ক্ৰীড়া ভাৰতী গুৱাহাটী মহানগৰৰ সৌজন্যত বিনামূলীয়া ভেকছিন প্ৰদান কাৰ্যসূচী

গুৱাহাটী ১৬ জুন: ক্ৰীড়া ভাৰতী গুৱাহাটী মহানগৰৰ সৌজন্যত গুৱাহাটীৰ আৰ জি বৰুৱা ক্ৰীড়া কমপ্লেক্সৰ ডি টি আৰ পি আভ্যন্তৰীণ ষ্টেডিয়ামত ১৫ আৰু ১৬ জুন তাৰিখে দুদিনীয়া ভেকছিন প্ৰদান কাৰ্যসূচী অনুষ্ঠিত কৰা হৈছে। ১৫ তাৰিখে পুৱা ১০ বজাৰ আৰম্ভ হোৱা এই ভেকছিন প্ৰদান কাৰ্যসূচীত মুঠ ১৬৪ গৰাকী লোকক কভিশ্বিল্ড ভেকছিনৰ পালি প্ৰদান কৰা হয়। লগতে ১৬ তাৰিখে অৰ্থাৎ আজি পুৱা ১০ বজাৰ পৰা আৰম্ভ হোৱা ভেকছিন প্ৰদান কাৰ্যসূচী বিয়লি ৪ বজালৈ অনুষ্ঠিত কৰা হ'ব বুলি সংস্থাৰ নেতৃবৃন্দই জানিবলৈ দিয়ে। 

উক্ত ভেকছিন প্ৰদান কাৰ্যসূচী সন্দৰ্ভত সংস্থাৰ নেতৃবৃন্দই জনায় যে, "এই বিনামূলীয়া ভেকছিন প্ৰদান কাৰ্যসূচীয়ে সমাজৰ বিভিন্ন স্তৰৰ লোকক উপকৃত কৰিব। লগতে এই পদক্ষেপটোৱে সংকটৰ এই সময়ছোৱাত এক যোগাত্মক দৃষ্টিধাৰাৰে গুৰুত্বপূৰ্ণ পদক্ষেপ লবলৈ সক্ষম হ'ব আৰু সকলোৱে এক স্বাস্থ্যৱান জীৱন আৰু এখন সমৃদ্ধিশালী সমাজৰ অংশীদাৰ হ'ব পাৰিব।"

আনহাতে আগন্তুক ১৭ আৰু ১৮ জুন তাৰিখে অসম অলিম্পিক সন্থাৰ তৰফৰ পৰাও আৰ জি বৰুৱা ক্ৰীড়া কমপ্লেক্সৰ ডি টি আৰ পি ইণ্ডোৰ ষ্টেডিয়ামত সমাজৰ বিভিন্ন স্তৰৰ লোকক ভেকছিন প্ৰদান কৰা হ'ব বুলি সন্থাৰ নেতৃবৃন্দই জানিবলৈ দিয়ে। ইয়াৰ বাবে সকলোৱে অনলাইন যোগে পঞ্জীয়ন কৰাটো বাধ্যতামূলক আৰু পঞ্জীয়নৰ নম্বৰ ভেকছিন কেন্দ্ৰত অৱগত কৰাব লাগিব।