আন ৰাজ্যতকৈ উত্তৰ প্ৰদেশ আৰু বিহাৰৰ পৰা যোৱা অধিক শিক্ষাৰ্থীক পোৱা যায়। ৰাজ্যিক লোক সেৱা আয়োগৰ পৰীক্ষাৰ ক্ষেত্ৰটো একে ধৰণৰ উন্মাদনা। ইয়াৰ আটাইতকৈ ডাঙৰ উদাহৰণ হৈছে উত্তৰ প্ৰদেশৰ জৌনপুৰ জিলাৰ এখন সৰু গাওঁ যাক মাধোপট্টি বুলি কোৱা হয়।

উত্তৰ প্ৰদেশৰ মাধোপট্টিক বিষয়াসকলৰ গাওঁ বুলিও জনা যায়। ৰাজধানী লক্ষ্ণৌৰ পৰা প্ৰায় ২৫০ কিলোমিটাৰ দূৰত থকা এই গাওঁখনৰ প্ৰায় প্ৰতিটো পৰিয়ালতে এজন ব্যক্তি আই এ এছ বা আই পি এছ। কেৱল আই এ এছ আৰু আই পি এছেই নহয়, এই গাওঁখনৰ বহুলোকে তেওঁলোকৰ প্ৰতিভাৰ বাবে ইছৰো আৰু আন্তঃৰাষ্ট্ৰীয় বিভিন্ন বেংকত ভাল পদত অধিষ্ঠিত হৈ আছে। 

এই গাওঁখনে প্ৰথম আইএএছ বিষয়া ১৯১৪ চনত পাইছিল । গাওঁখনৰ প্ৰথম আইএএছ বিষয়া মুস্তাফা হুছেইন বিখ্যাত কবি ৱামিক জৌনপুৰীৰ পিতৃ আছিল। ১৯১৪ চনত মুস্তাফা হুছেইনে ইউনিয়ন পাব্লিক চাৰ্ভিচ কমিছনে অনুষ্ঠিত কৰা সৰ্বভাৰতীয় পৰীক্ষাত উত্তীৰ্ণ হয় আৰু পিচিএছত যোগদান কৰে। হুছেইনৰ পিছত আইএএছ ইন্দু প্ৰকাশে ১৯৫১ চনত অসামৰিক সেৱা পৰীক্ষাত দ্বিতীয় স্থান লাভ কৰিছিল আৰু আইএফএছ বিষয়া হৈছিল। তেওঁ প্ৰায় ১৬ খন দেশত ভাৰতৰ ৰাষ্ট্ৰদূত আছিল। তেওঁৰ ভাতৃ বিদ্যা প্ৰকাশ সিঙো ১৯৫৩ চনত এজন আইএএছ বিষয়া হিচাপে নিৰ্বাচিত হৈছিল।

চাৰিজন ভাতৃয়ে এই গাঁওখনৰ বাবে ইতিহাস সৃষ্টি কৰিছিল। ইয়াত, এটা পৰিয়ালৰ চাৰিজন ভাতৃয়ে আই.এ.এছ. পৰীক্ষাত উত্তীৰ্ণ হৈছিল আৰু এক নতুন অভিলেখ গঢ়িছিল। ১৯৫৫ চনত, পৰিয়ালৰ জ্যেষ্ঠ পুত্ৰ বিনয়ে দেশৰ এই আটাইতকৈ কঠিন তথা প্ৰতিযোগিতামূলক পৰীক্ষাত ত্ৰয়োদশ স্থান লাভ কৰিছিল। তেওঁ বিহাৰৰ মুখ্য সচিব হিচাপে অৱসৰ গ্ৰহণ কৰিছিল। তেওঁৰ দুই ভাতৃ ছত্ৰপল সিং আৰু অজয় কুমাৰ সিঙে ১৯৬৪ চনত পৰীক্ষাত উত্তীৰ্ণ হৈছিল,তাৰ পিছত তেওঁৰ সৰু ভায়েক শশীকান্ত সিঙে ১৯৬৮ চনত ইউপিএছচি পৰীক্ষাত উত্তীৰ্ণ হৈ ইতিহাস ৰচনা কৰিছিল।

মাধোপট্টিত বা ইয়াৰ ওচৰত কোনোধৰণৰ প্ৰশিক্ষণ প্ৰতিষ্ঠান নাই। তথাপিও গাওঁখনৰ যুৱক-যুৱতীসকলে তেওঁলোকৰ কঠোৰ পৰিশ্ৰম আৰু অধ্যৱসায়ৰ জৰিয়তে সফলতাৰ উচ্চতা স্পৰ্শ কৰি আহিছে। মাধোপট্টিৰ এজন শিক্ষকে আঙুলিয়াই দিছিল যে শিক্ষাৰ্থীসকলে স্কুলটো আইএএছ আৰু পিচিএছ পৰীক্ষাৰ বাবে নিৰ্দেশক কিতাপ লৈ উপস্থিত হয়। স্কুলৰ পৰাই, তেওঁলোকে আই.এ.এছ. হ'বলৈ সাজু হয়। সুবিধাৰ পৰা বঞ্চিত হৈও যদি কঠোৰ পৰিশ্ৰম কৰা হয় তেন্তে এই গাওঁখন দেশৰ প্ৰতিজন যুৱক-যুৱতীৰ বাবে এক সুন্দৰ নিদৰ্শন ।