কপিল শৰ্মাক কোটি টকাৰ প্ৰতাৰণা কৰা গাড়ী ডিজাইনাৰ দিলীপ ছাব্ৰিয়াৰ পুত্ৰক গ্ৰেপ্তাৰ

গুৱাহাটী, ২৭ ছেপ্টেম্বৰঃ মুম্বাই আৰক্ষীয়ে শনিবাৰে জনপ্ৰিয় কৌতুক অভিনেতা কপিল শৰ্মাৰ অভিযোগৰ ভিত্তিত পঞ্জীয়ন কৰা এক প্ৰৱঞ্চনাৰ গোচৰত গাড়ী ডিজাইনাৰ দিলীপ ছাব্ৰিয়াৰ পুত্ৰ বনিটো ছাব্ৰিয়াক গ্ৰেপ্তাৰ কৰে। 

কোটি টকা প্ৰৱঞ্চনাৰ অভিযোগৰ তদন্ত কৰা বিষয়াজনে জানিবলৈ দিয়ে যে, "অপৰাধ শাখাৰ বিষয়াসকলে অভিযুক্তক গোচৰটোৰ সন্দৰ্ভত সোধা-পোছাৰ বাবে মাতি পঠিয়াইছিল। তেওঁলোকক জেৰাৰ পিছত গ্ৰেপ্তাৰ কৰা হৈছিল।" বিষয়াজনে লগতে কৈছিল যে, "শৰ্মাই যোৱা বছৰ মুম্বাই আৰক্ষীৰ ওচৰত অভিযোগ দাখিল কৰিছিল যে দিলীপ ছব্ৰিয়াসহ আন লোকসকলে তেওঁক ৫.৩ কোটি টকাৰ প্ৰতাৰণা কৰিছিল।

কপিল শৰ্মাই তেওঁ নিজৰ বাবে ভেনিটি বাছ ডিজাইন কৰিবলৈ ২০১৭ চনৰ মাৰ্চ আৰু মে'  মাহৰ ভিতৰত ছাব্ৰিয়াক ৫ কোটি টকা দিছিল। কিন্তু ছাব্ৰিয়াই ২০১৯ চনলৈকে একো কাম নকৰাত, কপিল শৰ্মাই ৰাষ্ট্ৰীয় কোম্পানী আইন ন্যায়াধিকৰণৰ (এনচিএলটি) কাষ চাপিছিল।

অৱশ্যে, ছাব্ৰিয়াই যোৱা বছৰ শৰ্মালৈ ভেনিটি বাছৰ পাৰ্কিং চাৰ্জ হিচাপে ১.২০ কোটি টকাৰ বিল প্ৰেৰণ কৰিছিল যাৰ পিছত তেওঁ আৰক্ষীৰ কাষ চাপিছিল আৰু অভিযোগ দাখিল কৰিছিল। গোচৰটোত জেৰাৰ সময়ত বনিটো ছাব্ৰিয়াৰ ভূমিকা পোহৰলৈ আহিছিল। সেয়েহে তেওঁক সোধা-পোছাৰ বাবে মাতি অনা হৈছিল আৰু পৰৱৰ্তী সময়ত অপৰাধ শাখাই গ্ৰেপ্তাৰ কৰিছিল। যোৱা বছৰ মুম্বাই আৰক্ষীৰ অপৰাধ শাখাই বহু কোটি টকাৰ বিত্তীয় কেলেংকাৰীৰ সন্দৰ্ভত দিলীপ ছাব্ৰিয়াক গ্ৰেপ্তাৰ কৰিছিল।