কৌতুক-অভিনেত্ৰী হোৱাৰ পূৰ্বে যথেষ্ট প্ৰত্যাহ্বানৰ সন্মুখীন হ'বলগীয়া হৈছিল ভাৰতী সিং; নিজ মুখে ক'লে সকলো কথা

গুৱাহাটী, ৩ জুলাই: টেলিভিজনৰ জনপ্রিয় কৌতুক অভিনেত্ৰী ভাৰতী সিঙে আজি ৩৭ তম জন্মদিন উদযাপন কৰে। ভাৰতীয়ে দীৰ্ঘদিনৰ পৰা দূৰদৰ্শনত এক স্থিৰতা বৰ্তাই ৰাখিবলৈ সক্ষম হৈছে আৰু দেশৰ আটাইতকৈ জনপ্ৰিয় কৌতুক অভিনেতা-অভিনেত্ৰী সকলৰ মাজত সদায়ে নিজৰ স্থান অক্ষুন্ন ৰাখিছে। কিন্তু সকলোকে হাঁহি বিলোৱা কৌতুক-অভিনেত্ৰী গৰাকীৰ আৰম্ভণিতে জীৱন যাত্ৰা ইমান সহজ নাছিল। কৌতুকৰ জগতত নিজৰ কৰ্মজীৱন আৰম্ভ কৰাৰ পূৰ্বে ভাৰতী সিঙৰ লগতে পৰিয়ালবৰ্গই নানান কটু বাক্য শুনিবলগীয়া হৈছিল। ভাৰতীৰ লগতে পৰিয়ালবৰ্গকো আত্মীয়সকলে বৰ্জন কৰিবলৈ আৰম্ভ কৰিছিল। 

ভাৰতী সিং আৰু তেওঁৰ স্বামী হৰ্ষ লিম্বাচিয়াক সঘনাই বিভিন্ন ৰিয়েলিটি শ্ব'ত সঞ্চালনা কৰা দেখা যায়। আনহাতে, বৰ্তমানে চলি থকা "ডান্স দিৱানে" নামৰ ৰিয়েলিটি শ্ব'টোত হাৰিয়ানাৰ এগৰাকী প্ৰতিযোগীয়ে ভাৰতৰ শ্ৰেষ্ঠ নৃত্যশিল্পীৰ কাহিনী বৰ্ণনা কৰাৰ পিছত ভাৰতীয়েও নিজৰ অতীতৰ কথাবোৰ মনত পেলাই কৈছিল, "যেতিয়া মই এটা কমেডি ৰিয়েলিটি শ্ব'ত নিৰ্বাচিত হোৱাৰ পিছত মুম্বাইলৈ আহিবলৈ প্ৰস্তুতি চলাই আছিলো, আমাৰ আত্মীয়সকলে আমাক বৰ্জন কৰিছিল। সকলোৱে মোৰ কৰ্মজীৱনটোক লৈ ঠাট্টা-মস্কৰা কৰিছিল। সকলোৱে মোক কৈছিল, মই মানুহক হাঁহিবলৈ বাধ্য কৰাও আৰু মোৰ সৈতে কোনেও বিয়া নকৰিব।"

লগতে ভাৰতীয়ে কৈছিল, "মোৰ দেউতাৰ মৃত্যু হোৱাৰ পিছত, মোৰ মা যথেষ্ট অকলশৰীয়া হৈ পৰিছিল। আমি অতি দৰিদ্ৰ পৰিৱেশত ডাঙৰ-দীঘল হৈছো। মোৰ মায়ে আমাৰ বাবে যথেষ্ট সংগ্ৰাম কৰিছিল। আনৰ ঘৰত ৰান্ধনী হিচাপে কাম কৰি আমাক পোহপাল দি ডাঙৰ-দীঘল কৰিছিল। যেতিয়া মই "লাফটাৰ চেলেঞ্জ" নামৰ ৰিয়েলিটি শ্ব'টোৰ বাবে নিৰ্বাচিত হৈছিলোঁ, মোৰ আত্মীয়সকলে মুম্বাইলৈ অহাৰ সময়ত মোক যথেষ্ট বাধা আৰোপ কৰিছিল। 

গাওঁখনৰ মানসিকতা আছিল যে চিনেমা উদ্যোগৰ প্ৰতিজন পৰিচালক তথা বলীউডৰ প্ৰযোজকবোৰে নিজৰ স্বাৰ্থ পূৰণ কৰিহে অভিনেত্রী সকলক আগুৱাই লৈ যায়। লগতে গাঁৱৰ অশিক্ষিত লোকসকলে ভাৱে যে ছোৱালীবোৰে ভুল কাম কৰিলেহে নিজৰ বাবে সুনাম অৰ্জন কৰিব পাৰে। কিন্তু মোৰ মায়ে খুব স্পষ্টকৈ কৈছিল যে তেওঁ মোক মুম্বাইলৈ লৈ যাব কিয়নো তেওঁ মোক অতীতৰ বেয়া স্মৃতিবোৰ মনত পেলাই জীৱন অতিবাহিত কৰাটো বিচৰা নাছিল।"