দেৱালীৰ প্ৰাকক্ষণত অসমত প্ৰতি লিটাৰ পেট্ৰ'লত ১২ টকা আৰু ডিজেলত ১৭ টকা হ্ৰাস

গুৱাহাটী,৪ নৱেম্বৰ:দেৱালীৰ আগে আগে বুধবাৰে কেন্দ্রীয় চৰকাৰ আৰু বিভিন্ন ৰাজ্যৰ ৰাজ্যিক চৰকাৰে পেট্র'ল আৰু ডিজেলৰ আবকাৰী শুল্ক হ্রাস কৰাৰ কথা ঘোষণা কৰে৷ ইয়াৰ ফলস্বৰূপে অসমত প্ৰতি লিটাৰ পেট্ৰ'লত ১২ টকা আৰু ডিজেলত ১৭ টকা হ্ৰাস হ'ল ৷ কেন্দ্ৰীয় চৰকাৰে পেট্ৰ’ল আৰু ডিজেলৰ মূল্য হ্ৰাস কৰাৰ সিদ্ধান্ত গ্ৰহণ কৰাৰ পাছতে অসম চৰকাৰেও পেট্ৰ’ল আৰু ডিজেলৰ মূল্য হ্ৰাস কৰাৰ সিদ্ধান্ত গ্ৰহণ কৰে ৷ মুখ্যমন্ত্ৰী ড৹ হিমন্ত বিশ্ব শৰ্মাই বুধবাৰে নিশা ৰাজ্যত পেট্ৰ’ল আৰু ডিজেলৰ মূল্য ৭ টকাকৈ হ্ৰাস কৰাৰ কথা ঘোষণা কৰে ৷

কেন্দ্ৰীয় চৰকাৰৰ ঘোষণাৰ পাছতে ৰাজ্য চৰকাৰে পেট্ৰ’ল আৰু ডিজেলৰ ওপৰত আৰোপিত ভেট ৭ টকাকৈ হ্ৰাস কৰাৰ সিদ্ধান্ত গ্ৰহণ কৰে বুলি হিমন্ত বিশ্ব শৰ্মাই টুইটযোগে প্ৰকাশ কৰে ৷ বুধবাৰে নিশা কেন্দ্ৰীয় চৰকাৰে পেট্ৰ’ল-ডিজেলৰ প্ৰতি লিটাৰত ক্ৰমে ৫ টকা আৰু ১০ টকাকৈ আবকাৰী শুল্ক হ্ৰাস কৰাৰ সিদ্ধান্ত ঘোষণা কৰে ৷ কেন্দ্ৰ আৰু ৰাজ্য উভয় চৰকাৰে পেট্ৰ’ল আৰু ডিজেলৰ ওপৰত আৰোপিত কৰ হ্ৰাস কৰাৰ কথা ঘোষণা কৰাৰ পাছতে এতিয়া অসমত প্ৰতি লিটাৰ পেট্ৰ’লৰ মূল্য মুঠ ১২ টকা আৰু ডিজেলৰ মূল্য মুঠ ১৭ টকা হ্ৰাস পাব ৷দেশৰ অধিকাংশ ৰাজ্যত পেট্ৰ’ল আৰু ডিজেলৰ মূল্যই শতকৰ ঘৰ অতিক্ৰম কৰাৰ পাছত জনসাধাৰণৰ মনত সৃষ্টি হোৱা অসন্তুষ্টিৰ পাছতে কেন্দ্ৰ-ৰাজ্য চৰকাৰে পেট্ৰ’ল আৰু ডিজেলৰ মূল্য হ্ৰাস কৰাৰ সিদ্ধান্ত লয় ৷