গুৱাহাটী, ১৮ জুন: সাধাৰণতে বিবাহ-পাৰ্বনত দৰা-কইনাক উপহাৰ প্ৰদান কৰি শুভেচ্ছা জনোৱা দেখা যায়। কিন্তু ফ্লৰিডাৰ ডেবি নীল নামৰ এগৰাকী মহিলা গৰাকীয়ে এক উৎকৃষ্ট চিন্তাধাৰাৰে স্বামী জিম ষ্ট্ৰিকলেণ্ডৰ বিবাহ বিচ্ছেদ হোৱা প্ৰথমা পত্নীক দান কৰিলে নিজৰ শৰীৰৰ বৃক্ক, কিয়নো বিশাল হৃদয়ৰ মহিলা গৰাকীয়ে কয় যে, বিবাহৰ উপহাৰ গ্ৰহণ কৰাতকৈ কাৰোবাক দিয়াটোহে বেছি উপযোগী। দৰাচলতে মহিলা গৰাকীয়ে জীৱন দানেৰে আটাইতকৈ ডাঙৰ উপহাৰ প্ৰদান কৰাত সকলোৱে আৱেগিক হৈ পৰিছে। 

ডেবি আৰু জিম ষ্ট্ৰিকলেণ্ড প্ৰায় এটা দশক ধৰি এটা নিষ্ঠাৱান দম্পতী হিচাপে সময় অতিবাহিত কৰিছিল। তেওঁলোকৰ প্ৰেমৰ সময়ছোৱাত, জিমে তেওঁৰ প্ৰাক্তন পত্নী মাইলেন মেৰ্থেৰ সৈতে এক সৌহাৰ্দ্যপূৰ্ণ সম্পৰ্ক বজাই ৰাখিছিল, লগতে তেওঁলোকৰ দুই সন্তানক কোনো কষ্ট নোহোৱাকৈ ডাঙৰ-দীঘল কৰিছিল। 

আনহাতে জিমৰ প্ৰথমা তথা প্ৰাক্তন পত্নী দীৰ্ঘদিন ধৰি বৃক্কৰ ৰোগত আক্ৰান্ত হৈ আছিল আৰু প্ৰায় একে সময়তে মহিলা গৰাকীৰ ছোৱালী গৰাকীয়েও গৰ্ভৱতী হোৱাত কোনো ধৰণৰ সহায় পাবলৈ সক্ষম হোৱা নাছিল। যেতিয়া জিমে প্ৰথম পত্নীৰ বৃক্ক দুটিয়ে স্বাভাৱিক ক্ষমতাৰ মাত্ৰ ৮ শতাংশ হাৰতহে কাম কৰি থকা বুলি জানিব পাৰিছিল, তেতিয়া মাইলেনে এটা বৃক্ক সংৰোপণ কৰাৰ বাহিৰে অন্য় কোনো উপায় নাছিল বুলি চিকিৎসকে জানিবলৈ দিছিল। চিকিৎসালয়ৰ লগতে জিমেও বৃক্ক দাতাৰ সন্ধান চলাই থাকোতে জিনৰ নতুন পত্নী ডেবিয়ে চিন্তা কৰিলে যে, "যদি মাইলেনৰ ছোৱালীগৰাকীৰ শিশুটিয়ে আইটাক বুলি ক'ব নোৱাৰিলে, মোৰ বহুত বেয়া লাগিব।"

সেয়েহে ডেবিয়ে এই সকলোবোৰ কথা চিন্তা কৰি বিয়া হোৱা মাত্ৰ দুদিন পিছতে নিজ শৰীৰৰ এটি বৃক্ক স্বামীৰ প্ৰাক্তন পত্নী গৰাকীক দান কৰি নতুন জীৱন প্ৰদান কৰে।বৰ্তমানে সফল বৃক্ক সংৰোপণৰ অস্ত্ৰোপচাৰ সম্পন্ন হোৱাৰ পিছত সকলোৱে মাইলেন আৰু ডেবিক এটি বান্ধোনত সাঙুৰি "বৃক্ক ভগ্নী" হিচাপে নামাংকিত কৰিছে।আনহাতে মাইলেনেও নতুন জীৱন পাই নাতি জেকচনৰ লগতে জী-জোৱাইৰ সৈতে সুখত দিন কটাবলৈ আৰম্ভ কৰিছে।