কৃষকক ক্ষমা-প্ৰাৰ্থনা বিচাৰিবলৈ পঞ্জাৱত কংগনা ৰাণাৱটক আগুৰি ধৰিলে জনতাই

গুৱাহাটী, ৪ ডিচেম্বৰঃ কৃষকসকলে কেন্দ্ৰৰ বিতৰ্কিত কৃষি আইনৰ বিৰুদ্ধে প্ৰতিবাদ কৰি থকা কৃষকসকলৰ বিৰুদ্ধে কংগনাই কৰি অহা মন্তব্যৰ বাবে কৃষকক ক্ষমা খুজিবলৈ শুক্ৰবাৰে পঞ্জাৱৰ কিৰাটপুৰ চাহিবত উত্তেজিত জনতাই অভিনেত্ৰী গৰাকীৰ বাহনখন ঘেৰি ধৰে। গেৰুৱা দলটোৰ এগৰাকী উৎসাহী সমৰ্থক কংগনা ৰাণাৱটে কৃষকৰ অধিকাৰ আৰু সমতাৰ বিৰুদ্ধে প্ৰতিবাদ কৰা কৃষকসকলৰ ওপৰত তেওঁৰ মন্তব্য আগবঢ়াই আহিছিল। কংগনাই প্ৰায়ে কৃষকসকলক সন্ত্ৰাসবাদী, খালিস্তানি আৰু অসামাজিক উপাদান বুলি আঙুলিয়াই দি আহিছিল।

ইপিনে, উক্ত ঘটনা সন্দৰ্ভত অভিনেত্রী গৰাকীয়ে কয়, "মোক ইয়াত জনতাই আগুৰি ধৰিছে। তেওঁলোকে মোক গালি-গালাজ পাৰিছে আৰু মোক হত্যাৰ ভাবুকিও দিছে। যদি মোৰ লগত নিৰাপত্তা নাথাকে তেন্তে কি হ'ব। ইয়াৰ পৰিস্থিতি অবিশ্বাস্য। মই এজন ৰাজনীতিবিদ নেকি? এই আচৰণ কিহৰ বাবে?"কংগনাই লগতে কয় যে, "আৰক্ষীৰ উপস্থিতি স্বত্বেও, প্ৰতিবাদকাৰী জনতাৰ দ্বাৰা মোক আগবাঢ়ি যাবলৈ অনুমতি দিয়া নাছিল।"

অৱশ্যে, পৰৱৰ্তী সময়ত কংগনাই কেইগৰাকীমান মহিলা প্ৰতিবাদকাৰীৰ সৈতে বাৰ্তালাপ কৰাৰ পিছত অঞ্চলটো এৰিবলৈ সক্ষম হৈছিল। ইপিনে, উত্তেজিত কৃষকে ৰাণাৱটৰ গাড়ীৰ কোনো ক্ষতি কৰা নাছিল বুলি আৰক্ষীয়ে জানিবলৈ দিয়ে। 

ঘটনা সন্দৰ্ভত কীৰ্তি কিষাণ মৰ্চাৰ নেতা বীৰ সিঙে কয়, "আমি শুক্ৰবাৰে দুপৰীয়া প্ৰায় ২.১৫ বজাত অভিনেতা কংগনাক ঘেৰাও কৰিছিলো আৰু কৃষকসকলৰ বিৰুদ্ধে কৰা মন্তব্য আৰু কৃষি আইন বাতিলৰ বাবে কৃষকসকলৰ ওচৰত ক্ষমা বিচৰাতহে তেওঁক আবেলি প্ৰায় ৪ বজাত যাবলৈ দিছিলো। মহিলা কৃষকৰ এটা দল আলোচনাৰ বাবে তেওঁৰ গাড়ীৰ ওচৰত উপস্থিত হৈছিল আৰু অৱশেষত কংগনাই ক্ষমা বিচাৰিছিল।"