মহিলা অধ্যাপিকাই নথিপত্ৰত স্বাক্ষৰ কৰিবলৈ অস্বীকাৰ কৰাত বিভাগীয় মূৰব্বী অধ্যাপকে সোধালে চৰ

গুৱাহাটী, ১৯ আগষ্টঃ দিল্লী বিশ্ববিদ্যালয়ৰ লক্ষ্মীবাই মহাবিদ্যালয়ৰ পৰা এক আচৰিত ঘটনা সংঘটিত হোৱা খবৰ পোৱা গৈছে। হিন্দী বিভাগৰ সহযোগী অধ্যাপিকা ড০ নীলমে তেওঁৰ সহযোগী অধ্যাপক তথা বিভাগীয় মূৰব্বী ড০ ৰঞ্জিত কৌৰৰ বিৰুদ্ধে ৰাজহুৱা মঞ্চত অপমানিত কৰাৰ অভিযোগ উত্থাপন কৰিছে। 

মূল ঘটনা অনুসৰি যোৱা সোমবাৰে হিন্দী বিভাগৰ এখন বৈঠকত বিভাগৰ মুৰব্বী অধ্যাপক ড০ ৰঞ্জিত কৌৰৰ আলোচনাৰ ওপৰত এখন নথিপত্ৰ তৈয়াৰ কৰি সকলো বিভাগীয় অধ্যাপকৰ স্বাক্ষৰ লোৱা হৈছিল। ইপিনে ডাঃ নীলমে যেতিয়া নথিপত্ৰখন স্বাক্ষৰ কৰাৰ পূৰ্বে লিখিত কথাখিনি মনোযোগেৰে পঢ়িবলৈ ধৰে, তেতিয়া বিভাগটোৰ মুৰব্বী ড০ ৰঞ্জিত কৌৰে তেওঁক নপঢ়াকৈ তৎক্ষণাৎ স্বাক্ষৰ কৰিবলৈ হেঁচা প্ৰয়োগ কৰে।

পিছত অধ্যাপিকা ড০ নীলমে স্বাক্ষৰ কৰিবলৈ অস্বীকাৰ কৰাত ক্ষুব্ধ হৈ মূৰব্বী অধ্যাপক ড০ ৰঞ্জিত কৌৰে সভাত সকলোৰে সন্মুখত তেওঁক চৰ মাৰিছিল। ইপিনে, অভিযুক্ত অধ্যাপক ড০ ৰঞ্জিত কৌৰে এই সকলো অভিযোগ স্পষ্টভাৱে অস্বীকাৰ কৰিছে। ড০ ৰঞ্জিতে স্পষ্ট কৰি দিছিল যে তেওঁ ইচ্ছাকৃতভাৱে একো কৰা নাছিল। পৰৱৰ্তী সময়ত ড০ নীলমে আৰক্ষী আৰু মহাবিদ্যালয়ৰ ওচৰত মুৰব্বী অধ্যাপক গৰাকীৰ বিৰুদ্ধে অভিযোগ দাখিল কৰে।

আনহাতে, ছাত্ৰ সন্থা এছএফআইয়ে লক্ষ্মীবাই মহাবিদ্যালয়ৰ সন্মুখত ঘটনাটোৰ বিৰুদ্ধে প্ৰতিবাদ সাব্যস্ত কৰে। ছাত্ৰ সংগঠনটোৱে অভিযোগ কৰিছিল যে ড০ নীলমক এনেদৰে দুৰ্ব্যৱহাৰ কৰা হৈছিল কাৰণ তেওঁ এগৰাকী নিম্নজাতিৰ মহিলা আছিল। লগতে ছাত্ৰ সংগঠনটোৱে দিল্লী বিশ্ববিদ্যালয় প্ৰশাসনক গোচৰটোৰ তদন্ত কৰিবলৈ আৰু ড০ ৰঞ্জিত কৌৰৰ বিৰুদ্ধে ব্যৱস্থা গ্ৰহণ কৰিবলৈ দাবী উত্থাপন কৰে।