বড়ো মাধ্যমৰ বিদ্যালয়সমূহৰ খালী হৈ থকা শিক্ষক পদসমূহৰ বাবে হ'ব বিশেষ টেট পৰীক্ষা

কোকৰাঝাৰ, ৪ জুলাই: এদিনীয়া ভ্ৰমণসূচীৰে কোকৰাঝাৰত উপস্থিত হোৱা শিক্ষামন্ত্ৰী ডাঃ ৰণোজ পেগুৱে বিটিআৰৰ শিক্ষা খণ্ডক লৈ কৰে এক গুৰুত্বপূৰ্ণ ঘোষণা। বড়ো মাধ্যমৰ বিদ্যালয়সমূহৰ খালী হৈ থকা শিক্ষক পদসমূহ পূৰণৰ বাবে অতি শীঘ্ৰে বিশেষ টেট অনুষ্ঠিত কৰা হ'ব ৷  

বিটিআৰৰ বিভিন্ন শৈক্ষিক সমস্যাক লৈ শনিবাৰে বিটিআৰ পৰিষদীয় চৰকাৰ আৰু বিভিন্ন দল-সংগঠনৰ সৈতে হোৱা গুৰুত্বপূৰ্ণ বৈঠকৰ অন্তত শিক্ষামন্ত্ৰীগৰাকীয়ে এই কথা সদৰি কৰে ।

বিটিআৰ প্ৰধান প্ৰমোদ বড়োৰ অধ্যক্ষতাত বিটিআৰ সচিবালয়ৰ প্ৰেক্ষাগৃহত অনুষ্ঠিত এই বৈঠকত বিটিআৰ প্ৰশাসনৰ বিভিন্ন বিষয়ববীয়াৰ লগতে নিখিল বড়ো ছাত্ৰ সন্থা(এবছু), বড়ো সাহিত্য সভা(বিএছএছ) আৰু সদৌ বড়ো প্ৰাথমিক শিক্ষক সন্থাৰ প্ৰতিনিধিয়ে অংশগ্ৰহণ কৰে ৷ শনিবাৰৰ বৈঠকখনত সামগ্ৰিকভাৱে বিটিআৰ অঞ্চলৰ শৈক্ষিক সমস্যাসমূহৰ ওপৰত বিস্তৃতভাৱে আলোচনা কৰা হয় ৷