দৰঙ জিলাৰ বিভিন্ন অঞ্চলৰ উপৰিও বৰপেটাত জাৰি কৰা হ'ল ১৪৪ ধাৰা,সষ্টম হৈ পৰিছে আৰক্ষী

গুৱাহাটী, ২৪ ছেপ্তেম্বৰ : দৰঙ জিলাত অসম চৰকাৰৰ প্ৰস্তাৱিত কৃষি প্ৰকল্প গৰুখুটিত বৃহস্পতিবাৰে চলা উচ্ছেদৰ সময়ত সৃষ্টি হোৱা হিংসাত্মক পৰিস্থিতিয়ে এতিয়া সমগ্ৰ অসমতে তীব্ৰ প্ৰতিক্ৰিয়াৰ সৃষ্টি কৰিছে ৷

গৰুখুটিকাণ্ডৰ পাছতে বৰপেটাত জাৰি কৰা হৈছে ১৪৪ ধাৰা।সাম্প্ৰতিক পৰিস্থিতৰ প্ৰতি লক্ষ্য ৰাখি এতিয়া ৰাজ্য চৰকাৰ সষ্টম হৈ পৰিছে৷ গৰুখুটিত সংঘটিত হোৱা ঘটনাটো স্পৰ্শকাতৰ হৈ পৰাৰ পাছতে বৰপেটা জিলা প্ৰশাসনে জিলাখনত ১৪৪ ধাৰা জাৰি কৰিছে যাতে পৰিস্থিতি নিয়ন্ত্ৰণাধীন হৈ থাকে ৷ বৰপেটা জিলাত যাতে ৰাজহুৱা শান্তি বিঘ্নিত নহয় তাৰ বাবে বৰপেটা জিলা উপায়ুক্ত তেজপ্ৰসাদ ভূশালে এক নিদেৰ্শনাযোগে জিলাখনত জাৰি কৰিছে ১৪৪ ধাৰা ৷ইয়াৰ জৰিয়তে জিলাখনত প্ৰতিবাদ, সভা, শোভাযাত্ৰা আদি নিষিদ্ধ কৰাৰ লগতে ৫ জন বা ৫ জনতকৈ অধিক লেকৰ সমাগমৰ ক্ষেত্ৰত বাধা আৰোপ কৰা হৈছে ৷

আনহাতে জিলাখনত যিকোনো সংগঠনৰ দ্বাৰা গ্ৰহণ কৰা সকলো আন্দোলনৰ কাৰ্যসূচীৰ ওপৰতো বাধা নিষেধ আৰোপ কৰা হৈছে ৷জিলাখনত জাৰি কৰা ১৪৪ ধাৰা ভংগ কৰা সকলৰ বিৰুদ্ধে প্ৰয়োজনীয় শাস্তিমূলক ব্যৱস্থা গ্ৰহণ কৰা হ’ব বুলিও সকিয়নি প্ৰদান কৰিছে জিলা উপায়ুক্ত তেজ প্ৰসাদ ভূশালে ৷