গুৱাহাটী, ২২ জুন: বিশ্বৰ ভিতৰতে আটাইতকৈ ক্ষতিগ্ৰস্ত হোৱা দেশ ইটালীত ২৮ জুনৰ পৰা সকলোৱে মাস্ক পৰিত্যাগ কৰিব। ইটালীৰ স্বাস্থ্য মন্ত্ৰালয়ে এক বিবৃতিযোগে কয় যে, "২৮ জুনৰ পৰা ইউৰোপৰ অন্যতম দেশ ইটালীত মাস্ক পিন্ধাটো আৰু বাধ্যতামূলক নহ'ব, কিয়নো উক্ত দেশখনত ৪৬ নিযুতৰো অধিক ভেকছিনৰ পালি প্ৰদান কৰা হৈছে।

ইটালীৰ স্বাস্থ্য মন্ত্ৰী ৰবেৰ্টো স্পেৰাঞ্জাই সামাজিক মাধ্যমত উল্লেখ কৰিছে যে, "দেশখনত কৰ’না ভাইৰাছৰ অগ্রগতিৰ নিৰীক্ষণ কৰিবলৈ শ্ৰেণীবিভাজন প্ৰণালীৰ অধীনত "বগা" লেবেল লগোৱা অঞ্চলবোৰত মাস্ক পিন্ধাৰ প্ৰয়োজনীয়তা উঠাই লোৱা হ'ব। উক্ত প্ৰণালীৰ ভিতৰত দূৰৈত থকা উত্তৰ-পশ্চিমৰ ক্ষুদ্ৰ আওষ্টা উপত্যকাৰ বাহিৰে ইটালীৰ সকলো চহৰ, অঞ্চল অন্তৰ্ভুক্ত হৈ আছে। 

ইটালীৰ কমিটাটো টেক্নিকো চাইণ্টিফিকো (চিটিএছ)ৰ বৈজ্ঞানিকসকলৰ এক পৰামৰ্শমূলক বৈঠকৰ অন্তত স্পেৰাঞ্জাই উক্ত সিন্ধান্তটো গ্ৰহণ কৰে। য'ত কোৱা হৈছিল যে, "বৃহৎ জনসমাৱেশৰ বাবে ভাইৰাছ বিয়পাৰ অধিক আশংকা আছে, কিন্তু ২৮ জুনলৈ সংক্ৰমণৰ হাৰ কমি সমগ্ৰ ইটালীকে 'বগা অঞ্চল' হিচাপে শ্ৰেণীবদ্ধ কৰা হ'ব পাৰে।"

বৰ্তমান ইটালীত বিগত ২৪ ঘন্টাত মাত্ৰ ২১ জন ক'ভিড আক্রান্ত লোকৰ মৃত্যু হোৱাৰ পৰিৱৰ্তে ৪৯৫ জন লোক নতুনকৈ সংক্ৰমিত হৈছে। ২০২০ চনৰ আৰম্ভণিতে ক'ভিড মহামাৰীৰ ফলত ইটালীত ৪.২৫ নিযুত লোক কভিডত আক্রান্ত হোৱাৰ পৰিৱৰ্তে ১,২৭,২৯১ জন লোকৰ কভিডত মৃত্যু হৈছিল। বৰ্তমানলৈ, ইটালীত ১২ বছৰতকৈ অধিক বয়সৰ ৩০ শতাংশ লোকক ভেকছিন প্ৰদান কৰা হৈছে। অৰ্থাৎ দেশখনৰ ৬০ নিযুত জনসংখ্যাৰ ভিতৰত প্ৰায় ১৬ নিযুত লোকক ভেকছিন প্ৰদান কৰা হৈছে।