তিনিচুকীয়াত প্ৰধানমন্ত্ৰী ক্ষুদ্ৰ খাদ্য সংসাধীকৰণ উদ্যোগৰ আনুষ্ঠানিকৰণ আচঁনিৰ অধীনত সজাগতা অনুষ্ঠান

তিনিচুকীয়া: ১ ডিচেম্বৰ: অসম ৰাজ্যিক গ্ৰামীণ জীৱিকা অভিযানৰ উদ্যোগত আৰু অসম উদ্যোগীক বিকাশ নিগম গুৱাহাটীৰ সহযোগত আজি তিনিচুকীয়া জিলাৰ তিনিকোণীয়াস্থিত গোলাপচন্দ্ৰ-ৰবিচন্দ্ৰ নাট্যমন্দিৰত এখন সজাগতা তথা সংহতকৰণ কাৰ্য্যসূচী অনুষ্ঠিত হয়। অসম ৰাজ্যিক গ্ৰামীণ জীৱিকা অভিযান, জিলা উদ্যোগ আৰু বাণিজ্য কেন্দ্র তথা ৰাষ্ট্ৰীয় নগৰ জীৱিকা অভিযানৰ দ্বাৰা উন্নিত ক্ষুদ্ৰ খাদ্য উদ্যোগৰ অনুষ্ঠানিক আৰম্ভ কৰে।

 কাৰ্য্যসূচীত অসম উদ্যোগীক বিকাশ নিগম গুৱাহাটীৰ প্ৰতিনিধিয়ে প্ৰধানমন্ত্ৰী ক্ষুদ্ৰ খাদ্য সংসাধীকৰণ উদ্যোগৰ আনুষ্ঠানিকৰণ আচঁনিৰ বিষয়ে সবিশেষ তথ্য দাঙি ধৰাৰ লগতে এই আচঁনিৰ লাভালাভ তথা আবেদন প্ৰক্ৰিয়া সন্দৰ্ভত বিষদভাবে উল্লেখ কৰে। অসম ৰাজ্যিক গ্ৰামীণ জীৱিকা অভিযানৰ অধীনত এতিয়ালৈকে ১৬৯ টা এনে ক্ষুদ্ৰ উদ্যোগৰ প্ৰস্তাৱিত কৰা হৈছে। ইয়াৰে ১৭ টা উদ্যোগলৈ আগধন হিচাপে  ৫.২৮ লাখ টকা মোকলাই দিয়া হৈছে বুলিও অৱগত কৰে।

আনহাতে,  পি.এম.এফ.এম.ই আচঁনিৰ অধীনত প্ৰস্তাৱিত ২৯ টা উদ্যোগে ইতিমধ্যে অনুমোদন পাইছে। কাৰ্যসূচীত অসম ৰাজ্যিক গ্ৰামীণ জীৱিকা অভিযানৰ তৰফৰ পৰা "ONE DISTRICT ONE PRODUCT "ৰ অধীনত  তিনিচুকীয়া জিলাৰ বাবে "ASSAM LEMON" ৰ এটি সংসাধন ইউনিট গঢ়ি তোলাৰ ক্ষেত্রত  ডি.পি.আৰ প্ৰস্তুতিৰ বাবে উপস্থিত সকলো সংশ্লিষ্ট বিভাগসমূহৰ সহযোগিতা কামনা কৰে।

এই সংসাধন ইউনিটটোয়ে টেঙা খেতিয়কসকলক সহায় কৰাৰ লগতে শীৰ্ষ উৎপাদন কালত এখন উপযুক্ত বজাৰ লাভত সহায়ক হ’ব বুলি আশা প্ৰকাশ কৰিছে। আজিৰ কাৰ্যসূচীত কৃষি বিজ্ঞান কেন্দ্ৰ, টেঙা গৱেষণা কেন্দ্ৰ,তিনিচুকীয়া তথা  অসম উদ্যোগীক বিকাশ নিগম গুৱাহাটীৰ প্ৰতিনিধিসকল, জিলা উদ্যোগ আৰু বাণিজ্য কেন্দ্রৰ মহাপ্ৰৱন্ধক, মুখ্য জিলা প্ৰৱন্ধক, ৰাষ্ট্ৰীয় নগৰ জীৱিকা ভিযানৰ  প্ৰকল্প প্ৰৱন্ধক উপস্থিত থাকে।