ৰাজ্যৰ স্বাস্থ্যখণ্ডত নতুনকৈ সংযোজন হ'ল আন এক অত্যাধুনিক চিকিৎসা সেৱা, উপ-ৰাষ্ট্ৰপতিয়ে কৰিলে মুকলি

গুৱাহাটী, ৩ অক্টোবৰ : ৰাজ্যৰ স্বাস্থ্যখণ্ডত নতুনকৈ সংযোজন হ'ল আন এক অত্যাধুনিক চিকিৎসা সেৱা । বিশেষকৈ কৰ্কট ৰোগীৰ চিকিৎসাৰ বাবে মুকলি কৰা হৈছে এই অত্যাধুনিক সেৱা । উপ-ৰাষ্ট্ৰপতি এম ভেংকায়া নাইডুৱে দেওবাৰে গুৱাহাটী চিকিৎসা মহাবিদ্যালয় আৰু চিকিৎসালয়ৰ ৰাজ্যিক কৰ্কট প্ৰতিষ্ঠানত আনুষ্ঠানিকভাৱে মুকলি কৰে অত্যাধুনিক পেট-এম আৰ আই শাখা।উত্তৰ-পূৰ্বাঞ্চলৰ ভিতৰত প্ৰথমবাৰৰ বাবে এই সেৱা মুকলি কৰা হৈছে । আনহাতে দেশৰ ভিতৰত চতুৰ্থটো পেট-এম আৰ আই যন্ত্ৰ স্থাপন কৰা হৈছে জি এম চি এইচৰ কৰ্কট প্ৰতিষ্ঠানত ।

অত্যাধুনিক পেট-এম আৰ আই শাখাটো অসমসহ উত্তৰ-পূৰ্বাঞ্চলৰ জনগণৰ বাবে আজি উপ-ৰাষ্ট্ৰপতি এম ভেংকায়া নাইডুৱে মুকলি কৰে ।এই উপলক্ষ্যে আয়োজন কৰা অনুষ্ঠানত ৰাজ্যপাল অধ্যাপক জগদীশ মুখী, মুখ্যমন্ত্ৰী হিমন্ত বিশ্ব শৰ্মা, স্বাস্থ্যমন্ত্ৰী কেশৱ মহন্তৰ উপৰি ভালেসংখ্যক বিশিষ্ট ব্যক্তি উপস্থিত আছিল । উল্লেখযোগ্য যে, ৬২ কোটি টকা ব্যয়ে সাপেক্ষে ৰাজ্যিক কৰ্কট প্ৰতিষ্ঠানত অত্যাধুনিক পেট-এম আৰ আই যন্ত্ৰৰে শাখাটো স্থাপন কৰা হৈছে ।অসম চৰকাৰে ব্যয় বহন কৰি স্থাপন কৰা এই যন্ত্ৰটো দেশৰ ভিতৰতে চতুৰ্থ আৰু চৰকাৰী খণ্ডত প্ৰথম। ন্যূনতম বিকিৰণৰ এই যন্ত্ৰটো জেনিট' ইউৰিণাৰি আৰু মূৰ-ডিঙিৰ কৰ্কট ৰোগৰ চিকিৎসাৰ ক্ষেত্ৰত বিশেষভাৱে উপযোগী।