জলবায়ু পৰিৱৰ্তনৰ ফলত বৃহৎ অৰ্থনৈতিক লোকচান ভাৰতৰ 

গুৱাহাটী, ২৭ অক্টোবৰঃ জলবায়ু পৰিৱৰ্তনে বিশ্বক বাৰুকৈয়ে প্ৰভাৱিত কৰিছে। ইয়াৰ লগতে, ভাৰতেও বৃহৎ অৰ্থনৈতিক ক্ষতিৰ সন্মুখীন হ'বলগীয়া হৈছে। ৰাষ্ট্ৰসংঘৰ গোলকীয় বতৰ বিজ্ঞান সংস্থাই জানিবলৈ দিয়া অনুসৰি, বৰ্ধিত তাপমাত্ৰাৰ ফলত মহাদেশৰ প্ৰতিটো অঞ্চল প্ৰভাৱিত হৈছে। বিশ্ব বতৰ বিজ্ঞান সংস্থাৰ প্ৰতিবেদনত জলবায়ু পৰিৱৰ্তনৰ ফলত দেশসমূহৰ গড় অৰ্থনৈতিক লোকচানৰ বিৱৰণ দিয়া হৈছে। প্ৰতিবেদন অনুসৰি, যোৱা বছৰ ঘূৰ্ণীবতাহ, বান পানী আৰু খৰাঙৰ দৰে প্ৰাকৃতিক দুৰ্যোগৰ ফলত ভাৰতে ৮৭ বিলিয়ন ডলাৰ অৰ্থাৎ প্ৰায় ৬.৫ নিযুত কোটি টকা হেৰুৱাইছে।

জলবায়ু পৰিৱৰ্তনৰ ফলত চীনে আটাইতকৈ বেছি ক্ষতিগ্ৰস্ত হৈছে আৰু চীনৰ অৰ্থনীতিয়ে ২০২০ চনত জলবায়ু পৰিৱৰ্তনৰ পৰা ২৩৮ বিলিয়ন ডলাৰ বা প্ৰায় ১.৭ নিযুত কোটি টকা হেৰুৱাইছে। ইয়াৰ উপৰিও, জাপানে ৮৩ বিলিয়ন ডলাৰ অৰ্থাৎ প্ৰায় ৬.২ লাখ কোটি টকা আৰু দক্ষিণ কোৰিয়াৰ ২৪ বিলিয়ন ডলাৰ অৰ্থাৎ ১.৭ নিযুত কোটি টকাৰ লোকচান হৈছিল। 

ৰাষ্ট্ৰসংঘৰ বাৰ্ষিক ষ্টেট অৱ দ্য ক্লাইমেট ইন এছিয়াৰ প্ৰতিবেদনত এইটোও কোৱা হৈছে যে ২০২০ চনত এছিয়াৰ অভিলেখত আটাইতকৈ গৰম বছৰ আছিল। এছিয়াৰ গড় তাপমাত্ৰা ১৯৮১-২০১০ চনৰ তুলনাত ১.৩৯ ডিগ্ৰী চেলচিয়াছ অধিক হৈছে। 

"জলবায়ু পৰিৱৰ্তন আৰু কঠোৰ বতৰে ২০২০ চনত সমগ্ৰ এছিয়াত প্ৰভাৱ পেলাইছিল, যাৰ ফলত হাজাৰ হাজাৰ লোকৰ মৃত্যু হৈছিল আৰু লাখ লাখ শৰণাৰ্থীয়ে অন্য ঠাইত আশ্ৰয় ল'ব লগা হৈছিল।" ইপিনে, বিজ্ঞানীসকলে কয় যে জলবায়ু পৰিৱৰ্তনৰ ফলত উচ্চ-তীব্ৰতাৰ ঘূৰ্ণীবতাহ সৃষ্টি হয়। ২০২০ চনত এছিয়াত বান পানী আৰু ধুমুহাৰ ফলত প্ৰায় ৫০ নিযুত লোক ক্ষতিগ্ৰস্ত হৈছিল, আনহাতে ৫,০০০ ৰো অধিক লোকৰ মৃত্যু হৈছিল।