চুইডেনৰ প্ৰথম মহিলা প্ৰধানমন্ত্ৰী মেগদালেনা এণ্ডাৰছন, ৩৪৯ জন সাংসদৰ ১৭৪ জনৰ বিপক্ষে ভোটদান

গুৱাহাটী, ২৫ নৱেম্বৰঃ চুইডেনৰ সংসদে বুধবাৰে মেগডেলেনা এণ্ডাৰছনক প্ৰধানমন্ত্ৰী হিচাপে নিৰ্বাচিত কৰে। তেওঁ এই পদত অধিষ্ঠিত হোৱা দেশৰ প্ৰথম গৰাকী মহিলা প্ৰধানমন্ত্ৰী হ'ব। এণ্ডাৰছনক সামাজিক গণতান্ত্ৰিক দলৰ নতুন নেতা হিচাপে নিৰ্বাচিত কৰা হৈছে। তেওঁ ষ্টিফেন লফভেনৰ স্থান ল'ব, যিয়ে এই বছৰৰ আৰম্ভণিতে প্ৰধানমন্ত্ৰী পদৰ পৰা পদত্যাগ কৰিছিল। জোচেফৱেন বৰ্তমান কাৰ্যকৰী প্ৰধানমন্ত্ৰীৰ দায়িত্বত আছে। প্ৰধানমন্ত্ৰী পদলৈ নিৰ্বাচিত হোৱাৰ আগতে এণ্ডাৰছন দেশৰ বিত্ত মন্ত্ৰী আছিল।

লিংগ সমতাৰ ক্ষেত্ৰত চুইডেন ইউৰোপৰ আটাইতকৈ প্ৰগতিশীল দেশসমূহৰ ভিতৰত স্থান লাভ কৰিছে, কিন্তু এতিয়ালৈকে কোনো মহিলাক দেশখনৰ শাসনভাৰ দিয়া হোৱা নাই। ইপিনে, এণ্ডাৰছনক সমৰ্থন কৰা এগৰাকী স্বতন্ত্ৰ সাংসদ আমিনা কাকাবাৱেহে সংসদত দিয়া ভাষণত কয়, "যদি মহিলাসকলে কেৱল ভোটদান কৰি থাকে আৰু সৰ্বোচ্চ পদলৈ নিৰ্বাচিত নহয় তেন্তে গণতন্ত্ৰ পূৰ্ণ ৰূপত প্ৰকাশ নাপাব।"

আনহাতে, নিৰ্বাচনৰ পিছত এণ্ডাৰছনে (৫৪) সংসদত কয়, "নাৰীৰ স্বাধীনতা এক গুৰুত্বপূৰ্ণ বিষয়। নাৰীসকলৰো পুৰুষ আৰু ল'ৰাৰ দৰে সমান সুযোগ আছে। মই চুইডেনৰ প্ৰথম গৰাকী মহিলা প্ৰধানমন্ত্ৰী হিচাপে নিৰ্বাচিত হৈছো আৰু আমাৰ দেশৰ মহিলাসকলৰ বাবে ইয়াৰ গুৰুত্ব জানো। চুইডেনৰ ৩৪৯ জনীয়া সংসদত ১১৭ জন সাংসদে এণ্ডাৰছনৰ সপক্ষে ভোট দান কৰে আৰু ১৭৪ জনে বিপক্ষে ভোট দান কৰে।

৫৭ জন সাংসদে ভোটদানত অংশগ্ৰহণ কৰা নাছিল যেতিয়া এজন সাংসদ অনুপস্থিত আছিল। সৰ্বাধিক, ১৭৪ জন সাংসদে এণ্ডাৰছনৰ বিৰুদ্ধে ভোট দিছিল, কিন্তু চুইডিছ সংবিধান অনুসৰি, যদি কমেও ১৭৫ জন সাংসদ এজন ব্যক্তিৰ বিৰুদ্ধে নহয়, তেন্তে তেওঁক প্ৰধানমন্ত্ৰী নিযুক্ত কৰিব পাৰি। এইটোৱে এণ্ডাৰছনক প্ৰধানমন্ত্ৰী নিৰ্বাচিত কৰাৰ পথ প্ৰশস্ত কৰিছিল। এণ্ডাৰছনে ২ টা দল, ছ'চিয়েল ডেমক্ৰেটছ আৰু গ্ৰীণ পাৰ্টিৰ সংখ্যালঘু চৰকাৰ গঠন কৰিব।