12 ছেপ্টেম্বৰত অনুষ্ঠিত হ'ব ৰাষ্ট্ৰীয় যোগ্যতা প্ৰৱেশ পৰীক্ষা (NEET),বৃদ্ধি কৰা হৈছে চেণ্টাৰৰ সংখ্যা

গুৱাহাটী,১২ জুলাই:নতুন কেন্দ্ৰীয় শিক্ষা মন্ত্ৰী ধৰ্মেন্দ্ৰ প্ৰধানে ঘোষণা কৰে যে চিকিৎসা পাঠ্যক্ৰমত নামভৰ্তিৰ বাবে নীত ইউজি (NEET UG) - ২০২১ বৰ্ষৰ পৰীক্ষা অহা ১২ ছেপ্টেম্বৰ,২০২১ তাৰিখে অনুষ্ঠিত কৰা হ'ব। কেন্দ্ৰীয় শিক্ষা মন্ত্ৰীগৰাকীয়ে কয় যে ক'ভিড-১৯ প্ৰটোকলৰ মাজেৰে ১২ ছেপ্টেম্বৰত সমগ্ৰ দেশতে ৰাষ্ট্ৰীয় যোগ্যতা প্ৰৱেশ পৰীক্ষা (এনইইটি) অনুষ্ঠিত হ'ব। আবেদন প্ৰক্ৰিয়া মঙলবাৰে সন্ধিয়া ৫ বজাৰ পৰা এনটিএৰ ৱেবছাইটৰ জৰিয়তে আৰম্ভ হ'ব।

প্ৰধানে লগতে কয় যে ক'ভিডৰ নিয়মাৱলীৰে পৰীক্ষা অনুষ্ঠিত হ'বলগীয়া চহৰৰ সংখ্যা ১৫৫ ৰ পৰা ১৯৮ লৈ বৃদ্ধি কৰা হৈছে। ২০২০ চনত ব্যৱহৃত ৩৮৬২ টা কেন্দ্ৰৰ পৰা পৰীক্ষা কেন্দ্ৰৰ সংখ্যাও বৃদ্ধি কৰা হ'ব। ক'ভিড-১৯ ৰ প্ৰট'কল নিশ্চিত কৰিবলৈ পৰীক্ষা কেন্দ্ৰৰ সকলো প্ৰাৰ্থীক মাস্ক প্ৰদান কৰা হ'ব।