গুৱাহাটীত উন্নয়নৰ ধাৰা বোৱাই দিছপুৰ চুপাৰমাৰ্কেট ফ্লাইঅভাৰৰ শুভাৰম্ভ কৰিলে মুখ্যমন্ত্ৰী ড° শৰ্মাই  

গুৱাহাটী, ৪ নৱেম্বৰঃ অসমৰ মুখ্যমন্ত্ৰী ড০ হিমন্ত বিশ্ব শৰ্মাই বৃহস্পতিবাৰে গুৱাহাটীৰ দিছপুৰ চুপাৰমাৰ্কেটৰ নৱনিৰ্মিত উৰণীয়া সেঁতুখন উদ্বোধন কৰে।উদ্বোধনী অনুষ্ঠানত ভাষণ দি মুখ্যমন্ত্ৰী ড° শৰ্মাই কয় যে, "এই উৰণীয়া সেঁতুখন এতিয়াৰে পৰা সাধাৰণ ৰাইজৰ বাবে মুকলি কৰা হ'ল। জনসাধাৰণৰ যাতায়াতে নতুন গতি লাভ কৰিব।"

তেওঁ লগতে কয়, " মই অত্যন্ত সুখী যে দীপাৱলী উপলক্ষে বিজেপি চৰকাৰে এই উৰণীয়া সেঁতুখন কাৰ্যকৰী কৰি তুলিব পাৰিলে আৰু এতিয়াৰে পৰা এই উৰণীয়া সেঁতুখন ৰাইজৰ বাবে মুকলি হৈ পৰিল। এই নতুন সেঁতুখনৰ ফলত সাধাৰণ ৰাইজে দীৰ্ঘদিনৰ পৰা ভুগি যান-জঁটৰ সমস্যাৰ পসা সকাহ পাব। মই জনসাধাৰণক নতুনকৈ নিৰ্মিত এই উৰণীয়া সেঁতুখন পৰিষ্কাৰ কৰি ৰাখিবলৈ অনুৰোধ জনালো।" 

গণেশগুৰিৰ পৰা লাষ্ট গেইটলৈ যান-বাহনৰ গতি পৰিৱৰ্তন কৰি চুপাৰমাৰ্কেটত যান-বাহনৰ ভিৰ হ্ৰাস কৰাৰ লক্ষ্যৰে ১,২০৫ মিটাৰ দৈৰ্ঘ্যৰ এই উৰণীয়া সেঁতুখন নিৰ্মাণ কৰা হৈছে। ১২৭.২০ কোটি টকা ব্যয়েৰে নিৰ্মাণ কৰা উৰণীয়া সেঁতুখন নিৰ্ধাৰিত ৩৬ মাহৰ ঠাইত  ২২ মাহত সম্পূৰ্ণ হৈছে। এই নতুন সেঁতুখনে খানাপাৰাৰ পৰা গণেশগুৰিলৈ যান-বাহনৰ চলাচল সুচল কৰি তুলিব। লগতে জি এছ ৰোডৰ পৰা চুপাৰমাৰ্কেট আৰু পল্টন বজাৰলৈ শেষত যান-জঁটৰ সমস্যা প্ৰায় ৮০ শতাংশলৈ হ্ৰাস কৰিব।