আচৰিত ধৰণেৰে মৃত্যুদণ্ডৰ পৰা বাচি অহা এগৰাকী ব্যক্তি, যাৰ বাবে আদালত বাধ্য হৈছিল সিদ্ধান্ত সলাবলৈ

গুৱাহাটী, ১০ নৱেম্বৰঃ ছিংগাপুৰৰ শীৰ্ষ আদালতে মঙলবাৰে ক'ৰনাত আক্রান্ত হোৱাৰ পিছত ড্ৰাগছ সৰবৰাহৰ বাবে দোষী সাব্যস্ত হৈ মৃত্যুদণ্ডৰ শাস্তিৰে দণ্ডিত হোৱা ৩৩ বছৰীয়া ভাৰতীয় বংশোদ্ভূত এজন অভিযুক্তৰ শাস্তি স্থগিত ৰাখিছিল। ইয়াৰ পূর্বে আদালতে দোষী ব্যক্তিজনক মৃত্যুদণ্ড শাস্তি প্ৰদান কৰিছিল আৰু মানসিকভাৱে অসুস্থ বুলি কৈছিল। 

ছিংগাপুৰৰ উচ্চ ন্যায়ালয়ে তেওঁৰ আৱেদনৰ অনলাইন শুনানি সম্পূৰ্ণ নোহোৱাকৈয়ে তেওঁৰ মৃত্যুদণ্ডৰ নিৰ্ধাৰিত তাৰিখ স্থগিত কৰি ৰাখিছিল। এক বিশেষ প্ৰতিবেদনত প্ৰকাশিত তথ্য অনুসৰি, ধৰ্মলিঙ্গম নামৰ অভিযুক্তজনক প্ৰদান কৰা মৃত্যুদণ্ডৰ শাস্তিৰ বিৰুদ্ধে অন্তিম আৱেদনখনৰ শুনানিৰ বাবে আপীল আদালতলৈ অনা হৈছিল।

তেওঁক ১১ বছৰ আগতে মৃত্যুদণ্ডৰ শুনানি দিয়া হৈছিল আৰু যেতিয়া তেওঁক নিৰ্ধাৰিত তাৰিখ অনুযায়ী মৃত্যুদণ্ড দিবলৈ লৈ যোৱা হৈছিল, তেতিয়া তেওঁক পূনৰ কাৰাগাৰলৈ ঘূৰাই লৈ অনা হৈছিল। কিয়নো এজন ন্যায়াধীশে আদালতক কৈছিল যে, "ধৰ্মলিঙ্গম ক'ৰনা পজিটিভ হৈছে।"

ন্যায়াধীশ এণ্ড্ৰিউ ফাং, ন্যায়াধীশ জুডিথ প্ৰকাশ আৰু ন্যায়াধীশ কান্নন ৰমেশে এই বিষয় সন্দৰ্ভত কৈছিল যে, "এইটো অতিকৈ অপ্ৰত্যাশিত। কিয়নো বৰ্তমান পৰিস্থিতিত মৃত্যুদণ্ড কাৰ্যকৰী কৰাৰ দিশত আগবাঢ়ি যোৱাটো সঠিক নহয়।" ইপিনে, ন্যায়াধীশ ফেঙে কয়, "যদি আবেদনকাৰী ক'ৰনাত আক্রান্ত হৈছে, তেন্তে আমাৰ অভিমত যে তেওঁক বৰ্তমান ফাঁচী দিয়াটো উচিত নহ'ব।"