গোৱালপাৰাৰ লক্ষীপুৰৰ বোকাময় পুখুৰীত আৱদ্ধ ৬ টা হাতী

গুৱাহাটী, ৩ ডিচেম্বৰঃ বৃহস্পতিবাৰে গোৱালপাৰা জিলাৰ লক্ষীপুৰৰ এটা বোকাময় পুখুৰীত পানী খাবলৈ অহা ৫ টা হাতীক বন বিভাগৰ লোকে কোনোমতে উদ্ধাৰ কৰাৰ পিছত নিশা পুনৰ একেটা পুখুৰীতে পানীৰ সন্ধানত  ওলাই অহা আন ৬ টা হাতী পুখুৰীটোত সোমাই পৰে। শুকুৰবাৰে পুৱা পৰ্যন্ত বনৰীয়া হাতীকেইটা বোকাময় পুখুৰীত আৱদ্ধ হৈ আছে। অৱশ্যে, আৱদ্ধ হাতীকেইটা উদ্ধাৰ কৰিবলৈ বন বিভাগৰ লোক ঘটনাস্থলীত উপস্থিত হৈছে।

লক্ষণীয়ভাৱে, বৃহস্পতিবাৰে বন বিষয়াসকলে স্থানীয় লোকৰ সহায়ত পাঁচটা বনৰীয়া হাতী পুখুৰীটোৰ পৰা উদ্ধাৰ কৰে। খবৰ অনুসৰি, বুধবাৰে নিশা গোৱালপাৰা জিলাৰ লক্ষীপুৰৰ ওচৰৰ চৈবাৰী অঞ্চলৰ এটা বোকা পুখুৰীত এটা পোৱালিসহ পাঁচটা বনৰীয়া হাতী আৱদ্ধ হৈ পৰিছিল। 

স্থানীয় লোকে কৈছিল যে হাতীৰ এটা জাক খাদ্যৰ সন্ধানত মেঘালয়ৰ ফালৰ পৰা ওচৰৰ পাহাৰীয়া অঞ্চলৰ পৰা অঞ্চলটোলৈ নামি আহিছিল আৰু জাকটোৰ ভিতৰৰ পাঁচটা হাতী পুখুৰীত পৰি আৱদ্ধ হৈ পৰিছিল। তাৰ পিছত স্থানীয় গাওঁবাসীয়ে বৃহস্পতিবাৰে পুৱা ঘটনাটো লক্ষ্য কৰি লগে লগে স্থানীয় বন বিষয়া আৰু আৰক্ষীক অৱগত কৰিছিল।