মহামাৰী ক'ভিড-১৯ৰ সংক্ৰমণ তথা আক্ৰান্ত হৈ মৃত্যুৰ আশংকা হ্ৰাস কৰিব পাৰে ভিটামিন ডি'য়ে

গুৱাহাটী, ১৬ ছেপ্টেম্বৰঃ ক'ৰনা ভাইৰাছৰ দ্বাৰা সংক্ৰমিত হোৱাৰ পূর্বে শৰীৰত সঠিক পৰিমাণৰ ভিটামিন-ডিয়ে গুৰুতৰ ক'ভিড-১৯ ৰ পৰা সুস্থ কৰি তোলাৰ লগতে আৰু মৃত্যু প্ৰতিৰোধ কৰিব পাৰে বুলি শেহতীয়াকৈ এক আন্তৰ্জাতিক অধ্যয়নত প্ৰকাশ পাইছে। আয়াৰলেণ্ডৰ ট্ৰিনিটি কলেজ, স্কটলেণ্ডৰ এডিনবাৰ্গ বিশ্ববিদ্যালয় আৰু চীনৰ ঝেজিয়াং বিশ্ববিদ্যালয়ৰ এটা দলে প্ৰথমবাৰৰ বাবে অতিবেঙুনীয়া বি (ইউ ভি-বি) বিকিৰণৰ ভৱিষ্যতবাণী অনুসৰি এই অধ্যয়ন কৰিছিল। 

বৈজ্ঞানিক প্ৰতিবেদনত প্ৰকাশিত কাকতখনে পৰামৰ্শ দিয়ে যে ভিটামিন ডি-য়ে গুৰুতৰ ক'ভিড-১৯ৰ লগতে আৰু মৃত্যুৰ আশংকা যথেষ্ট হ্ৰাস কৰে। পূৰ্বৱৰ্তী অধ্যয়নবোৰত ভিটামিন-ডিৰ অভাৱক ভাইৰেল আৰু বেক্টেৰিয়াৰ শ্বাসতন্ত্ৰৰ সংক্ৰমণৰ প্ৰতি বৰ্ধিত সংবেদনশীলতাৰ সৈতে সম্পৰ্কিত কৰিছিল। একেদৰে, কেইবাটাও পৰ্যৱেক্ষণমূলক অধ্যয়নত ভিটামিন-ডিৰ অভাৱ আৰু ক'ভিড-১৯ ৰ মাজত এক শক্তিশালী সম্পৰ্ক পোৱা গৈছে।

চেফডৰ বাৰ-ইলান বিশ্ববিদ্যালয়ৰ আজৰিয়েলি ফেকাল্টি অফ মেডিচিন আৰু ইজৰাইলৰ নাহাৰিয়াৰ গালীল চিকিৎসা কেন্দ্ৰৰ (জিএমচি) গৱেষকসকলে কৰা এক অধ্যয়নত দেখুওৱা হৈছে যে, "ভিটামিন ডি-ৰ পৰিমাণ কম থকা লোকসকলৰ ক'ভিড-১৯ ত আক্ৰান্ত হৈ মৃত্যু হোৱাৰ সম্ভাৱনা কমেও ২০ শতাংশ অধিক থাকে।"

গৱেষণাকাৰী দলটোৱে লগতে পৰ্যবেক্ষণ কৰিছিল যে, ক'ভিড-১৯ ত সংক্ৰমিত হোৱাৰ আগতে ভিটামিন ডি-ৰ অভাৱ হোৱাৰ ফলত ক'ৰনা ভাইৰাছ অধিক তীব্ৰতৰ হৈ উঠাৰ লগতে ৰোগীজনৰ মৃত্যুৰ আশংকা বৃদ্ধি হয়।