নগালেণ্ডত ১৩জন কয়লাখনিৰ বনুৱাসহ সেনাৰ মৃত্যু, অসম ৰাইফলছ আৰু নাগালেণ্ডৰ স্থানীয় লোকৰ মাজত সংঘৰ্ষ

গুৱাহাটী,৫ ডিচেম্বৰ: শনিবাৰে নগালেণ্ডৰ তিৰু - অ’টিং পথত অসম ৰাইফলছৰ সেনা আৰু স্থানীয় লোকসকলৰ মাজত সংঘৰ্ষৰ পৰিণতিত এজন জোৱানসহ কমেও ১৩ জন লোক নিহত হয়।

নিৰাপত্তা ৰক্ষী বাহিনীৰ লোকে নগালেণ্ডৰ এনএছচিএন-কেৰ উগ্ৰপন্থী বুলি সন্দেহ কৰা দুজন লোকক গুলীয়াই হত্যা কৰিছিল।ঘটনাটোত ক্ষুব্ধ হৈ স্থানীয় লোকে জোৱানসকলক মাচেট আৰু অন্যান্য চোকা অস্ত্ৰৰে আক্ৰমণ কৰে, য'ত এজন জোৱান নিহত হয় আৰু আন ছয়জন আহত হয়। স্থানীয় লোকসকলে জোৱানসকলৰ বাহনখনত জুই লগাই দিছিল বুলি জানিব পৰা গৈছে। 

স্থানীয় লোকসকলৰ আক্ৰমণৰ প্ৰতিশোধ স্বৰূপে অসম ৰাইফলছে গুলীচালনা কৰে য'ত ১৪ জন লোক নিহত হয় বুলি জানিব পৰা গৈছে।ইফালে, নগালেণ্ডৰ মুখ্যমন্ত্ৰী নেইফিউ ৰিঅ'ই ঘটনাটোক দুৰ্ভাগ্যজনক বুলি অভিহিত কৰি গৰিহণা দিছে। তেওঁ লগতে বিষয়টো তদন্ত কৰিবলৈ এক উচ্চ পৰ্যায়ৰ বিশেষ অনুসন্ধান দল (এছআইটি)ক আশ্বাস দিয়ে।