গুৱাহাটী, ১৭ জুন: মেঘালয়ৰ স্বাস্থ্য বিভাগৰ তথ্য অনুসৰি ৰাজ্যখনত ১৪ বছৰ বয়সৰ তলৰ ৫,০০০ তকৈও অধিক শিশু কভিড-১৯ৰ পৰীক্ষাত পজিটিভ হিচাপে চিনাক্ত হৈছে। আনহাতে কভিড সংক্ৰমিত হৈ ১৭ জন শিশুr মৃত্যু হৈছে। স্বাস্থ্য বিষয়াসকলে সদৰি কৰা অনুসৰি, বিগত বৰ্ষৰ মহামাৰীৰ আৰম্ভণিৰ পৰা ১৪ বছৰ বয়সৰ মুঠ ৫,১০১ টা শিশুr ক'ভিড পৰীক্ষাত পজিটিভ হিচাপে চিনাক্ত হৈছে। ইয়াৰে বিগত মাহৰ ১৫ মে' ৰ পৰা সৰ্বাধিক সংখ্যাৰে প্ৰায় ২,৯৫০ টা শিশুৱে ক'ভিড-১৯ পৰীক্ষাত পজিটিভ হিচাপে চিনাক্ত হৈছে। আনহাতে ৪,৩৪৪ টা শিশুৰ কভিডৰ পৰা আৰোগ্য হোৱাৰ লগতে ৰাজ্যখনত কভিডৰ ফলত ১৭ টা শিশুৰ মৃত্যু হোৱাৰ খবৰে সকলোকে আতংকিত কৰি তুলিছে। 

শেহতীয়াকৈ কভিডত মৃত্যু হোৱা শিশু কেইজন পূৱ গাৰো পাহাৰ জিলাৰ বুলি জানিব পৰা গৈছে। য'ত মাহৰ আৰম্ভণিতে এগৰাকী ৪ বছৰীয়া কন্যা শিশু কভিডত আক্রান্ত হৈ মৃত্যুবৰণ কৰিছিল।আনহাতে, স্বাস্থ্য আৰু পৰিয়াল কল্যাণ মন্ত্ৰী আলেকজেণ্ডাৰ লালু হেকে উক্ত ঘটনা সন্দৰ্ভত কয় যে, "ৰাজ্যখনত বৰ্তমানলৈ কভিড-১৯ত কোনো নৱজাতক আক্রান্ত হোৱা নাই।” মন্ত্রী গৰাকীয়ে লগতে কয় যে, "শিশুসকলৰ মাজত কভিড-১৯ৰ বৰ্ধিত সংক্ৰমণৰ কথা বিবেচনা কৰি চৰকাৰে শ্বিলঙৰ গণেশ দাস চিকিৎসালয়, পশ্চিম গাৰো পাহাৰৰ তুৰা আৰু পশ্চিম জয়ন্তীয়া পাহাৰৰ জোৱাইত একোখনকৈ শিশু কভিড চিকিৎসালয় স্থাপনৰ সিদ্ধান্ত গ্ৰহণ কৰিছে।"

বৰ্তমান ৰাজ্য চৰকাৰৰ স্বাস্থ্য ভড়ালত আৰু এসপ্তাহৰ বাবেহে পৰ্যাপ্ত সংখ্যক কভিড ভেকছিন মজুত আছে বুলি মন্ত্রী গৰাকীয়ে উল্লেখ কৰে। তেওঁ লগতে কয় কয় যে, কেন্দ্ৰই ২১ জুনৰ পিছত ৰাজ্যখনলৈ অধিকসংখ্যক ভেকছিনৰ ড'জ প্ৰদান কৰিব বুলি আশ্বাস প্ৰদান কৰিছে। ৰাজ্যখনত বৰ্তমানলৈ ৪৩,২৫৩ টা ক'ভিড পজিটিভ গোচৰ পঞ্জীয়ন কৰা হৈছে, লগতে ৩৮,০৩২ জন লোক ক'ৰনামুক্ত হোৱাৰ তথ্য প্ৰকাশিত হৈছে। আনহাতে ক'ভিড-১৯ ৰ ফলত ৰাজ্যখনত ৭৫৮ জনৰ মৃত্যু হোৱাৰ তথ্য পোৱা গৈছে।