অমিতাভ বচ্চনৰ কাৰণে ৰিতেশ দেশমুখ আৰু জেনেলিয়া ডিচুজাৰ বিবাহ সম্পন্ন হৈছিল; নিজ মুখে প্ৰকাশ কৰিলে এই কথা

গুৱাহাটী, ৯ অক্টোবৰঃ অভিনেতা ৰিতেশ দেশমুখ আৰু তেওঁৰ পত্নী জেনেলিয়া ডিচুজা শুক্ৰবাৰে অৰ্থাৎ ৮ অক্টোবৰ নিশা অমিতাভ বচ্চনে আঁতধৰা ৰিয়েলিটি কুইজ শ্ব' 'কৌন বনেগা কৰোড়পতি ১৩'ৰ ফেণ্টাষ্টিক ফ্ৰাইডে' খণ্ডত বিশেষ অতিথি হিচাপে উপস্থিত হয়। ৰীতেশে এই খণ্ডটোত তেওঁৰ বিবাহ সম্পৰ্কীয় এটা ডাঙৰ কথা প্ৰকাশ কৰিছে।  

এই খণ্ডটোৰ সময়ত, দম্পতীহালে উদ্যোগটোত তেওঁলোকৰ অভিজ্ঞতাৰ বিষয়েও কৈছিল আৰু জেনেলিয়াই অমিতাভ বচ্চনৰ সৈতে তেওঁৰ প্ৰথম বিজ্ঞাপনৰ বিষয়ে বিশেষভাৱে উল্লেখ কৰিছিল। সেই সময়ৰ কথা মনত পেলাই অমিতাভে কৈছিল যে তেওঁলোকে কেনেদৰে একেলগে বিজ্ঞাপনটোৰ বাবে দৃশ্যগ্ৰহণ কৰিছিল, য'ত অমিতাভে জেনেলিয়াৰ ক্লোজ-আপ শ্বটৰ বাবে অনুৰোধ কৰিছিল।

লগতে উক্ত খণ্ডটোত ৰিতেশে জেনেলিয়াৰ সৈতে তেওঁৰ বিবাহৰ বাবে অমিতাভ বচ্চনক কৃতিত্ব দিছিল আৰু কৈছিল, "যদি আপুনি সেইদিনা ক্লোজ-আপ শ্বট নিদিলেহেঁতেন, তেন্তে আমাৰ বিয়া নহ'লহেঁতেন। সেই ক্লোজ-আপ শ্বটটোৰ কাৰণে আমি একেলগে আমাৰ প্ৰথমখন ছবিত কাম কৰিছিলো।"

আনহাতে, ৰিতেশে জেনেলিয়াক চিনেমা কৰি থকা সময়ত বিবাহৰ প্ৰস্তাৱ আগবঢ়াইছিল আৰু অমিতাভৰ চিনেমাৰ সংলাপ কৈছিল বুলি অভিনেতা গৰাকীয়ে নিজ মুখে এই কথা উল্লেখ কৰিছিল। 

ৰীতেশ আৰু জেনেলিয়াই ২০০৩ চনত তেওঁলোকৰ প্ৰথম ছবি 'তুঝে মেৰী কচম'ৰ সময়ত লগ পাইছিল। বহু বছৰ ধৰি ইজনে সিজনৰ সৈতে সময় অতিবাহিত কৰাৰ পিছত, দম্পতীহালে ২০১২ চনৰ ৩ ফেব্ৰুৱাৰী তাৰিখে বিবাহপাশত আৱদ্ধ হয়। ৰীতেশ আৰু জেনেলিয়া দুই পুত্ৰ ৰাহিল আৰু ৰিয়ানৰ পিতৃ-মাতৃ।